Vrae van lesers
Kan dit ons verhouding met Jehovah raak as ons gewelddadige rekenaarspeletjies speel?
“Jehovah ondersoek die regverdige sowel as die goddelose”, het koning Dawid van eertydse Israel geskryf, “en Sy siel haat beslis elkeen wat geweld liefhet” (Psalm 11:5). Die woord vir “haat” in die oorspronklike taal kan die gedagte bevat van “iemand wat ’n vyand is”. Enigiemand wat geweld liefhet, maak hom dus ’n vyand van God. Die vraag wat ons moet oorweeg, is dus: Kan dit ’n liefde vir geweld aanwakker as ’n mens sekere rekenaarspeletjies speel?
Gewelddadige rekenaarspeletjies verheerlik die gebruik van wapens. Dit lei die speler dikwels in oorlogvoering op. Die tydskrif The Economist het gesê: “Amerika se leër maak al hoe meer staat op rekenaarspeletjies as opleidingsmiddele. Sommige speletjies wat die leër gebruik, kan in winkels gekoop word.”
Diegene wat gewelddadige rekenaarspeletjies speel, doen werklike mense weliswaar nie leed aan nie. Maar wat toon hierdie keuse van vermaak oor wat moontlik in hulle harte gebeur? (Matteus 5:21, 22; Lukas 6:45). Wat sal jy dink van iemand wat dit geniet om denkbeeldige mense te steek, te skiet, te vermink en dood te maak? Gestel hierdie persoon bestee elke week baie ure aan hierdie gewelddadige fantasieë en raak feitlik verslaaf aan sulke speletjies? Jy sou ten minste dink dat hy ’n liefde vir geweld aankweek, net soos iemand wat na pornografie kyk, onsedelike begeertes aanwakker.—Matteus 5:27-29.
Hoe intens haat Jehovah iemand wat geweld liefhet? Dawid het gesê dat Jehovah hom ‘beslis haat’. In Noag se dag het Jehovah getoon hoe intens sy haat is vir diegene wat geweld liefhet. Jehovah het vir Noag gesê: “Die einde van alle vlees het voor my gekom, want die aarde is vol geweld as gevolg van hulle; en kyk, ek verdelg hulle saam met die aarde” (Genesis 6:13). Die ware God het ’n hele mensewêreld weens hulle gewelddadige weë vernietig. Hy het net Noag en sy gesin bewaar—agt persone wat nie geweld liefgehad het nie.—2 Petrus 2:5.
Diegene wat Jehovah se vriende wil wees, “[smee] van hulle swaarde ploegskare . . . en van hulle spiese snoeimesse”. In plaas van te leer om geweld lief te hê, ‘leer hulle nie meer om oorlog te voer nie’ (Jesaja 2:4). Om God se vriend te bly en nie sy vyand te word nie, moet ons “afwyk van wat sleg is en doen wat goed is”. Ons moet “vrede soek en dit nastreef”.—1 Petrus 3:11.
Sê nou ons speel reeds gewelddadige rekenaarspeletjies? Dan moet ons vasbeslote wees om Jehovah te behaag deur op te hou om te beoefen wat hy haat. Ons moet beslis bid vir die hulp van God se heilige gees om met hierdie geestelik skadelike gewoonte te breek. Ons kan daarmee ophou as ons toelaat dat eienskappe soos vrede, goedheid en selfbeheersing ’n godvrugtige invloed op ons lewe het.—Lukas 11:13; Galasiërs 5:22, 23.