Kos uit jou eie tuin

DEUR ONTWAAK!-MEDEWERKER IN DIE SENTRAAL-AFRIKAANSE REPUBLIEK

IN BAIE lande bekommer mense hulle elke dag oor hoe hulle hulle gesin van kos gaan voorsien. Omdat groente so duur is, is dít dikwels ’n groot uitdaging. Maar party het ’n betreklik eenvoudige oplossing gevind—hulle kweek hulle eie kos!

Jy sal moontlik self ’n tuintjie wil aanplant. Daar is dalk nie baie grond om jou huis nie, maar miskien kan jy reël om ’n stukkie grond in die omgewing te bewerk. Dink aan al die geld wat jy kan spaar deur smaaklike en gesonde kos te kweek! Tuinmaak kan selfs ’n manier wees om ’n bietjie nodige oefening te kry. ’n Tuin kan ook ’n gesinsprojek wees wat jou kinders sal geniet. Om die waarheid te sê, dit is leersaam om ’n groentetuin aan te plant. Dit leer ’n mens eienskappe soos geduld (Jakobus 5:7). En as jy sien hoe die plantjies groei, kan dit jou nader aan die Skepper van alle goeie dinge laat kom.—Psalm 104:14.

Moet nou nie dink dat dit geen inspanning sal verg om jou eie kos te kweek of dat jy sommer oornag resultate sal kry nie. Maar met vasbeslotenheid en ’n bietjie kundigheid kan jy welslae behaal!

’n Gesin bied die uitdaging die hoof

Neem die voorbeeld van Timothée en Lucie—’n Christenegpaar met twee kinders wat in Bangui, die hoofstad van die Sentraal-Afrikaanse Republiek, woon. Hulle het hulle eie tuin aangeplant en gevind dat dit ’n praktiese en aangename manier is om hulle beskeie inkomste aan te vul.

Toe Lucie 13 jaar oud was, het sy ’n tuintjie langs hulle huis gehad, waarin sy ná skool en oor naweke gewerk het. Sy het dit geniet om te sien hoe die plantjies groei. Maar sy het eers jare later daaraan gedink om ’n tuin vir haar gesin aan te plant. Sy het gereël om ’n nabygeleë veld te bewerk wat eintlik as ’n vullishoop gedien het. Lucie het gesien watter moontlikhede dit bied. Die vullis wat oor die jare heen op die stuk grond verrot het, het dit nie bederf nie, maar het eerder die grond geskik gemaak om kos in te kweek. Lucie en Timothée het besluit om daardie stuk grond in ’n welige tuin te omskep.

Hoe om te begin

Voordat hulle begin het, moes hulle egter eers ’n bietjie navorsing doen. Hulle het met ander gesels wat weet hoe om groente te kweek, en hulle het mooi geluister. Aangesien die stuk grond natgelei moes word, het hulle selfs geleer hoe om hulle eie put te grawe. Dit het hulle ook gehelp om boeke oor tuinmaak te lees.

Hulle het oor die wisselwerking tussen plante gelees en uitgevind dat party plante mekaar help om te floreer. Maar sommige plante belemmer in werklikheid mekaar se groei. Party mense sê dat wortels en tamaties ideale maats in ’n groentetuin is. Dit is ook vir seldery en blomkool voordelig om bymekaar geplant te word. En dille is “vriende” met ertjies, komkommers, blaarslaai en uie. Maar groenslaai en pietersielie vaar nie goed saam nie. Uie is nie goed vir groenboontjies en ertjies nie. As plante skadelik vir mekaar is, verswak hulle en word hulle ’n maklike teiken vir plae en skadelike insekte.

Timothée en Lucie het ook uitgevind dat dit onverstandig is om net een plantgewas op ’n stuk grond te kweek. As insekte dit aanval of ’n siekte dit tref, kan hulle alles verloor. Hulle het hierdie gevaar verminder deur ’n goed gekose verskeidenheid plante te plant. Kruie en blomme het kleur, lewe en prag aan hulle groentetuin gegee en bye en ander nuttige insekte gelok wat help om tuine gesond te hou.

Hierdie egpaar het ook uitgevind wat hulle moet doen sodat hulle nie hulle gewasse met gif hoef te bespuit nie. Hulle het uitgevind dat ’n mens van sekere plae in ’n tuin ontslae kan raak deur eenvoudig knoffel te plant.a

Dit het baie harde werk en geduld geverg, maar vandag het Timothée en Lucie ’n welige tuin. Dit voorsien hulle van kool, pietersielie, tamaties, wortels, komkommers en eiervrugte—soms meer as wat die gesin kan eet!

Plant jou eie tuin aan!

Maar dit is nie net in Afrika waar mense uitgevind het dat dit prakties is om hulle eie tuin te hê nie. In Duitsland is daar byvoorbeeld meer as ’n miljoen stedelike gemeenskapstuintjies. Die gemeenskapstuintjies, wat soms Schrebergaerten (na die Duitse geneesheer Daniel Schreber) genoem word, is ’n aantal aangrensende lappies grond (tussen 200 en 400 vierkante meter) wat aan stadsbewoners verhuur word. ’n Navorser sê dat hierdie tuintjies “’n belangrike rol in die verbouing van vars vrugte en groente speel”. En vir die tuiniers is die tuine ’n stukkie “paradys”—’n plek om te werk en te ontspan.

Die Bybel belowe dat die hele aarde binnekort ’n tuin sal wees—’n ware paradys (Lukas 23:43). Maar intussen kan jy miskien ’n lappie grond vind en vreugde daaruit put om kos uit jou eie tuin te kry.

[Voetnoot]

[Prent op bladsy 24]

Timothée en Lucie skep water vir hulle gesinstuin

[Prent op bladsy 24]

’n Gemeenskapstuintjie in München, Duitsland