Ons beskou die wêreld
Dobbel met meer as geld
Volgens die Australiese koerant The Sydney Morning Herald kom die owerhede, met die opening van nuwe kasino’s, voor ’n onverwagte probleem te staan: “ouers wat hulle kinders aan hulle lot oorlaat sodat hulle kan dobbel”. Etlike kinders is in motors toegesluit gevind terwyl hulle ouers ure by die dobbeltafels deurgebring het. Een opspraakwekkende geval was van ’n vyfjarige seuntjie en sy 18 maande oue sussie wat vyf uur lank in ’n motor toegesluit is totdat hulle seweuur die oggend deur die polisie bevry is. Duidelike tekens in verskeie tale is nou buite een kasino geplaas wat ouers waarsku dat hulle ’n boete van $5 000 (R18 900) en moontlike tronkstraf sal kry as hulle hulle kinders op hierdie manier aan hulle lot oorlaat. Volgens The Herald het ’n maatskaplike werker gesê dat dobbelverslawings ook tot “die verbrokkeling van huwelike, misdaad, die verlies van betrekkings en selfmoorde” gelei het.
Wysiging van die Bybel
Oxford University Press het ’n nuwe weergawe van die Bybel met ongekende veranderings voorberei. In ’n poging om “polities korrek” te wees, het die weergawe verklarings vermy wat glo vertolk kan word as seksisties, rassisties of dat dit spore van anti-Semitisme bevat. Die nuwe weergawe verwys byvoorbeeld na God as “Vader-Moeder”. Jesus sal nie die “Seun van die mens” wees nie, maar eerder die “Menslike Een”. Die weergawe het ook geen verwysing na die feit dat die Jode Jesus Christus doodgemaak het nie. Selfs die sogenaamde vooroordeel teenoor linkshandiges sal uitgeskakel word wanneer God se “regterhand” sy “magtige hand” word, sê The Sunday Times.
Vissery in gevaar
Terwyl die vissersvlote van verskillende lande oor gebieds- en visregte stry, waarsku ’n verslag deur die Worldwatch-instituut dat die wêreld se visoes sy toppunt bereik het en nou in die meeste dele van die wêreld in werklikheid besig is om af te neem. Hoewel dit erken dat omgewingsbesoedeling ’n faktor by die wêreldwye uitdunning van die seelewe was, sê die verslag dat oorbevissing deur die kommersiële visbedryf die hoofoorsaak is van die kwynende aantal vis wat in die Atlantiese en Stille Oseaan en die Swart en Middellandse See gevang word. Die Agence France-Presse-nuusdiens sê dat die vangs volgens die Worldwatch-verslag in sommige streke met tot 30 persent afgeneem het en dat letterlik miljoene vissers binnekort werkloos sal wees indien die huidige wanbestuur van die oseane se hulpbronne voortduur.
Die stygende koste van voëlnessop
In die restaurante van Hongkong en ander Asiatiese stede is ’n eetbare voëlnes ’n geliefkoosde gereg, wat dikwels as ’n sop gemaak word. Volgens die International Herald Tribune beskou baie Chinese die gekookte neste nie net as ’n lekkerny nie, maar ook as ’n gesondheidsopknapper. Bewaringsgroepe skat dat daar in 1992 in Hongkong alleen ongeveer 17 miljoen swaeltjieneste gebruik is. Oormatige oestery het egter die groothandelkoste van neste tot ’n rekord van R1 800 per kilogram laat styg, en neste van uitsoekgraad kan meer as agt keer soveel kos. Dit kos die swaeltjies wat daardie neste bou baie meer. Die vernietiging van eiers en kuikens wanneer die neste geoes word, het gelei tot ’n afname in die getalle van sommige van die swaeltjies en tot die uitsterwing van ander.
Polisie slaan toe op swaar skooltasse
“Die gewig van skooltasse mag nie 15 persent van [die leerling se] liggaamsgewig oorskry nie”, sê die burgemeester van Cantù, ’n dorp in die provinsie van Como, noordelike Italië. Die burgemeester is besorg oor die gevaar van skoliose. Die ouers van kinders wat die reël oortree, kan ’n boete van 400 000 lira (R900) en tot ses maande tronkstraf kry. Om te wys dat hy ernstig was, het die burgemeester die stadspolisie, toegerus met ’n skaal, uitgestuur om kontrolepunte buite skole op te rig, berig Corriere della Sera. Net twee leerlinge wat gedurende die eerste kontrolering voorgekeer is, was binne die gewigsgrens. Trouens, een seun wat 34 kilogram weeg, het ’n tas gedra wat 12 kilogram weeg. Sy skoolmaats het hom vinnig verdedig en gekla dat die bloemlesing- en wiskundeboeke alleen vyf kilogram weeg en dat hulle elke dag die boeke van ten minste vier vakke moet saamdra. Die burgemeester het die uitgewersmaatskappye die skuld gegee, wat “swaarder en duurder boeke” wil verkoop. Hy het voorgestel dat hulle die handboeke in dele uitgee.
