Die eenoor-hottentotsgot

Baie eeue gelede het Griekse legendes die skrikwekkende siklope, eenoogreuse wat in ’n afgeleë land gewoon het, beskryf. Hierdie gebreklike monsters het slegs in die mens se ryke verbeelding bestaan.

Maar wetenskaplikes het onlangs onverwags op ’n duisternis van eenoordiertjies—vlak voor hulle neus—afgekom. Hulle staan as hottentotsgotte bekend.

Waarom het die hottentotsgot se geheim nou eers aan die lig gekom? Wetenskaplikes was lank onder die indruk dat die hottentotsgot doof is, aangesien hy geen geluid maak of op klank reageer soos ander insekte nie. Om sake nog verder te vertroebel, sit die hottentotsgot se oor nie aan sy kop waar ’n mens sou verwag dit moet wees nie. Die tydskrif Natural History verduidelik dat die oor “’n diep gleuf, sowat een millimeter lank”, aan die onderkant van die hottentotsgot se liggaam is.

Is dit nie ’n bietjie ongerieflik om slegs een oor op so ’n eienaardige plek te hê nie? Wel, ons as mense gebruik ons twee ore om te identifiseer waar ’n geluid vandaan kom. Die hottentotsgot kan blykbaar sonder daardie vermoë klaarkom. Sy gehoor is ontwerp om hom teen lewensgevaarlike situasies te waarsku. Die hottentotsgot het ’n ingeboude sonarontvanger.

Die hottentotsgot se oor vang ultrasoniese klank op, veral die geluide wat vlermuise maak wanneer hulle na insekte soos die hottentotsgot op jag is. Natural History sê dat wetenskaplikes opgemerk het dat die hottentotsgot vinnig op die vlug slaan wanneer ’n vlermuis nader kom, danksy die hottentotsgot se skerp ultrasoniese gehoor. Maar hoe kom die hottentotsgot weg van ’n vlermuis wat drie of vier keer vinniger as sy prooi kan vlieg?

Wanneer die hottentotsgot die ultrasoniese gevaarsein opvang—gewoonlik wanneer die vlermuis binne ’n omtrek van ongeveer tien meter van hom af is—voer die hottentotsgot in ’n oogwink ’n skerp duikvlug uit. Hy doen dit blykbaar deur doelbewus tot stilstand te kom, ’n verdedigingsmaneuver wat soortgelyk is aan dié wat deur moderne vegvlieëniers uitgevoer word. Trouens, Natural History sê dat die hottentotsgot “’n gevorderde les in luggevegstrategieë aanbied”.

Hoe het die hottentotsgot ‘gevorderde luggevegstrategie’ geleer? Wie het sy ultrasoniese gehoortoerusting ontwerp? Die logiese antwoord is gewis die een wat deur die patriarg Job voorsien is: “Wie weet nie deur al hierdie dinge dat die hand van die HERE dit gemaak het nie?”—Job 12:9.