Is hierdie speletjie vir jou?

“NA GELANG van ’n mens se siening is Doom óf ’n skietery wat jou hart vinniger laat klop en wat rekenaarspeletjies op ’n nuwe vlak van tegniese ingewikkeldheid bring óf ’n orgie van eksplisiete geweld wat rekenaarspeletjies tot ’n nuwe laagtepunt voer.” Dit is wat Peter Lewis in The New York Times se rubriek “Personal Computers” geskryf het. Baie rekenaarspeletjies is natuurlik bloot effens verbloemde geweld, bloedige slagtings of selfs openlike pornografie. Die onlangse toevoeging—Doom II—gaan na verwagting ’n treffer wees, selfs teen $69,95 (R250,00). Is hierdie soort speletjie gepas vir vredeliewende Christene? Die res van Peter Lewis se beskrywing sal jou dalk help besluit.

“Die speler neem die identiteit aan van ’n geharde seesoldaat wat op een van die mane van Mars gestasioneer is, waarna ’n industriële ongeluk ’n gang na die Hel oopmaak. . . . Die seesoldaat moet deur ’n doolhof van gange beweeg, . . . en hy moet die demone en gewese mense om byna elke draai slaan, skiet, verbrand en met ’n kettingsaag sny. . . .

“Die verloop van Doom II word maklik opgesom: Meer demone, meer kloustrofobiese gange, meer wapens en meer bloed.”

The New York Times het oor ’n rekenaarkongres in Las Vegas, Nevada, gesê: “Hierdie jaar se ooglopendste nuwigheid was multimedia pornografie . . . Dit het van die kongres se grootste skares gelok.”

Die Bybelskrywer Jakobus het gesê: “Die wysheid van bo is allereers kuis, dan vredeliewend, redelik, bereid om te gehoorsaam, vol barmhartigheid en goeie vrugte” (Jakobus 3:17). Ouers, het julle onlangs die rekenaarspeletjies nagegaan wat julle kinders tuis gebruik? Is dit nodig dat ons meer sê?