’n Ongelooflike ontmoeting

“DIE opwindendste ding wat ek nog ooit in my lewe gedoen het!” Dit is hoe Kristie haar ongelooflike ontmoeting beskryf het. Is dit hoe jy sou gevoel het as jy saam met dolfyne in die Golf van Mexiko kon swem?

Dit is vir almal opwindend om dolfyne te sien swem of toertjies in die water doen, soos om op hulle stert agteruit te loop, tot verbasende hoogtes uit die water te spring of mense toe te laat om op hulle te ry. Net om na hierdie vertonings te kyk, kan jou lus laat voel om in die water te klim en met daardie dolfyne te speel.

Kristie het nog altyd so gevoel. Toe, terwyl sy eendag op die Golf van Mexiko geroei en daarin geswem het, het ’n kop skielik voor haar uit die water opgekom. Ná ’n rukkie het dit geblyk dat drie nuuskierige dolfyne gedink het dat hulle ’n speelmaat gevind het. Kristie was aanvanklik ’n bietjie skrikkerig, maar daarna het haar vrees in opgewondenheid verander toe sy met die dolfyne begin speel het. Sy het hulle in beheer van die situasie gelaat en ontspanne gewag om te sien wat hulle volgende sou doen.

Kristie het gesê: “’n Dolfyn het eenvoudig voor my uit die water opgekom—en ons het na mekaar gekyk. Ek het hom begin streel en met hom gesels—net soos ek met my hond sou doen.”

Dolfyne is as gevolg van hulle intelligensie gewilde vermakers, en die meeste afrigters sê dat dolfyne, weens hulle vriendelikheid teenoor mense, nie altyd met kos omgekoop hoef te word om hulle toertjies te doen nie.

Toe Liz Morris, ’n dierekenner by Sea World in Florida, VSA, gevra is wat sy die meeste omtrent haar werk met dolfyne geniet, het sy gesê: “Ek dink dis hulle geaardheid. Omdat hulle van nature so spelerig en nuuskierig is, kan jy werklik ’n verhouding met hulle opbou . . . Hulle reageer baie goed op aanraking en liefde.” In God se beloofde nuwe stelsel van dinge sal ons almal in staat wees om talle ongelooflike ontmoetings, soos Kristie s’n, te ervaar.