Die aarde se eindelose verskeidenheid—Hoe het dit hier gekom?
VAN die meer as 1,5 miljoen diersoorte waarvoor wetenskaplikes al tot dusver name gegee het, is sowat eenmiljoen insekte. ’n Lys van al die bekende insekte sou ’n ensiklopedie van meer as 6000 bladsye beslaan! Hoe het hierdie diere ontstaan? Waarom is daar so ’n eindelose verskeidenheid? Is dit die gevolg van blinde toeval, van die natuur wat miljoene kere ’n “gelukslag” gekry het? Of is dit deur ontwerp?
Laat ons kortliks kyk na ’n paar van die ander soorte lewende dinge wat op ons planeet is.
Verstommende voëls
Wat van die meer as 9000 verskillende soorte wonderlik ontwerpte voëls? Sommige kolibries is so klein soos groot bye, tog vlieg hulle met groter vernuf en grasie as die modernste helikopter. Ander voëls migreer elke jaar duisende kilometers ver, soos die seeswael wat op elke reis heen en terug tot 35 000 kilometer vlieg. Hy het nie ’n rekenaar of navigasie-instrumente nie, tog bereik hy sy bestemming sonder enige afwyking. Bestaan hierdie ingeskape vermoë toevallig of is dit so ontwerp?
’n Fassinerende verskeidenheid plante
Daarbenewens is daar die ontsaglike verskeidenheid en prag van die plantegroei—meer as 350 000 plantsoorte. Ongeveer 250-000 van hulle dra blomme! Die grootste lewende dinge op aarde—die reuse-sequoiabome—is plante.
Hoeveel verskillende blomme groei in jou tuin of in jou omgewing? Die prag, die simmetrie en dikwels die geur van hierdie blomme—van die kleinste woestynblommetjie, madeliefie of botterblom tot die ingewikkelde orgideësoorte—verbaas ’n mens. Weer vra ons: Hoe het hulle ontstaan? Per toeval of deur ontwerp?
Oseane wat wemel van lewe
En wat van die lewensvorme wat in die riviere, mere en oseane van die wêreld aangetref word? Wetenskaplikes sê dat daar ongeveer 8400 bekende soorte varswatervisse en ongeveer 13 300 soorte seevisse is. Die kleinste soort is die dikkop wat in die Indiese Oseaan aangetref word. Hy is net ongeveer een sentimeter lank. Die grootste vis is die walvishaai, wat tot 18 meter lank kan word. Hierdie syfers vir spesies sluit nie die ongewerwelde diere (sonder ’n ruggraat) of soorte wat nog ontdek moet word in nie!
Die ongelooflike brein
Die mensebrein—wat ten minste tienmiljard neurone bevat, wat elkeen moontlik meer as 1000 sinapse, of kontakpunte met ander senuselle het—is veral ongelooflik. Die neuroloog dr. Richard Restak sê: “Die totale aantal verbindings in die ontsaglike netwerk van die brein se neuroniese stelsel is waarlik astronomies” (The Brain). Hy voeg by: “Daar kan tussen tienbiljoen en eenhonderdbiljoen sinapse in die brein wees.” Dan vra hy ’n gepaste vraag: “Hoe kan ’n orgaan soos die brein, wat tussen tienmiljard en eenhonderdmiljard selle bevat, ooit uit ’n enkele sel, die eier, ontwikkel?” Is die brein die gevolg van onpersoonlike ongelukke en gelukskote van die natuur? Of steek daar intelligente ontwerp agter dit alles?
Ja, hoe het die skynbaar eindelose verskeidenheid van lewe en ontwerp ontstaan? Is jy geleer dat dit eenvoudig toevallig was, ’n geval van leer en fouteer, dat dit aan die geluk van ’n lukrake blinde evolusielotery oorgelaat is? Lees dan gerus verder om te sien watter vrae wetenskaplikes, in alle eerlikheid, vra oor die evolusieteorie, wat al die grondslag van alle biologiese wetenskap genoem is.
[Diagram op bladsy 4]
As ’n eenvoudige kamera ’n ontwerper moet hê, wat dan van die veel ingewikkelder menslike oog?
Lensarea
(Vergroot)
Watervog
Pupil
Kornea
Lens
Iris
Siliêre liggaam
Volledige oog
Optiese senu
Glasvog
Retina
Choroïed
Sklera