Van ons lesers

Werksveiligheid Dankie vir die voorbladartikels “Hoe veilig is jy by die werk?” (22 Februarie 2002). Net ’n dag voordat ek hierdie artikels gelees het, het ’n baie gespanne situasie by die werk ontstaan. Ek dink dat ’n sagte antwoord, soos julle tydskrif voorgestel het, die beste raad is. Die inligting oor die gevare daarvan om soggens vroeg en saans laat te werk, was ook gepas. Net nou die dag is druk op my uitgeoefen om hierdie soort werk te aanvaar, maar ek het dit van die hand gewys. Toe ek die tydskrif lees, was ek baie bly dat ek dit gedoen het!

M. H., Japan

Jongmense vra Ek het so pas die artikel “Jongmense vra . . . Sê nou ek ontmoet een van my skoolmaats?” (22 Februarie 2002) gelees. As ’n hoërskoolleerling en ’n voltydse evangeliedienaar het ek al dikwels soos Simon gevoel, wat in die artikel aangehaal word. Ook ek het gehoop dat ek nie van my skoolmaats in die bediening sou teëkom nie. Hierdie uitstekende artikel was ’n herinnering van Jehovah af. Ek dank hom daarvoor.

S. S., Verenigde State

Ek is 14 jaar oud, en ek was bang dat ek van my skoolmaats sou ontmoet in die gebied waar ek getuig. Dit vertroos my om te weet dat Jehovah my help terwyl ek deurklokkies lui. Die artikel het my versterk.

M. L., Italië

Kougomkouery Dankie vir die artikel “Kougomkouery—’n hedendaagse dog ou gewoonte” (22 Februarie 2002). Ek hou daarvan om kougom te kou, maar byna elke keer as ek dit kou, sluk ek dit per ongeluk in. Hierdie artikel het my gewaarsku om nie die kougom in te sluk nie. Ek sal julle raad volg!

K. B., Thailand

Masai Baie dankie vir die artikel “Die Masai—’n unieke en kleurvolle volk” (22 Februarie 2002). Ek het van kleins af ’n verlange gehad om Kenia te besoek, en ek voel nog dieselfde. Hoewel ek baie navorsing oor die gewoontes en tradisies van die Masai gedoen het, het ek nie besef dat daar Jehovah se Getuies onder hulle is nie. Ek is nou ’n voltydse evangeliedienaar, en ek hoop om eendag ’n streekbyeenkoms in Kenia by te woon. Hou asseblief aan om inligting oor Afrika te druk.

Y. H., Japan

Dolfyne Ek is 14 jaar oud, en ek wil baie dankie sê vir die artikel “Op soek na dolfyne in Nieu-Seeland” (8 Januarie 2002). Hierdie artikel het my diep geraak. Die inligting was uitstekend en toon hoe ontsagwekkend Jehovah se krag is dat hy sulke wonderlike, intelligente diere kon skep. Aangesien dolfyne my gunstelingdier is, sien ek uit na die tyd wanneer ek hulle in God se nuwe wêreld beter sal kan leer ken.

A. C., Australië

Ek is 15 jaar oud, en ek is baie lief vir diere. Ek stel veral belang in dolfyne, wat so sierlik swem. Nadat ek hierdie artikel gelees het, was ek dankbaar teenoor Jehovah God. Ek wil sorg vir die natuur en die diere wat hy geskep het.

A. N., Japan

Redakteurs se antwoorde Ek moet julle prys vir julle antwoorde op briewe wat van tyd tot tyd in “Van ons lesers” verskyn. Die redakteur van ons plaaslike koerant is bekend vir sy skerp, onbeskofte en sarkastiese aanmerkings teenoor mense wat aan hom skryf, selfs wanneer die koerant verkeerd is. Dit is mooi om die antwoorde van die redakteurs van die Ontwaak! te sien, wat ’n gebalanseerde trots op die tydskrif en bedagsaamheid teenoor die leser weerspieël.

K. W., Verenigde State