Van ons lesers
Speelgoed Ek het so pas die goeie artikel “Ouers—Kies julle kind se speelgoed wyslik” (8 September 1994) gelees. As ’n ouer het ek die inligting baie waardeer. Ek wil egter graag ’n woordjie van waarskuwing byvoeg. Waarsku lesers asseblief dat die moontlikheid bestaan dat klein kindertjies in emmers kan verdrink waarin daar selfs net ’n klein bietjie vloeistof is.
E. V., Verenigde State
Ons waardeer die wenk.—RED.
Ek en my seun was in die middel van ’n gesprek oor ’n speelding wat hy graag wou hê ek vir hom moes koop en wat volgens my mening nie gepas vir hom was nie. Omdat hy nog jonk is, het hy dit moeilik gevind om met my redenasie saam te stem. Terwyl ons daaroor gepraat het, het ons die pos oopgemaak, waaronder die jongste Ontwaak! Ons albei was verbaas om die opskrif “Weet jy waarmee jou kind speel?” te sien. Hy was beïndruk deur die artikels en het my redenasie begin verstaan.
W. F., Verenigde State
Dankie vir die artikels. Ek is byna 13 jaar oud en geniet buitelugaktiwiteite, kunshandwerk en om klavier te speel. Toe ek nog jonger was, het ek my eie speelgoed gemaak. Ek hou meer daarvan om hierdie dinge te doen as van videospeletjies, want dit laat my voel dat ek iets bereik. Ek hoop hierdie artikels het ander kinders help besef hoeveel pret hierdie dinge kan wees.
C. S., Verenigde State
Seekoei Dankie vir die artikel “Seekoei word lewensredder!” (8 Oktober 1994). Dit was vir my baie roerend toe ek gelees het hoe die seekoei daardie rooibok gered het. Tot nou toe was die seekoei vir my net ’n yslike lyf in die water wat ’n yslike mond oopmaak om yslike tande te wys. Ek sou nie gesê het dat ek van daardie diere hou nie, maar hierdie artikel het my van opinie laat verander.
Y. H., Japan
Israeliese soldaat se verhaal Ek is nou net klaar met die artikel “Opgelei om dood te maak, maar nou bied ek die lewe aan” (8 September 1994). Ek het al baie keer gevoel dat ek aan julle moet skryf om my waardering uit te spreek, maar nooit het ek so ’n behoefte daaraan gehad soos nou nie. Ek het al dikwels gewonder hoe Jode op die goeie nuus van Jehovah se Koninkryk reageer. Nou het julle die besonder hartverblydende verhaal van Rami Oved gepubliseer. Wat ’n vreugde is dit tog om van die oorwinning van God se Woord oor elke hindernis te lees!
J. S., Verenigde State
Die verhaal het my geroer aangesien my familie ook van Joodse afkoms is. Dit is vir baie mense moeilik wanneer hulle die waarheid van die Bybel bó hulle familie kies, maar dit is blykbaar veral moeilik vir Jode aangesien hulle deur hulle familie as dood beskou word. Maar my ouers se familie het versag toe hulle besef het dat my ouers nie die waarheid vir enigiemand sou prysgee nie!
F. K., Verenigde State
Oogoperasie Ek het die artikel “Radiale keratotomie—Wat is dit?” met groot belangstelling gelees (22 September 1994). Aangesien ek hierdie operasie oor ’n paar maande sal ondergaan, het ek die verduideliking baie geniet. Die inligting was vollediger as dié wat deur my oogarts voorsien is.
G. C., Italië
Kinders wat ly Julle reeks “Watter hoop is daar vir die kinders?” (8 Mei 1994) was realisties en baie goed geskryf. Toe ek van die verskriklike ondervindings en die dodelike siektes gelees het, sowel as die haglike lewenstoestande waaronder baie kinders ly, het dit my baie hartseer laat voel. Maar ek was verheug om van die ware hoop vir kinders te lees wat verwesenlik sal word wanneer God se Koninkryk oor die mensdom regeer.
D. G., Papoea-Nieu-Guinee