Sy het baie lewens geraak

OP 19 November 1994 het Kathy Roberson op die ouderdom van 26 gesterf. Sy het Christelike vergaderinge tot die week van haar dood getrou bygewoon. Haar stryd teen kanker vandat sy nege jaar oud was, is in die Ontwaak! van 22 Augustus 1994, onder die opskrif “Wanneer die lewe ’n stryd is”, opgeteken. Ná hulle die artikel gelees het, het baie mense van regoor die wêreld per brief daarop gereageer en beskryf hoe Kathy se moedige voorbeeld hulle diep geraak het.

Jongmense is aangemoedig om God te dien

Loida, van Spanje, het geskryf: “Ek is 16 jaar oud en het gehuil toe ek die ondervinding van Kathy se volharding gelees het. Ek was altyd bang om te sterf, maar danksy hierdie artikel begryp ek dat ‘wat werklik belangrik is’, soos sy gesê het, ‘nie is of ons nou leef of sterf nie, maar of ons die seën verkry van Jehovah God, die Een wat ons die ewige lewe kan gee’.”

Mari, van Japan, het geskryf: “Omdat ek omtrent so oud soos Kathy is en op dieselfde dag as sy gedoop is, het dit soos ’n brief van ’n goeie vriendin gevoel toe ek haar ondervinding gelees het. Haar hoop dat haar verhaal ander sal beweeg om hulle gesondheid nie vir leë doelwitte nie, maar wyslik in Jehovah se diens, te gebruik, het my hart diep geraak omdat ek op die punt staan om gewone pionierdiens [die voltydse bediening] te begin.”

Noemi, van Italië, het iets soortgelyks geskryf en gesê dat Kathy se wens dat jongmense hulle gesondheid verstandig in Jehovah se diens sal gebruik en nie om leë doelwitte na te streef nie, “duisende jongmense sal aanmoedig, my inkluis”. Noemi het bygevoeg: “Ek kan nie wag om haar in die nuwe wêreld te sien wanneer dit alles tot die verlede sal behoort nie. Sodra ek klaar is met hoërskool gaan ek met die pionierdiens begin.”

“Ek is 18 jaar oud”, het Rachelle van Florida, VSA, geskryf, “en ek oorweeg dit nou al ’n hele ruk om die pionierdiens te betree. Toe ek die artikel ‘Wanneer die lewe ’n stryd is’ gelees het, het ek dit baie aanmoedigend gevind om te sien dat iemand wat so jonk soos ek is sulke ontberinge verduur. Kathy het my gehelp om my gesondheid, soos sy gesê het, ‘nie te gebruik om leë doelwitte na te streef nie, maar om verstandig te wees en doelwitte in Jehovah se diens na te streef’.”

’n Paar sendelinge van die eiland Chuuk, in Mikronesië, het geskryf: “Ons pioniers is materieel arm. Suster Roberson se ondervinding het hulle egter gehelp om te waardeer wat hulle het. Hulle het besef dat hulle, hoewel hulle materieel arm is, met sterk liggame geseën is wat hulle in staat stel om Jehovah voltyds te dien. Dit was vir hulle ’n goeie herinnering om dankbaar te wees vir wat hulle het en om hulle krag in Jehovah se diens te gebruik.”

’n Groep van 16 studente wat die pionierskool in Frankryk bygewoon het, is beweeg om ’n foto van lelies aan Kathy te stuur met die aanmoedigende boodskap: “Ons sal nie jou aansporing vergeet om ons tyd in die diens van ons groot Skepper te gebruik nie.”

Nog ’n jeugdige van Frankryk het geskryf: “Ons voel soms dat dit moeilik is om lojaal aan Jehovah te bly omdat ons jonk is en vername teikens van Satan is. Maar wanneer ons sulke pragtige en roerende verhale lees, ontvang ons hernieude krag en ywer omdat ons weet dat ander jongmense, soos Kathy, hulle onkreukbaarheid ondanks lyding handhaaf. Wat ’n pragtige voorbeeld!”

