Hoe kan jy enkelouers help?
ENKELOUERS, manlik of vroulik, verdien bedagsaamheid. Hedendaagse maatskaplike werkers heg groot waarde aan die ondersteuning van die eenouergesin.
“Die ondersteuning van vriende, familielede wat omgee, onderwysers wat innige en persoonlike belangstelling toon en spesiale gemeenskaps- en godsdiensbedrywighede wat beplan word met sulke gesinne in gedagte”, verduidelik sosioloë Letha en John Scanzoni, “kan ’n ontsaglike verskil maak aan die emosionele welstand van enkelouers en hulle kinders gedurende ’n tyd in hulle lewe wanneer aanmoediging besonder nodig is.” Maar hoe kan jy help?
Bied ondersteuning
Probeer eers om te verstaan hoe enkelouers dinge beskou. Stel jou in hulle plek. Ontwaak! het ’n onderhoud gevoer met Margaret, wat twee kinders het, waarvan die een 7 en die ander 14 is. Sy is vyf jaar gelede van haar man geskei, en tot dusver kom sy die mas goed op. Jy sal haar opmerkings ongetwyfeld baie insiggewend vind.
Ontwaak!: “Voor watter probleme het jy as ’n enkelouer al te staan gekom?”
Margaret: “Ek het dit in die eerste plek baie moeilik gevind om die feit te verwerk dat ek ’n enkelouer geword het, iets wat ek nie verwag het nie. Dit het my geïrriteer om as ’n ‘enkelouer’ bestempel te word, want baie mense meen dat eenouergesinne neerslagtig en droefgeestig is, en dat die kinders ’n swak reputasie het. Omdat dit nie my beskouing was nie, het ek aanvanklik geweier om raad te aanvaar. Maar ek het tot die besef gekom dat enkelouerskap nie net ’n negatiewe sy het nie.”
As jy enkelouers wil ondersteun, moet jy bewus wees van dinge waaroor hulle gevoelig is. Hou aan om goedhartigheid teenoor hulle te betoon.
Ontwaak!: “Jy ontvang geen onderhoud van jou gewese man nie. Hoe kom jy finansieel oor die weg?”
Margaret: “Ek moes baie opofferinge maak. Ek het dit altyd geniet om nuwe klere vir gesellighede te koop. Wel, ons koop nog steeds nuwe dinge, maar ons kan nie soveel soos voorheen bestee nie. Ek wil natuurlik hê dat die kinders so goed moontlik lyk; daarom moet ek noukeurig begroot. Ek het begin om elke week ’n bietjie geld te spaar deur dit aan ’n vertroude vriendin te gee om te bewaar, want ek het geweet dat ek dit dalk sou gebruik as ek dit gehou het.”
Sal jy so ’n vertroubare vriend wees wat enkelouers help om hulle middele te begroot?
Ontwaak!: “Hoe het jy eensaamheid verwerk?”
Margaret: “Ek is bedags altyd besig. Saans, wanneer die kinders bed toe is, voel ek dit die meeste. Ek bel ’n familielid of ’n vriendin. Partykeer loop die trane terwyl ek gesels. Ek praat oor wat gedurende die dag gebeur het. Dit help baie om net iemand te hê wat sal luister.”
Jy kan moontlik die inisiatief neem en iemand bel wat eensaam is. Die feit dat jy luister, kan dan groot vertroosting bied.
Ontwaak!: “Wat vind jy as enkelouer die moeilikste?”
Margaret: “Om die kinders met goeie sedelike standaarde groot te maak. Weens verslegtende maatskaplike en sedelike standaarde bevraagteken mense my begeerte om goeie waardes by my kinders in te skerp.”
Die voorbeeld wat jy stel in die handhawing van goddelike standaarde sal ander ongetwyfeld aanspoor om dieselfde te doen.
Ontwaak!: “Die grootmaak van twee kinders neem baie van jou tyd in beslag. Hoe ruim jy tyd in om te doen wat jy graag wil?”
Margaret: “Ek probeer om ’n bietjie tyd vir myself opsy te sit. Wanneer ’n vriendin byvoorbeeld vir die kinders musieklesse gee, het ek ’n uur vir myself. Ek gaan sit en skakel nie die TV aan nie. Ek sal net stilsit en nadink oor wat ek gedurende die dag gedoen het. Ek is altyd baie bewus van wat reg of verkeerd is, en daarom hou ek daarvan om na te dink oor wat ek gedoen het om te sien of ek beter kon gedoen het.”
As jy aanbied om haar kinders van tyd tot tyd op te pas, sal dit die enkelouer waardevolle oomblikke vir sulke bepeinsing gee.
Bied praktiese hulp aan
Ontwaak!: “Wat was vir jou die mees praktiese hulp?”
Margaret: “Ek geniet dit om na ’n ander gesin se huis genooi te word. Wanneer jy besef dat ander oor jou besorg is, help dit baie. Partykeer dink jy dat jy die enigste een is wat probleme het. Ook wanneer iemand my prys vir die wyse waarop ek my kinders opvoed, beteken dit werklik baie! Dan is daar die praktiese sy van sake, soos versiering, tuinwerk, inkopies. . . . O, daar is te veel vir my om op te noem!”
Wanneer daar net een ouer is, neem alles langer en lyk dinge baie moeiliker. Moet dus nie die waarde van die tyd wat jy aan hulle afstaan, onderskat nie. Vir enkelouers is dit een van die kosbaarste gawes.
[Prent op bladsy 9]
Om enkelouers waarlik van hulp te wees, moet jy tyd saam met hulle deurbring