Die volmaakte oplossing word gevind

GOD SE WOORD, die Bybel, praat van ’n tyd wanneer God se hemelse regering al die mensdom se probleme sal oplos, wat nou die probleem van besoedeling deur motors insluit. Sal hierdie Messiaanse Koninkryk, waarvoor baie mense geleer is om te bid, die volmaakte oplossing voorsien deur ’n motor voort te bring wat heeltemal niebesoedelend is? Of sal die volmaakte oplossing bereik word deur van al die motors op die aarde ontslae te raak? Aangesien die Bybel geen presiese antwoord gee nie, kan ons maar net kyk wat gebeur.—Matteus 6:9, 10.

Maar hiervan kan ons wel seker wees: God se regering sal nie toelaat dat die prag van die skepping in die herstelde Paradys wat deur die Koninkryk tot stand gebring gaan word deur besoedeling ontsier word nie.—Jesaja 35:1, 2, 7; 65:17-25.

Hoe moet diegene wat aan God se Woord gehoorsaam is vandag oor die gebruik van motors voel, aangesien hulle nou reeds opgelei word vir lewe in ’n nuwe wêreld sonder besoedeling? Die Ontwaak! van 22 Junie 1987 het gehandel oor die onderwerp “Wat gebeur met ons woude?” Dit het gesê dat sommige wetenskaplikes dink dat daar ’n verband is tussen die lugbesoedelstowwe in motoruitlaatgasse en sterwende woude. Dit het een besorgde leser aan die Wagtoringgenootskap laat skryf om te vra of dit in die lig hiervan vir Christene reg sal wees om motors te bestuur. Hy het gewonder of hy oneerbiedig teenoor Jehovah se skepping sou wees as hy dit doen.

Sy brief is deels soos volg beantwoord: “Jehovah se Getuies gehoorsaam getrou die omgewingsregulasies wat deur staatsdepartemente ingestel is om besoedeling te verminder (Romeine 13:1, 7; Titus 3:1). Dit hang van die individu af of hy meer wil doen as wat die regering vereis. As iemand besluit om nie meer ’n motor te gebruik nie, is dit ’n persoonlike saak. Die artikel in die Ontwaak! het egter getoon hoe sommige mense voel deur op bladsy 8 te sê: ‘Baie mense doen daadwerklike stappe om lugbesoedeling sover dit redelik moontlik is te verminder. Hulle ry stadiger, reis minder, sluit by saamryklubs aan, gebruik ongelode brandstof en gehoorsaam antibesoedelingsregulasies wat die regering ingestel het.’”

Christelike balans

Hierdie antwoord het Christelike balans geopenbaar. Ons moet onthou dat dit nie net motors is wat besoedeling veroorsaak nie. Vliegtuie en treine—trouens, die meeste vorme van moderne vervoer—doen dit. Maar hierdie vorme van vervoer is nie ontwerp met die uitsluitlike doel om besoedeling te veroorsaak nie. Die gevolglike besoedeling is ’n newe-effek, wat betreurenswaardig is maar deur beperkte kennis en onvolmaakte gesindhede veroorsaak word.

Die Wagtoring van 1 Januarie 1993, bladsy 31, het hierdie saak bespreek en gesê: “As Getuies van Jehovah is ons diep besorg oor die talle ekologiese probleme wat tans ons aardse tuiste teister. Ons besef, meer as die meeste mense, dat die aarde geskep was om ’n skoon, heilsame tuiste vir ’n volmaakte mensegesin te wees (Genesis 1:31; 2:15-17; Jesaja 45:18). . . . Dit is dus reg om gebalanseerde, redelike pogings aan te wend sodat ons nie onnodig tot die mens se voortgesette verderwing van ons aardbol bydra nie. Let egter op die woord ‘redelike’. . . . God se volk moet nie onbewus van ekologiese sake wees nie. Jehovah het van sy eertydse volk verwag om stappe te doen om van afval ontslae te raak, stappe wat van ekologiese asook sanitêre belang was (Deuteronomium 23:9-14). En aangesien ons weet wat sy beskouing is van diegene wat die aarde verderf, moet ons beslis nie dinge ignoreer wat ons kan doen om die omgewing skoon te hou nie. . . . Hoe ver ’n Christen dit sal voer, is egter ’n persoonlike saak, tensy die wet dit vereis. . . . Onvolmaakte mense [raak] maklik in ekstremisme verstrik. . . . Die mensdom se pogings om van die aarde se vernaamste ekologiese probleme, onder andere besoedeling, ontslae te raak [sal] nie ten volle . . . slaag nie. Daar is dalk hier en daar ’n bietjie vooruitgang, maar die enigste blywende oplossing vereis dat God ingryp. Daarom gebruik ons ons kragte en middele eerder om die aandag op die Goddelike oplossing te vestig as om oppervlakkige simptome te probeer verlig.”

Christene handhaaf balans wat die nakoming van Bybelbeginsels betref en hou die Goddelike opdrag in gedagte wat hulle ontvang het om die boodskap van God se Koninkryk in die hele wêreld te verkondig (Matteus 24:14). Niks is belangriker of dringender nie! As die moderne vorme van vervoer en kommunikasie Christene kan help om hierdie verpligting na te kom, het hulle alle rede om dit te gebruik. Terselfdertyd vermy hulle oormatige of opsetlike besoedeling. Sodoende behou hulle ’n skoon gewete voor mense en voor God.

Hoewel ons dus nie eintlik vandag weet hoe die probleem van besoedeling en die motor uiteindelik opgelos sal word nie, weet ons dat dit wel sal gebeur. Om die waarheid te sê, die volmaakte oplossing is net om die draai.

[Venster op bladsy 9]

Hoe om besoedeling te bekamp

• Loop of ry fiets wanneer dit moontlik is

• Sluit by saamryklubs aan

• Laat motorvoertuie gereeld versien

• Wees bewus van skoon brandstof

• Moenie onnodig reis nie

• Bestuur teen ’n matige maar konstante spoed

• Gebruik openbare vervoer wanneer dit moontlik en prakties is

• Skakel die enjin eerder af as om dit te laat luier wanneer jy ’n tyd lank stilstaan