Wagtoring – AANLYN BIBLIOTEEK
Wagtoring
AANLYN BIBLIOTEEK
Afrikaans
  • BYBEL
  • PUBLIKASIES
  • VERGADERINGE
  • g95 4/8 bl. 28-29
  • Ons beskou die wêreld

Video nie beskikbaar nie.

Jammer, die video kon nie laai nie.

  • Ons beskou die wêreld
  • Ontwaak!—1995
  • Onderhofies
  • Soortgelyke materiaal
  • Hoop vir dié wat hakkel
  • Die “bedryf” van godsdienstoerisme
  • Eetversteurings neem toe
  • Delhi se vermistes
  • Jehovah se Getuies in Kuba
  • Suidpoolstreek —vroeër warm en groen
  • Die jongste bevindinge oor radiale keratotomie
  • Verligting vir dié met allergieë
  • Burokratiese vaagheid in Japan word ontsyfer
  • Medisyne in die vullisblik
  • Toerisme—’n wêreldwye bedryf
    Ontwaak!—2002
  • Waarom ’n hedendaagse siekte?
    Ontwaak!—1990
  • Ons beskou die wêreld
    Ontwaak!—1994
  • Eetversteurings—Wat kan help?
    Ontwaak!—1999
Sien nog
Ontwaak!—1995
g95 4/8 bl. 28-29

Ons beskou die wêreld

Hoop vir dié wat hakkel

’n Australiese ma wat die verleentheid ervaar het toe sy as kind gehakkel het, was verpletter toe sy hoor hoe haar eie kinders op ’n vroeë ouderdom begin hakkel. Sy het toe betrokke geraak by ’n program wat deur spraakterapeute by ’n hospitaal in Sydney in samewerking met die Sydney-universiteit in Nieu-Suid-Wallis ontwikkel is. Die geheim van sukses lê blykbaar daarin om die kinders so vroeg moontlik te behandel. Baie ouers maak nie werk van die probleem nie weens die verkeerde opvatting dat die kind die gewoonte sal ontgroei. Soos daar in The Sydney Morning Herald berig is, word daar met die program “groot welslae behaal en bied dit die eerste vooruitsig dat hakkelry moontlik heeltemal genees kan word”. Dit sê dat dit terapeute slegs ongeveer tien uur neem om klein kinders te behandel, maar dat honderde ure nodig was om volwassenes en ouer kinders te behandel, buiten die ure wat ouers tuis daaraan bestee het. “Die voortgesette studie het bevind dat nie een van die 43 kinders tussen die ouderdom van twee en vyf wat behandel is ’n terugval gehad het tydens die opvolgopnames wat tussen een en ses jaar ná die behandeling gedoen is nie”, het die koerant gesê.

Die “bedryf” van godsdienstoerisme

“Godsdienstoerisme neem in Italië sowel as in die [res van die] wêreld toe”, skryf La Repubblica. Deskundiges skat dat, wanneer die syfers bereken is, 1994 “al die vorige rekords [sal] oortref”, met van 35 miljoen tot 37 miljoen besoekers aan Katolieke godsdiensgeboue in Italië alleen. Italië se sukses, sê die koerant, is toe te skryf aan haar “30 000 kerke wat vir hulle kunswaarde gekatalogiseer is, 1 500 heiligdomme, 700 diosesane museums, tientalle monnikekloosters, abdykerke en nonnekloosters”. Die godsdienstoerisme is ’n “bedryf” met ’n omset van meer as 4 biljoen lire (R9 miljard), “maar ook in ander lande het godsdienstoerisme ongelooflike sukses behaal”, voeg die koerant by.

