Koninkryksverkondigers berig

God laat dit groei in Alaska

ONDER ’n laag sneeu en ys wag ’n saadjie op die geleentheid om tot volwassenheid te groei. Binne die drie kort maande waaruit die somer in Alaska bestaan, kan ’n koolsaadjie met ’n deursnee van drie millimeter tot bykans 40 kilogram groei! Ja, hierdie land wat baie mense eens as ’n onvrugbare, ysige woesteny beskou het, kan groot opbrengste lewer.

Dit is veral waar van die geestelike veld in Alaska. Daar, in die land van lang winters, gaan Jehovah se Getuies voort om Koninkryksaad te saai. Soos in ander dele van die aarde laat God die saad in vrugbare harte groei.—1 Korintiërs 3:6, 7.

● Terwyl ’n jong Getuie met die naam Vanessa met die skoolbus gery het, het sy ’n medeskolier, Ann, gesien, wat altyd alleen gesit het. Ann het hartseer gelyk, en daarom het Vanessa Ann genooi om langs haar te kom sit. Geen wonder Ann was hartseer nie! Haar ma het aan ’n hartaanval gesterf, en kort daarna het haar pa aan kanker gesterf. Daarom het Ann by familielede in Alaska gewoon.

Een Saterdag het Vanessa by haar nuwe vriendin se huis langs gegaan en die brosjure Gee God werklik vir ons om? by haar gelaat. Die volgende Maandag het Ann by die skool na die jong Getuie gesoek. Ann het baie Bybelvrae gehad, wat Vanessa kon beantwoord. “Waar hou julle julle dienste?” het sy gevra. Daardie aand het Ann haar eerste vergadering by die Koninkryksaal bygewoon.

Hierdie 17-jarige weeskind het sommer gou baie ‘vaders’ en ‘moeders’ gevind, net soos Jesus belowe het (Matteus 19:29). En wat ’n vreugdevolle geleentheid was dit tog om te sien hoe ’n gelukkige en glimlaggende Ann by die “Boodskappers van Goddelike vrede”-streekbyeenkoms haar toewyding aan Jehovah deur waterdoop simboliseer!

● In die afgeleë gebiede van Alaska se uitgestrekte Noordpoolstreek—waar dorpies deur honderde kilometers wildernis geskei word—is die Wagtoringgenootskap se tweemotorige vliegtuig gebruik om Koninkryksaad in meer as 150 gemeenskappe te saai. Maar geestelike groei deur middel van ’n gereelde studie van die Bybel is afhanklik van korrespondensie. Aangesien dit vir baie ’n uitdaging is om briewe te skryf, moet ’n Bybelonderrigter aan oorspronklike idees dink om die student se belangstelling gaande te hou. Hoe kan dit gedoen word?

Kathy het ’n progressiewe Bybelstudie met Edna gehou, hoewel hulle meer as 600 kilometer van mekaar af gewoon het! Kathy het nie bloot die vrae uit die studiehulp afgeskryf nie, maar sy het ’n vraestel opgestel en ruimte gelaat waar die antwoorde ingeskryf kon word. Nadat Edna die antwoorde ingevul het, het Kathy teruggeskryf en kommentare bygevoeg waar dit nodig was om ’n punt te verduidelik. Kathy sê: “Ek sit Woensdagaand opsy vir ons ‘studie’, en ek probeer om daarby te bly soos ek met enige ander afspraak vir ’n Bybelstudie sou doen. Ek het ook vir Edna ’n geadresseerde koevert met ’n posseël op gestuur. Aangesien dit twee weke met die pos neem, het dit gelyk asof ’n studie wat per brief gehou word nogal lank neem.”

Stel jou net hulle opgewondenheid voor toe Kathy en Edna mekaar by die streekbyeenkoms in Anchorage van aangesig tot aangesig ontmoet het nadat die studie tien maande lank deur die pos gehou is! Die Getuies was ook verheug dat Bybelstudente en ander belangstellendes van verskeie afgesonderde dorpies in Alaska teenwoordig was.

Hoewel die groei soms miskien stadig lyk, ontkiem party saadjies gou wanneer hulle aan die lig van die waarheid blootgestel word. Daar word elke jaar gemiddeld meer as eenhonderd nuwe lowers van Jehovah in Alaska gedoop! Ons sê: “Dankie, Jehovah”, dat u dit laat groei!