Ons liefde vir tuine
VERWELKOM jy die rustigheid van ’n pragtige tuin as ’n plek om weg te kom van die geraas en die gejaagdheid van die lewe? Verkies jy stil parke met hulle grasperke, blomme, koeltebome en dammetjies as die plek vir ’n piekniek saam met jou gesin of vir ’n wandeling met ’n vriend? Ja, hoe kalmerend, verkwikkend, vreedsaam en selfs genesend is tuine tog!
Hoewel party dalk tuinwerk sal probeer vermy, miskien weens ’n gebrek aan tyd, verlustig ons ons almal in die tuin se kleure, geure, geluide en vrugte. Thomas Jefferson—’n argitek, wetenskaplike, regsgeleerde, uitvinder en Amerikaanse president— was lief vir die tuin. Hy het geskryf: “Geen bedrywigheid is vir my so genotvol soos om die aarde te bewerk nie. . . . Ek is steeds toegewyd aan die tuin. Maar al is ek ’n ou man, is ek maar ’n jong tuinier.”
Baie mense deel sy beskouing. Miljoene besoekers stroom jaarliks na welbekende tuine van die wêreld—Kew-tuin (die Koninklike Botaniese Tuin), in Engeland; die tuine in Kioto, Japan; die tuine van die Paleis van Versailles, in Frankryk; Longwood-tuin, in Pennsilvanië, VSA, om maar ’n paar te noem. Baie lande het ook stadsgebiede waar die huise tussen lanings versteek is en deur struike, bome en ’n kleureprag van blomme omring word—soos ’n klein paradys.
Tuine kan gesondheid bevorder
Daar is al opgemerk dat mense wat kontak met die natuur behou beter gesondheid kan geniet, al behels die kontak niks meer as om deur ’n venster na blomme, bome, struike en voëls te kyk nie. Dit het daartoe gelei dat ’n hospitaal in New York-stad ’n tuin op sy dak aangelê het. Dit is “met groot entoesiasme verwelkom”, het ’n hospitaalbeampte gesê. “Dit het die moraal van pasiënte sowel as personeellede verhoog. . . . Ons sien dat dit baie geneeskundige moontlikhede het.” Trouens, studies toon dat mense liggaamlik, verstandelik en emosioneel daarby baat kan vind as hulle hulle sinne deur die natuur laat streel.
Bowendien sal iemand wat geestelikgesind is moontlik nader aan God voel wanneer hy tussen Sy handewerk is. Hierdie aspek van die tuin kan teruggevoer word na die heel eerste tuin op aarde, die tuin van Eden, waar God in die begin met die mens gekommunikeer het.—Genesis 2:15-17; 3:8.
Die liefde vir tuine is universeel. En dit is, soos ons sal sien, betekenisvol. Maar voordat ons daardie kenmerk bespreek, nooi ons jou om deur ’n paar van die tuine in die geskiedenis te “wandel” om te sien hoe diep in die harte van alle mense die hunkering na ’n paradys werklik is.