Eetversteurings neem toe

Waarom neem die aantal persone met die eetversteurings bulimie en anoreksie toe? Dit is as gevolg van emosionele konflikte wat intense angs veroorsaak in ’n wêreld wat “skrikwekkend en buite beheer” lyk, sê die tydskrif Your Family. Die oorsake van hulle angste is ingewikkeld, soos druk van ouers om sukses te behaal, egskeiding van ouers en mishandeling. Daarbenewens, verduidelik dr. Danie le Grange, ’n lid van die Nasionale Eetversteuringskomitee, word baie mense slagoffers van hierdie versteurings omdat hulle modeblaaie en diëte aandagtig bestudeer in ’n obsessionele poging om slank te wees of omdat hulle chaotiese eetgewoontes aanneem. Vroue tussen die ouderdom van 18 en 22 is die kwesbaarste, hoewel pasiënte van net 8 jaar oud al professionele hulp gesoek het. Die slagoffers kan alleen met sukses behandel word as hulle behandel wíl word, sê dr. Le Grange, en voeg by dat dit “wel moontlik is om ten volle te herstel”. Maar statistiek toon dat tot 18 persent van die slagoffers van eetversteurings wél sterf.

Delhi se vermistes

Meer as 10 000 mense word elke jaar in Delhi, die hoofstad van Indië, as vermis aangemeld. Slegs ’n derde van hulle word ooit opgespoor. Vyftig persent is kinders onder 18, en daar is twee keer soveel seuns as meisies. Soos daar in The Times of India berig is, beland duisende jong meisies in bordele. Jong seuns word deur misdadigersbendes gedwing om te bedel of om lang ure in klein restaurante vir min geld te werk.

Jehovah se Getuies in Kuba

Jehovah se Getuies in Kuba geniet nou meer vryheid om hulle bediening uit te voer, wat hulle die geleentheid bied om die goeie nuus van God se Koninkryk aan die mense te verkondig. Hoewel die werk nie amptelik en wetlik erken word nie, word hulle toegelaat om hulle vorige kantore te gebruik en vergader hulle vryeliker vir aanbidding—in so ’n mate dat hulle klein byeenkomste gehou het. Hulle het toestemming ontvang om tydskrifte te druk. Die Getuies, wat vol vreugde en geesdrif is oor hierdie onlangse gebeurtenisse, gaan voort met hulle predikingswerk en strewe daarna om die Bybel se boodskap van hoop te verkondig.

Suidpoolstreek —vroeër warm en groen

’n Groep Australiese en Amerikaanse wetenskaplikes het fossiele van “blare, hout en stuifmeel asook insekeiers . . . net 500km van die Suidpool af [gevind], wat ’n aanduiding is van ’n klimaat wat 20-25C warmer as vandag is”, berig die koerant The Australian. Die ontdekking van kewereiers het bevestig dat die klimaat warm genoeg was om insekte aan die lewe te hou. Daarbenewens moes water in vloeistofvorm gebly het, en die groeiseisoen het lank genoeg geduur sodat die plante kon blom en saadskiet. Gedurende daardie selfde tyd, het die berig bygevoeg, het daar plante in Tasmanië (die eilandstaat van Australië suid van die vasteland) gegroei wat vandag nie verder suid groei as die sentrale deel van Nieu-Suid-Wallis, ’n bietjie minder as 1 600 kilometer na die noorde, nie—wat indirek bevestig dat die streek vroeër ’n warmer klimaat gehad het.

Die jongste bevindinge oor radiale keratotomie

Radiale keratotomie, die gewilde chirurgiese tegniek om miopie (swak afstandsvisie) te korrigeer, word elke jaar op ’n kwartmiljoen mense in die Verenigde State uitgevoer. In meer as 30 persent van die gevalle is ’n tweede operasie nodig om die eerste een fyner af te rond. ’n Tien jaar lange studie wat deur die Nasionale Ooginstituut geborg is, het nou vasgestel “dat die metode redelik veilig en effektief is, maar dat dit tot ’n versnelde agteruitgang kan lei in die vermoë om dinge van naby te sien”, berig The New York Times. Die breedvoerige studie oor die nawerking van die chirurgie het ’n newe-effek aan die lig gebring wat voorheen byna onbekend was: geleidelike veranderinge in die oog wat veroorsaak dat dit al hoe moeiliker word om dinge van naby te sien. Die visuele agteruitgang is opgemerk in 43 persent van diegene wat die chirurgie ondergaan het. Hoewel dit in sommige gevalle aan normale veroudering toegeskryf kan word, is sommige “waarskynlik toe te skryf aan die radiale keratotomie-prosedure wat blykbaar die verandering by party mense op ’n vroeë ouderdom veroorsaak”, het die artikel gesê. “Mense moet besef dat daar nog onopgeloste kwessies is”, het dr. Peter J. McDonnell, die medevoorsitter van die studie, gesê. “Daar is geen waarborg van volmaakte visie nie.”

