Hoe jy vir ewig kan lewe
AANGESIEN die menseliggaam beslis die potensiaal het om baie langer te lewe as wat mense vandag lewe, stel party hulle vertroue in die wetenskap om uit te vind hoe ons vir ewig kan lewe. “Namate ons ’n vollediger kennis verkry van die chemikalieë van die liggaam en hoe hulle op mekaar reageer”, het dr. Alvin Silverstein geskryf, “sal ons die fundamentele wese van die lewe ontrafel. Ons sal verstaan . . . hoe ’n mens verouder.”
Met watter gevolg? Dit sal tot “’n nuwe era in mensegeskiedenis” lei, het Silverstein gesê. “Daar sal nie meer ‘ou’ mense wees nie, want die kennis wat daartoe sal lei dat die dood oorwin word, sal ook ewige jeug meebring.”
Sal mense dit teweegbring? “Vertrou nie op prinse, op die mensekind, by wie geen heil is nie”, spoor die Bybel ons aan. “Sy gees gaan uit, hy keer terug na sy aarde toe; op daardie dag is dit met sy planne gedaan” (Psalm 146:3, 4). Soos ons reeds gesien het, kon mense nie eers vasstel wat die inherente fout is wat tot veroudering en die dood lei nie, wat nog van dit regstel. Net ons Skepper kan dit doen.
Maar is dit werklik God se voorneme dat mense vir ewig op die aarde lewe?
God se voorneme
Waar het Jehovah God die eerste mensepaar laat lewe? Dit was in ’n aardse paradys. En hulle is die opdrag gegee om ‘vrugbaar te wees en te vermeerder en die aarde te vul en dit te onderwerp’ (Genesis 1:28). Ja, dit was God se voorneme dat die hele aarde mettertyd deur ’n regverdige mensegesin bewoon moes word wat almal in vrede en geluk saamwoon.—Jesaja 45:18.
Hoewel Adam weens sy ongehoorsaamheid ’n doodsvonnis opgelê is, het God se oorspronklike voorneme vir mense om vir ewig in die Paradys op aarde te lewe nie verander nie (Genesis 3:17-19). “Soos Ek dit gespreek het”, sê God, “sal [Ek] dit ook doen” (Jesaja 46:11; 55:11). God het getoon dat sy voorneme in verband met die aarde nie verander het nie toe hy gesê het: “Die regverdiges sal die aarde besit en vir ewig daarop woon.”—Psalm 37:29.
As ons Skepper is God daartoe in staat om die gebrek reg te stel wat veroorsaak dat mense oud word en doodgaan. Op grond waarvan doen hy dit? Aangesien daardie gebrek van die eerste mens, Adam, af oorgeërf is, het God die volmaakte lewe van sy Seun, Jesus Christus, as ’n losprysofferande voorsien “sodat elkeen wat geloof in hom beoefen, nie vernietig sal word nie maar die ewige lewe kan hê”.—Johannes 3:16; Matteus 20:28.
Jesus Christus vervang dus as ’t ware die oorspronklike Adam as ons vader, oftewel lewegewer. Dit is waarom Jesus in die Bybel “die laaste Adam” genoem word (1 Korintiërs 15:45). In plaas daarvan dat hulle dan ter dood veroordeel is as kinders van die sondaar Adam, kan gehoorsame mense waardig geag word om die ewige lewe te ontvang as kinders van hulle “Ewige Vader”, Jesus Christus.—Jesaja 9:5.
“Die Koning van die ewigheid” en “die Vader van ons Here Jesus Christus” is natuurlik Jehovah God (1 Timoteus 1:17; Openbaring 15:3; Kolossense 1:3). En tog is Jesus Christus, buiten dat hy as ons “Ewige Vader” en “Redder” voorsien is, ook die “Vredevors” (Lukas 2:11). As verteenwoordiger van sy Vader sal Christus sy vorstelike gesag uitoefen om vrede op die aarde te bewerkstellig.—Psalm 72:1-8; 110:1, 2; Hebreërs 1:3, 4.
Onder die heerskappy van Jesus Christus sal die aardse Paradys wat verloor is, herstel word. Dit sal plaasvind, het Jesus gesê, “in die herskepping, wanneer die Seun van die mens op sy heerlike troon gaan sit” (Matteus 19:28). Getroue volgelinge van Christus—altesaam 144 000—sal saam met hom oor die Paradysaarde regeer (2 Timoteus 2:11, 12; Openbaring 5:10; 14:1, 3). Miljoene sal by daardie regverdige heerskappy baat vind deur die lewe op aarde in die Paradys te geniet. Onder hulle sal die misdadiger wees wat langs Jesus gesterf het en aan wie Jesus belowe het: “Jy sal saam met my in die Paradys wees.”—Lukas 23:43.
Selfs die onregverdige dooies sal dus opgewek word en die geleentheid gegee word om aan die vereistes vir die ewige lewe op aarde te voldoen (Handelinge 24:15). Die Bybel beskryf baie mooi hoe siekte, veroudering en die dood verwyder gaan word en sê: “God self sal by hulle wees. En hy sal elke traan van hulle oë afvee, en die dood sal daar nie meer wees nie, en ook verdriet en geskreeu en pyn sal daar nie meer wees nie. Die vorige dinge het verbygegaan.”—Openbaring 21:3, 4.
Hoe om vir ewig te lewe
Jy sal gewis onder diegene wil wees wat die aarde sal besit en vir ewig daarop woon. Indien wel, moet jy aan die vereistes voldoen om vir ewig in die Paradys te lewe. In gebed tot sy hemelse Vader het Jesus Christus ’n basiese vereiste genoem en gesê: “Dít beteken die ewige lewe, dat hulle kennis inneem van u, die enigste ware God, en van die een wat u uitgestuur het, Jesus Christus.”—Johannes 17:3.
Jehovah se Getuies sal jou graag wil help om hierdie lewegewende kennis in te neem. Jy moet hulle net vra en hulle sal jou op ’n geleë tyd kosteloos besoek en met jou bespreek hoe God van voorneme is om die mensdom tot geestelike en liggaamlike volmaaktheid te verhef. Jy kan daarvan verseker wees dat ons almagtige Skepper heeltemal daartoe in staat is om die inherente fout reg te stel wat veroudering en die dood veroorsaak. Die tyd kom, en dit is naby, wanneer die lewe nie meer so kort sal wees nie. Jehovah sal sy volk seën met “die lewe tot in ewigheid”.—Psalm 133:3.
[Prent op bladsy 10]
Onder Christus se vorstelike heerskappy sal veroudering en die dood oorwin word