Ons beskou die wêreld
Huwelike geskud
Baie vrouens in die gebied van Kobe, Japan, is ontevrede oor die optrede van hulle mans gedurende en ná die aardbewing wat daardie streek vroeg in 1995 verwoes het. “Daar is nou nie net krake in ons huis nie maar ook in ons verhouding, aangesien ek nou besef dat ek my man nie kan vertrou nie”, het een vrou gesê wat in die Asahi Evening News aangehaal is. Die mans is in die moeilikheid omdat hulle ongevoelig was, omdat hulle nie vertroosting gebied het toe hulle vrouens dit nodig gehad het nie en veral omdat hulle net hulleself probeer red het. Een vrou “was geskok omdat haar man al die ryskoekies wat aan hulle uitgedeel is, geëet het sonder om iets vir haar oor te los”, berig die Hjogo-prefektuur se Sentrum vir Vroue. ’n Ander vrou het vir die sentrum gesê: “Ek het alle vertroue in my man verloor nadat hy die name van ons kinders uitgeroep het maar nie my naam genoem het nie.” Die sentrum het egter bygevoeg dat ongeveer dieselfde aantal sê dat hulle verhouding deur die aardbewing versterk is.
Van uitsterwing gered
’n “Italiaanse wonderwerk”—volgens die Milanese koerant Corriere della Sera is dit hoe party die manier beskryf waarop verskeie diersoorte van uitsterwing gered is. Diere soos herte, gemse, damherte en reë is aan die vermeerder in Italië, hoofsaaklik as gevolg van beskermde gebiede in die Alpe en die Apennyne. Die Apennynse wolf, wat besig is om grootliks toe te neem, versprei nou van Italië na die Franse See-Alpe. Maar daar is nog soorte wat in gevaar verkeer, soos die gewone otter en die monnikrob, maar deskundiges is daarvan oortuig dat ernstige bewaringsprogramme “beslis langtermyn-, werklike en positiewe resultate sal lewer”, sê die Corriere della Sera.
Die volmaakte winterjas
Wetenskaplikes wat probeer om ysbere vanuit vliegtuie op te spoor, vind dit baie moeilik—en nie net vir die ooglopende rede dat die bere wit is en in sneeuvelde woon nie. Volgens Popular Science het wetenskaplikes gedink dat hulle ’n baie slim oplossing vir daardie probleem het: hulle het gevoelige infrarooi film gebruik en gedink dat dit die liggaamshitte wat deur hierdie massiewe diere uitgestraal word maklik sou opspoor. Maar die film het skoon teruggekom! Die ysbeer se pels is blykbaar so ’n effektiewe isoleermiddel dat baie min van die dier se hitte ontsnap. Die tydskrif sê ook dat die hare van die pels blykbaar die son se ultraviolet strale baie goed kan gelei en dat dit die strale intrek in wat as ’t ware “sonkrag-selle” binne-in die beer is wat sulke lig op die een of ander manier in hitte omsit.
Bewustelose bewonderaars
Waarom word so baie bewonderaars by rockkonserte flou? ’n Neuroloog aan die Universiteitshospitaal in Berlyn, Duitsland, het onlangs daardie verskynsel ondersoek. By ’n Berlynse rockkonsert wat hoofsaaklik deur jong vroue bygewoon is, het ongeveer 400 gedurende die vertoning flou geword. Volgens die tydskrif Discover het die neuroloog gevind dat 90 persent van dié wat flou geword het in die voorste rye gestaan het. Om hierdie gesogte sitplekke te kry, het die meisies ure lank in lang toue gestaan en baie het nie kort tevore geëet of die vorige nag geslaap nie. Ander faktore—hulle eie geskreeu en die drukking van die skare agter hulle—het druk op die borskas geplaas, wat die bloeddruk verlaag het. Dít het weer die brein van sy bloedtoevoer beroof. En toe word hulle flou. Hoewel die neuroloog voorgestel het dat bewonderaars voor die tyd eet en slaap, in hulle sitplekke bly en gedurende die vertoning kalm en weg van die skare bly, het hy erken dat min van die tienderjarige bewonderaars waarskynlik daaraan gehoor gaan gee.
Gratis kinderoppassery?
Vermoeide voorstedelike ouers het ’n nuwe manier gevind om ander na hulle kinders te laat kyk sodat hulle vry kan wees om ’n bietjie inkopies te doen. Hulle los hulle kinders in ’n speelgoed- of ’n multimediarekenaarwinkel. Kinders, wat deur die hipertegnologiese toerusting gefassineer word, speel met demonstrasiemodelle totdat hulle ouers terugkeer. Dit is egter nie verbasend dat die verkoopspersoneel glad nie in hulle skik is met hierdie neiging nie, sê die tydskrif Newsweek. Hulle kla dat dit die minste is dat die kinders die demonstrasiemodelle van voornemende kopers weghou; die ergste is dat hulle dit breek. Ander het gevind dat party ouers terugkeer en kla as niemand ’n oog oor die kinders gehou het of hulle badkamer toe geneem het nie! Daarom beveg party winkels die neiging—hetsy deur die demonstrasierekenaars minder bereikbaar te maak of deur die sekuriteitswagte te roep as hulle kinders vind wat alleen is.
