Hoe om ’n suksesvolle enkelouer te wees

“Die een ding waaraan alle enkelouers altyd ’n gebrek het, is tyd.”—The Single Parent’s Survival Guide.

“’n Tekort aan geld is die ernstigste probleem.”—The Times van Londen.

‘Eensaamheid is ’n groot oorsaak van spanning vir die enkelouer.’—Give Us a Break, ’n opname van vryetydsgeleenthede vir enkelouers.

ALLE ouers ervaar uitdagings, vreugdes en probleme. Maar enkelouers doen dit sonder ’n maat. Gevolglik speel tyd, geld en eensaamheid dikwels ’n groot rol in hulle lewe.

Hoe moeilik hulle lewe ook al is, enkelouers kan welslae in hulle gesinslewe behaal, en talle doen dit ook. Baie hang af van watter standaarde hulle aanvaar en hoe pligsgetrou hulle daarby bly.

Interessant genoeg, die Bybel het lank gelede al die huidige sedelike en maatskaplike beroeringe voorspel. Let op hoe die Christenapostel Paulus die jong dissipel Timoteus se aandag hierop gevestig het. “Maar weet dít”, het hy gewaarsku, “dat daar in die laaste dae kritieke tye sal wees wat moeilik is om deur te kom. Want mense sal liefhebbers van hulleself wees, . . . ongehoorsaam aan ouers, ondankbaar, dislojaal, sonder natuurlike geneentheid, nie bereid tot enige ooreenkoms nie.”—2 Timoteus 3:1-3.

Die Bybel is nie bloot ’n boek wat vandag se gesindhede akkuraat voorspel het nie. Dit bevat juis dié beginsels wat, wanneer dit gevolg word, welslae in die gesinslewe verseker (2 Timoteus 3:16, 17). Kom ons kyk hoe party daarvan enkelouers kan help om probleme ten opsigte van tyd, geld en eensaamheid die hoof te bied.

Koop die tyd uit

Ongeag hoe georganiseerd jy is, tyd is iets ontwykends. Ten einde jou tyd goed te gebruik, moet jy eerstens vasstel wat werklik daarmee gebeur. Dan sal jy kan besluit watter bedrywighede die belangrikste vir jou is. “Hou ’n ‘tyddagboek’”, doen ’n enkelouerorganisasie aan die hand. “Daarin teken jy alles aan wat jy gedurende ’n dag of ’n week doen, en kyk hoeveel tyd dit in beslag neem. Daarna kyk jy waar jy tyd kan bespaar, of beter kan gebruik, deur dinge te herrangskik of sekere dinge uit te skakel.”

Hierdie nuttige raad weerspieël die skriftuurlike wysheid agter die apostel se vermaning: “Let dus voortdurend streng op hoe julle wandel, dat dit nie as onwyses is nie, maar as wyses, terwyl julle die geleë tyd vir julleself uitkoop, omdat die dae goddeloos is.”—Efesiërs 5:15, 16.

Speel TV-kykery byvoorbeeld ’n belangrike rol in jou daaglikse roetine? Deur dit in te kort, sal jy meer tyd hê om met jou kinders te gesels en dinge saam te doen. Dit kan help om goeie verhoudinge met hulle op te bou.

‘My pogings om met my kinders te sit en gesels, lei bloot tot lang stiltes’, sê jy miskien. Dit is dalk waar, maar moenie dat dit jou afskrik nie. Enkelouerraadgewers beveel aan dat jy op gevoelens in jou kinders se alledaagse gesprekke let, soos wat hulle oor hulle skoolmaats sê of wat hulle van voorneme is om te doen. Maar jy kan dit nie doen as die TV al jou aandag in beslag neem nie, of hoe? Selfs as jy dit in die agtergrond laat speel, kan dit jou aandag aflei en jou so van noodsaaklike inligting aangaande jou kinders se diepste gedagtes en gevoelens beroof. Sit dus tyd opsy vir jou kinders. Doen die huistakies saam, en gesels met hulle terwyl julle daarmee besig is—en luister wanneer hulle praat!