Verligting vir dié met allergieë

Volgens die Wêreldgesondheidsorganisasie het 20 persent van die wêreld se bevolking die een of ander allergie, sê die Brasiliaanse tydskrif Globo Ciência. “Alle aanduidings is daar dat allergieë ’n siekte van die beskaafde wêreld is”, sê die immunoloog Júlio Croce. “Daar is meer as tienduisend skadelike stowwe in die lug.” Benewens algemene oorsake, soos myte en besoedeling, is daar stres, oormatige gebruik van medisyne en chemiese produkte wat in voedsel, skoonheidsmiddels en drankies gebruik word. Selfs oormatige liggaamlike oefening kan tot asma lei of kan dit vererger. Maar as mense leer om reg asem te haal, “kan oefening help om die intensiteit en gereeldheid van die aanvalle te laat afneem”, sê dr. Croce. Diegene met allergieë moet hulle slaapkamer skoon en goed belug hou en kontak met huisdiere, soos honde, katte of voëls, vermy asook parfuums en ander sterk geparfumeerde produkte. Hulle moet ook skielike temperatuurveranderings, rook en sterk drank vermy en moet slegs voorgeskrewe medisyne gebruik.

Burokratiese vaagheid in Japan word ontsyfer

Wanneer burokrate in Tokio sê: “Jou opinie is nuttige raad” of “Ons sal met goeie oordeel op jou voorstel reageer”, beteken dit dat daar waarskynlik geen verdere stappe gedoen sal word nie. Net so sal beloftes om “alles in aanmerking te neem” of “uit baie oogpunte te beskou” ook waarskynlik nie tasbare resultate lewer nie. “Ons sal jou voorstel bestudeer”, beteken oor die algemeen dat niks in die nabye toekoms sal verander nie. Beloftes om te “oorweeg”, is effens positiewer as “bestudeer”, en “deeglik ondersoek”, beteken dat ’n voorstel dalk selfs toegepas sal word. Só het ’n senior staatsamptenaar die uitdrukkings verduidelik wat gewoonlik gedurende die stad Tokio se raadsvergaderinge gebruik word, sê The Daily Yomiuri in antwoord op klagtes van burgers dat hulle “nie duidelik begryp of die regering vir of teen” voorstelle is wat voorgelê word nie. Die rede vir die vaagheid, sê die koerant, is dat “burokrate versigtig is om raadslede nie hulle aansien te laat verloor deur [burgers se] voorstelle sonder meer te verwerp nie”.

Medisyne in die vullisblik

Volgens ’n Duitse gesondheidsversekeringsmaatskappy word daar soveel medisyne in Duitsland verkoop of voorgeskryf dat elke man, vrou en kind 1 250 pille per dag kan drink. Wat doen mense met al hierdie produkte? Baie word nie gebruik nie, berig die Süddeutsche Zeitung, maar word eenvoudig weggegooi. “Ons kan dit nie bekostig om toe te laat dat medisyne wat miljoene werd is jaar na jaar tussen die vullis beland nie”, het die hoof van ’n vereniging van gesondheidsversekeringsmaatskappye gekla. Hulle het versoek dat dokters en die farmaseutiese nywerheid pasiënte breedvoeriger inlig oor die medisyne wat hulle ontvang en dat hulle dit in “verstaanbare Duits” doen.

    Afrikaanse publikasies (1975-2025)
    Meld af
    Meld aan
    • Afrikaans
    • Deel
    • Voorkeure
    • Copyright © 2025 Watch Tower Bible and Tract Society of Pennsylvania
    • Gebruiksvoorwaardes
    • Privaatheidsbeleid
    • Privaatheidsinstellings
    • JW.ORG
    • Meld aan
    Deel