Duine in gevaar
“Israel se sand is besig om op te raak.” So het die tydskrif New Scientist onlangs berig. Waarom hierdie onwaarskynlike tekort? Wel, sand is ’n belangrike bestanddeel van beton, waarvoor die land se groeiende boubedryf ’n onversadigbare aanvraag het. Die afgelope 30 jaar al het ontwikkelaars dus, met baie min staatsregulering, vragte sand van Israel se groot kussandbank weggery, wat eens van Jaffa tot by Gasa gestrek het. En diewe steel elke jaar ’n miljoen ton sand om op die swartmark te verkoop. Ekoloë is bekommerd dat die kwynende, brose ekosisteem van die sandduine, waarop slegs ’n paar plant- en diersoorte kan leef, vernietig word. En ontwikkelaars begin wonder waar hulle sand gaan kry wanneer Israel se voorraad opraak.
Japannese gesondheid ly onder Westerse invloed
Die mense van Japan het die hoogste gemiddelde lewensverwagting ter wêreld, maar die invloed van Westerse lewenstyle is miskien besig om daardie status te ondermyn. New Scientist berig dat slegs 18 persent van die 2,1 miljoen mense wat in 1994 ’n volledige mediese ondersoek ondergaan het gesond verklaar is. Tien jaar vroeër was daardie syfer 30 persent. Volgens een van die skrywers van ’n verslag deur die Hospitaalvereniging van Japan is dit weens die hoë vet- en cholesterolinhoud van Westerse kossoorte tesame met ’n toename in rook en alkoholverbruik. Die grootste agteruitgang in gesondheid is in die hoogs geïndustrialiseerde streke opgemerk, soos die Osaka-Kobe-gebied. In teenstelling hiermee is die gesondste streek in die noorde, in die landelike dele van die eiland Hokkaido.
Waar die tyd heen gaan
Waar is die dag heen? Baie mense vra hierdie retoriese vraag, maar ’n onlangse studie het dit wetenskaplik probeer beantwoord. ’n Navorsingsfirma in Illinois, VSA, het ’n drie jaar lange studie van die daaglikse aktiwiteite van ongeveer 3000 mense gemaak wat gevra is om ’n lopende verslag te hou van hoe hulle hulle tyd gebruik. Die groep se ouderdomme het van 18 tot 90 gewissel en ’n groot verskeidenheid agtergronde gedek. Die vernaamste tydverbruiker was slaap. Dit is gevolg deur werk, wat gemiddeld 184 minute per dag in beslag geneem het. Die kyk van TV en video’s was volgende, met 154 minute. Huishoudelike take het 66 minute geneem, reis en pendel 51, persoonsversorging 49 en die versorging van kinders en troeteldiere 25. Ná aan die end van die lys was aanbidding, wat gemiddeld 15 minute per dag geneem het.
Meer kerke te koop
Volgens eiendomsagente vertrap beleggers mekaar om kerkgeboue wat min gebruik word in Brisbane, die hoofstad van Australië se noordelike staat Queensland, in die hande te kry. Twee faktore is glo daarvoor verantwoordelik: afnemende kerkbywoning en beleggers wat op soek is na “iets besonders” om te koop. Die koerant The Courier-Mail berig dat meer as 12 kerke op die oomblik te koop is en dat party in Brisbane reeds in huise en kantore omskep is. Die koerant haal ’n direkteur van handelsverkope aan: “’n Hele paar” van die kerke is “as restaurante, galerye, antiekwinkels, kantore of huise gebruik”. ’n Eiendomsagent het gesê: “Ek wens ek het meer van hulle gehad om te verkoop.”
Deur en deur verwêreldlik
Die Duitse staat Beiere is streng Rooms-Katoliek. Trouens, volgens Beierse skoolregulasies is dit verpligtend dat daar in elke klaskamer van alle staatskole ’n kruisbeeld moet wees. Maar die Federale Grondwetlike Hof het hierdie regulasie nou ongeldig verklaar omdat dit nie in harmonie met die Grondwet van Duitsland is nie, wat godsdiensvryheid waarborg, berig Süddeutsche Zeitung, ’n Duitse koerant. Volgens die Westfälische Allgemeine Zeitung het aartsbiskop Meisner van Keulen dit ’n “swart dag in die geskiedenis van ons volk” genoem. Party is meer verbaas oor die twispunt as oor die besluit self. Die Duitse gemeenskap is per slot van rekening “deur en deur verwêreldlik”, skryf die Hamburgse koerant Die Zeit, en “bring hulde aan materialisme, die verbruikerswese en suiwer selfverwesenliking”.