Lees ook saam met hulle. Navorsing toon dat daar ’n sterk verband is tussen ’n kind se geletterdheid op vyfjarige ouderdom en sy latere prestasievermoë. Dit is des te meer rede om tyd uit te koop om saam te lees. ’n Paar minute voor slaaptyd, of vroeër in die aand voordat jy te moeg is, sal tyd wees wat goed bestee word.

Wees vergenoegd met noodsaaklikhede

Baie enkelouers vind dat hulle in ’n bose finansiële kringloop vasgevang is. Hulle moet op die een of ander manier genoeg geld inbring om vir geskikte huisvesting, voedsel en klere te betaal. Maar as hulle sekulêre werk gaan doen, ontstaan die probleem van behoorlike sorg vir die kinders.

Kindersorgfasiliteite is nie altyd maklik om te vind nie en is ook nie goedkoop nie. Party enkelouers kom oor die weg deur hulle familielede se hulp te vra—grootouers, tantes en ooms. Ander maak staat op crèches, speelplekke en kindersorgfasiliteite wat deur hulle werkgewers voorsien word. Staatstoelae, indien beskikbaar, dek nie altyd die fooie wat vir hierdie kindersorg nodig is nie. In party lande is dit dalk vir enkelouers met babas moontlik om tuis te bly en te leef van die geld wat die regering voorsien in plaas van te gaan werk.

Met ’n toenemende aantal enkelouers om voor te sorg, rig die regerings op hulle beurt hulle aandag op diegene wat volgens hulle verantwoordelik is. In Brittanje het dit reeds tot streng optrede gelei teen afwesige vaders wat nie finansieel vir hulle kinders sorg nie. Kindersorgverenigings probeer die skuldige vaders opspoor om die agterstallige betalings in te vorder. Indien enkelmoeders weier om verenigings te help om die vader op te spoor, kan hulle van die finansiële voordele verbeur. “In Swede word daar geraam dat 40 persent van die pligsversuimers deur middel van plaaslike maatskaplike versekeringsagentskappe gevang word, en in Frankryk dwing die howe onderhoudsbeslissings af en sorg hulle dat pligsversuimers opgespoor word”, berig The Times van Londen.

Howe of geen howe, staatshulp of geen staatshulp, baie enkelouers vind maniere waarop hulle hulleself kan help om met minder geld as voorheen oor die weg te kom. Hoe? Deur hulle begroting te verander.

Dit is ’n kuns om ’n ander begroting te leer opstel. Dit beteken gewoonlik dat jy jou bestedingsvoorkeure moet verander—byvoorbeeld, jy moet geld opsy sit om eers vir huisvesting en verwarming te betaal, dan vir kos en dan vir die afbetaling van lenings. “As ons dus voedsel, klere en onderdak het”, het die apostel Paulus verduidelik, “sal ons met hierdie dinge tevrede wees.”—1 Timoteus 6:8.

Het jy al daaraan gedink om uitgawes met ander te deel? Jy kan geld spaar deur saam met ander ouers kos en huishoudelike ware in groot maat te koop. Hoe jy ook al begroot, onthou dat jy moet gaan sit en jou uitgawes moet bereken. (Vergelyk Lukas 14:28.) Vra jou kinders gerus om jou met die opstel van die begroting te help. Dan sal hulle dit dalk as ’n voorreg beskou om jou te help om daarby te hou. Jy sal miskien selfs vind dat dit moontlik is om spaargeld opsy te sit.

Vriende word deur vriendelikheid verwerf

“Gee altyddeur, en mense sal vir julle gee”, het Jesus gemaan. “Met die maat waarmee julle uitmeet, sal hulle weer vir julle uitmeet” (Lukas 6:38). Dieselfde geld in persoonlike verhoudinge. Jou belangstelling in ander kan ’n vriendelike reaksie tot gevolg hê. Die beste manier om eensaamheid te oorkom, is deur die inisiatief te neem en vriende te maak. Miskien kan jy betroubare vriende vind wat jou kinders sal oppas sodat jy kan gaan kuier. Nog beter, nooi gerus jou vriende om vir jou te kom kuier.

