Daardie verpestelike vlieë—Nuttiger as wat jy dink?
DIE meeste van ons beskou vlieë óf as ’n ergernis óf as ’n gevaar vir die samelewing. Maar bioloë ontdek nou dat vlieë nuttiger is as wat ons miskien dink, ongeag hoe lastig hulle dalk is.
Baie soorte gebruik ’n groot deel van die dag om blomme te besoek, kitskoswinkels wat nektar en stuifmeel vir hulle insekklante aanbied. Party vlieë wat die voedingstowwe uit stuifmeel kan verwyder—op sigself nogal ’n prestasie—maak staat op hierdie hoë-energievoedsel om hulle eiers te ontwikkel.
Terwyl hulle die een blom ná die ander besoek, is dit onvermydelik dat die vlieë klewerige stuifmeelkorrels aan hulle lyf kry. Een vlieg wat versigtig deur bioloë ondersoek is, het 1200 stuifmeelkorrels aan sy lyf gehad! Namate meer navorsing gedoen is oor die rol wat vlieë in bestuiwing speel, het wetenskaplikes ontdek dat sommige blomme op hulle staatmaak vir hulle voortbestaan.
Die tydskrif Natural History beskryf ’n reeks eksperimente wat in Colorado, Noord-Amerika, uitgevoer is. Huisvlieë is met helder kleure gemerk sodat hulle maklik gevolg kon word. Nadat die navorsers die vlieë se daaglikse bedrywighede gemonitor het, was hulle verbaas om uit te vind dat die vlieë vir sommige veldblomme belangriker bestuiwers was as bye en dat hulle ’n baie groter gebied gedek het as bye.
Hoe belangrik is die vlieë se werk? Party blomme is met ’n net bedek sodat hulle nie besoek kon word nie. Hierdie blomme het geen saad voortgebring nie—in skerp teenstelling met die vrugbares daar naby wat deur vlieë bestuif is. Hoewel sommige blomme hoofsaaklik deur bye bestuif is, het vlieë in die geval van ander blomsoorte soos die wildevlas of wildemalva by sommige hoogtes bo seespieël meer as 90 persent van hierdie werk gedoen.
Tot watter gevolgtrekking het Carol Kearns en David Inouye, twee van die navorsers, gekom? “Vir baie veldblomme in die Rotsgebergte in Colorado het vlieë dus bye, skoenlappers en kolibries oorskadu . . . Sonder hierdie insekte, wat vir die meeste mense effens afstootlik is, sou baie van die veldblomme wat ’n besoek aan ’n grasveld teen ’n berghang so genotvol maak nooit saadskiet nie.” Dit ly geen twyfel nie, vlieë is nuttig!