Lof werk stres teë
Elke jaar eis hartaanvalle die lewe van 200 000 mense in Duitsland. Wat is die hoofoorsaak? “Stres”, berig die koerant Süddeutsche Zeitung, aangesien dit “totale verbondenheid, voortdurende stres” verg om in Duitsland te werk. Stres by die werk het ’n hoë afwesigheidsyfer weens siekte tot gevolg en kan tot uitbranding lei. Elke tweede verpleegster ly aan stressimptome, en 1 uit 3 onderwysers tree vroeg af, dikwels weens “senuweespanning”. Gesondheidsversekeringsmaatskappye ondersoek maniere om stres by die werk te verminder. Een studie, wat onder ’n paar honderd middelslagfirmas gedoen is, wys op iets wat na ’n bydraende faktor lyk: 44 persent van die werkers onder wie die opname gedoen is, het nooit enige lof by die werk ontvang nie.
Wegloopkinders
Elke jaar loop 98 000 kinders in Brittanje van die huis af weg, sê die koerant The Independent. Baie doen dit om geweld in die gesin te ontvlug. Meer as 10 000 vlug ten minste tien keer voordat hulle 16 jaar oud is. Omdat hulle te jonk is om hulp van die welsyn te ontvang, wend baie van hierdie wegloopkinders hulle tot misdaad en prostitusie. As ons die probleem ignoreer, waarsku Ian Sparks, die bestuurshoof van die Genootskap vir Kinders, sal hierdie kinders as “hawelose volwassenes, afgeskeie van die samelewing,” grootword. Indien “die gemeenskap as ’n geheel” meer klem daarop lê om die ouers te ondersteun en te help, het hy gesê, “sal baie probleme in die eerste plek nie ontstaan nie”.
Skrikwekkende watertekort
“’n Waterkrisis van skrikwekkende omvang staar Suid-Afrika in die gesig”, berig die koerant The Star. Tensy alternatiewe bronne benut word, sal huidige waterbronne “binne die volgende 15 jaar” uitgeput wees. Een faktor is die vinnig toenemende bevolking. Lae reënval, ongeveer die helfte van die wêreldgemiddelde, is nog ’n oorsaak. ’n Buitengewoon hoë tempo van verdamping vererger die probleem. Die grootste wateropgaardam in die land verloor jaarliks gemiddeld 500 000 kiloliter deur verdamping. Die gehalte van die bestaande water is ook weens besoedeling aan die afneem. The Star sê: “Daar is nou 12 miljoen mense wat nie toegang tot skoon drinkwater het nie en meer as 20 miljoen sonder voldoende sanitasie (waarvoor water gebruik word).”
Geraasbesoedeling
Ten minste 10 persent van die wêreld se bevolking het in sekere mate ’n gehoorgebrek. Die Brasiliaanse tydskrif Globo Ciência verduidelik dat “die menseoor nie gemaak is om die geraas te verdra wat deur die beskawing gemaak word nie”. Daaglikse blootstelling aan gevaarlike geraasvlakke kan ook tot swak konsentrasie, lae produktiwiteit, aggressie en ongelukke by die werk bydra.
Tronksyfers styg
Namate misdaad wêreldwyd toeneem, word die aantal mense wat opgesluit word ook meer. Rusland het ’n gevangesettingsyfer van 558 vir elke 100 000 mense, gevolg deur die Verenigde State met 519 per 100 000. Volgende is Suid-Afrika met 368, Singapoer met 229 en Kanada met 116. Sedert die ontbinding van die voormalige Sowjetunie het moorde en ander misdade in Rusland grootliks vermeerder, en die gevangesettingsyfer daar het die hoogte ingeskiet, verby die Verenigde State wat voorheen bo-aan die lys was. Waarom sluit baie Europese nasies mense op teen ’n sesde van die tempo van die Verenigde State? “Een verklaring is dat, hoewel daar nie ’n groot verskil in lande se algemene misdaadsyfers is nie, geweld meer algemeen in die Verenigde State, Rusland en Suid-Afrika voorkom”, sê U.S.News & World Report. “Wat ook al die redes, die gevangesettingsgaping sal waarskynlik groter word.”
Kinders wat beter lees en skryf
“Wanneer daar vir kinders gelees word, verbeter dit hulle skryfvaardighede”, berig die Kanadese koerant Globe and Mail. Volgens die resultate van onlangse toetse wat deur die Departement van Onderwys van Ontario, Kanada, gedoen is, het leerlinge wat gesê het dat stories dikwels vir hulle gelees is terwyl hulle grootgeword het beter gevaar as dié vir wie daar selfde of nooit boeke gelees is nie. Die Globe het bygevoeg dat “leerlinge wat goed gelees het ook goed geskryf het” en dat “leerlinge wat ná skool gelees het in beide lees en skryf beter gevaar het”. Volgens die president van Ontario se Onderwysersfederasie het die toetsresultate getoon dat “leerlinge wat teen die ouderdom van 14 nie lees nie en vir wie daar nie gereeld gelees word nie dit ook nie daarna sal doen nie”.