Maar ’n woordjie van waarskuwing is hier nodig. Onthou, “slegte omgang bederf nuttige gewoontes” (1 Korintiërs 15:33). Eensaamheid kan slegs bevredigend oorkom word wanneer die vriendskappe wat jy sluit waarlik opbouend is en voldoening verskaf.

Om moeder en vader te wees

Enkelouers moet beide moeder en vader vir hulle kinders wees—en dit is vir niemand ’n maklike taak nie. En moenie vergeet nie, kinders is gebore nabootsers. Hulle leer hoe om verantwoordelike volwassenes te word deur te let op wat verantwoordelike volwassenes doen. Baie hang dus af van watter soort rolmodel jy jou kinders van voorsien. The Sunday Times van Londen het berig gelewer oor die afwesigheid van vaders in die geval van baie seuns wat in die binnestad van Amerikaanse stede grootword en het gesê: “Die geweld en maatskaplike chaos . . . sê vir ons hoe ’n geslag manspersone optree wanneer ongeveer die helfte van hulle adolessensie bereik sonder ’n inhiberende besef van wat dit beteken om ’n volwasse man te wees.”

Wanneer kinders deur enkelouers grootgemaak word, kan hulle gesondheid, skoolwerk en selfs hulle ekonomiese vooruitsigte benadeel word, sê Duncan Dormor in The Relationship Revolution. Ander navorsers betwis hierdie bevindinge. Hulle blameer armoede en maatskaplike ontbering. Nietemin stem baie saam met die sosioloog Charles Murray se beoordeling: “’n Kind wat ’n moeder maar nie ’n vader het nie en wat in ’n buurt woon waar daar moeders maar nie vaders is nie, oordeel volgens wat hy sien. Jy kan maatskaplike werkers en skoolonderwysers en geestelikes instuur om vir ’n seun te sê dat hy ’n goeie vader vir sy kinders moet wees wanneer hy groot is. Maar hy weet nie wat dit beteken tensy hy dit gesien het nie.” Ja, seuns het beide ’n moeder en ’n vader nodig, en dieselfde geld vir meisies.

In Psalm 68:6 beskryf die Bybel Jehovah God as “’n vader van die wese”. Moeders wat hulle om leiding tot God wend, vind dat hy die beste voorbeeld vir hulle kinders is. Vaders wat hulle kinders alleen grootmaak, waardeer die hulp van verantwoordelike, volwasse vroue. Ja, alle enkelouers het liefdevolle ondersteuning nodig. Dit is waar jy dalk kan help.

[Venster op bladsy 6]

Vaders wat ook “moeders” is

Mans wat aan die hoof van eenouergesinne staan, is in die minderheid. Maar namate meer huwelike verbrokkel, besluit al hoe meer mans om alleen na hulle kinders om te sien. “Een van die grootste probleme waarvoor mans blykbaar in hierdie situasie te staan kom, is die tienderjarige dogter”, verduidelik The Single Parent’s Survival Guide. Sommige vaders vermy die bespreking van geslagsake omdat dit hulle verleë laat voel. Ander reël dat ’n betroubare, vroulike familielid met hulle dogters gesels. Alle enkelouers, manlik sowel as vroulik, sal grootliks daarby baat vind om die boek Vrae wat jongmense vra—Antwoorde wat werk saam met hulle kinders te lees.a Hierdie publikasie bevat dele met die titels “Seks en sedelikheid” en “Afsprake, liefde en die ander geslag”. Aan die einde van elke hoofstuk verskyn ’n gedeelte wat “Vrae vir bespreking” genoem word en wat bedoel is om ’n behoorlike hersiening van selfs die intiemste sake te verseker.

[Voetnoot]

[Prent op bladsy 7]

As jy tyd saam met jou kinders deurbring, bou dit goeie verhoudinge op

[Prent op bladsy 7]

Hoe jy ook al begroot, gaan sit en bereken jou uitgawes