“Ek is omtrent jou ouderdom en geniet baie goeie gesondheid”, het Nadine van Ohio, VSA, geskryf. “Ek laat nietige dingetjies dikwels toe om in die pad van my diens aan Jehovah te staan. Jou verhaal het daartoe gelei dat ek my lewe ondersoek het en besef het hoeveel kosbare tyd ek gemors het. Jy was vir my ’n inspirasie.”

’n Jong vrou van Brasilië het gesê: “Sy het tot my hart gespreek en my begeerte vergroot om ons God in groter mate te dien.”

’n Jong meisie van Kanada het geskryf: “Ek is 15 jaar oud. Twee jaar gelede het ek uitgevind dat ek outoïmmuunlewerontsteking het. Danksy die ondervinding van Kathy Roberson het ek besef dat ek, ondanks my gesondheidstoestand, Jehovah ook getrou kan dien terwyl daar nog tyd is en dat ek geduldig op God se beloofde nuwe wêreld moet wag waar ek volkome sal herstel.”

Jennette van New Jersey, VSA, het geskryf: “Al die probleme wat sy ondervind het en die geloof wat sy geopenbaar het, help ons almal om vasbeslote te wees om meer in Jehovah se diens te bly doen ondanks enige probleme wat ons moontlik het. Ek is van plan om haar ondervinding met my Bybelstudente te bespreek om hulle te motiveer om die pionierdiens as doelwit te stel wanneer hulle die skool verlaat.”

Ouer mense is ook aangemoedig

’n Vrou van Kalifornië, VSA, het geskryf: “Jy het gewis die kleiner sake in ons lewe in perspektief geplaas en getoon wat die basiese, fundamentele element van die lewe is—ons verhouding met Jehovah.” Sy het bygevoeg: “Hoewel ek lank nie meer jonk is nie, is ek diep geraak en gemotiveer deur jou ondervindinge en uitkyk op die lewe. Dit het my gehelp om my prioriteite te hersien.”

Nog ’n brief van Kalifornië het gesê: “Wat jy deurgemaak het, is net so groot soos enige toets wat die broers en susters in Duitsland of Malawi of enige ander plek waarvan ek al gelees het, moes deurmaak. Ek is nou 68 en het dus al baie ondervindinge gesien, gehoor en gelees. Jou verhaal sal vir oud sowel as jonk ’n seën wees.”

’n Vrou van Suid-Carolina, VSA, het erken: “Ek is nie meer ’n kind nie. Ek is amper 70 jaar oud.” Sy het uit waardering geskryf: “Jy is nog ’n Job. Ek hoop dat almal, oud en jonk, kennis sal neem van jou volharding.”

Nog ’n brief het gesê: “Kathy se geloof en vasberadenheid het my hart geraak. Ek is amper 57 jaar oud, en een van my doelwitte was om meer tyd aan Jehovah se diens te bestee wanneer ek aftree, maar daar is onlangs vasgestel dat ek kanker het. Hoe jammer is ek tog dat ek nie meer vir Jehovah gedoen het toe ek jonger was en my gesondheid gehad het nie! Geeneen van ons kan voorspel wanneer ’n ernstige siekte daardie voorreg sal wegneem nie.”

’n Christen- ouer man het geskryf: “Ek gaan hierdie artikel in ’n spesiale lêer hou sodat ek dit kan lees wanneer die lewe die onverwagte wendings neem wat my geloof kan toets. Ek gaan hierdie artikel ook in my lêer vir herderswerk hou sodat ek die dierbare broers en susters wat deur probleme gebombardeer word, kan aanmoedig namate hierdie stelsel sy einde nader.”

Ons word gewis versterk deur die geloof en moed van alle lede van ons wêreldwye broederskap (1 Petrus 5:9). Soos Kathy sien ons almal uit na die vervulling van die Bybel se belofte van ’n tyd wanneer ‘die dood nie meer daar sal wees nie’ (Openbaring 21:3, 4). Wat ’n wonderlike tyd sal dit dan wees wanneer “geen inwoner sal sê: Ek is siek nie”.—Jesaja 33:24.

[Prent op bladsy 20]

Kathy Roberson