Jongmense vra . . .

Hoe kan ek met my siekte saamleef?

JASON was net 18, maar dit het gelyk of al sy doelwitte in die lewe nou onbereikbaar was. Hy het gehoop om as ’n voltydse Christenbedienaar te dien, maar toe vind hy uit dat hy Crohn se siekte het—’n pynlike en slepende ingewandsiekte. Maar vandag bied Jason sy omstandighede suksesvol die hoof.

Miskien ly jy ook aan ’n ernstige siekte. In ’n vorige nommer het die Ontwaak! die uitdagings bespreek waarvoor jongmense soos jy te staan kom.a Kom ons kyk nou hoe jy jou situasie suksesvol kan hanteer.

’n Positiewe geestesgesindheid

Om enige siekte suksesvol die hoof te bied, moet ’n mens ’n positiewe geestesgesindheid hê. Die Bybel sê: “Die gees van ’n man ondersteun hom in sy krankheid; maar ’n verslae gees—wie kan dit opbeur?” (Spreuke 18:14). Somber, pessimistiese gedagtes en gevoelens vertraag die genesingsproses. Jason het gevind dat dit so is.

Aanvanklik moes Jason negatiewe gevoelens, soos woede, oorkom wat hom terneergedruk gemaak het. Wat het gehelp? Hy verduidelik: “Die artikels in Die Wagtoring en Ontwaak! oor depressie het my werklik gehelp om ’n positiewe gesindheid te behou. Nou probeer ek net van dag tot dag lewe.”b

Die 17-jarige Carmen het ook geleer om ’n positiewe gesindheid te behou. Hoewel sy aan sekelsel-anemie ly, tel sy haar seëninge. “Ek dink aan ander wat slegter af is as ek en nie die dinge kan doen wat ek kan doen nie”, sê sy. “En ek voel dankbaar en nie so jammer vir myself nie.”

Spreuke 17:22 sê: “’n Vrolike hart bevorder die genesing.” Sommige meen dalk dat dit ongepas is om te lag in ’n geval van ernstige siekte. Maar goedige humor en aangename geselskap verfris jou verstand en vergroot jou lewenslus. Trouens, vreugde is ’n Goddelike eienskap, een van die vrugte van God se gees (Galasiërs 5:22). Daardie gees kan jou help om vreugde te ervaar al stry jy teen ’n siekte.—Psalm 41:4.

Vind ’n dokter wat begrip toon

Dit is baie nuttig om ’n dokter te hê wat jongmense verstaan. ’n Jongmens se verstandelike en emosionele behoeftes verskil gewoonlik van ’n volwassene s’n. Ashley was maar tien toe sy hospitaal toe moes gaan om behandeling te ontvang vir ’n kwaadaardige breingewas. Ashley se dokter het medelye getoon en het woorde gebruik wat sy kon verstaan. Hy het haar vertel hoe sy eie siekte as kind hom beweeg het om ’n dokter te word. Hy het sagkens maar duidelik die voorgestelde behandeling aan haar verduidelik, sodat sy geweet het wat om te verwag.

Jy en jou ouers moet mediese personeel vind wat jou respekteer en jou behoeftes verstaan. As jy om die een of ander rede nie redelik gelukkig voel met die versorging wat jy ontvang nie, moet jy gerus jou kommer met jou ouers bespreek.

Veg vir jou gesondheid!

Dit is ook noodsaaklik dat jy op elke moontlike manier teen jou siekte stry. Leer byvoorbeeld soveel as wat jy kan omtrent jou toestand. “’n Man van kennis ontwikkel krag”, sê ’n Bybelspreuk (Spreuke 24:5). Kennis verdryf die vrees vir die onbekende.

Daarbenewens kan ’n ingeligte jongmens meer betrokke wees by sy behandeling en is hy in ’n beter posisie om daarmee saam te werk. Hy kan byvoorbeeld leer dat hy nie voorgeskrewe medikasie sonder sy dokter se toestemming moet staak nie. Carmen, wat hierbo gemeld is, sowel as haar ouers, het boeke oor sekelsel-anemie gelees. Wat hulle geleer het, het hulle gehelp om mediese behandeling te verkry waarby Carmen die meeste sou baat vind.

Vra jou dokter spesifieke vrae—meer as een keer indien nodig—as jy nie seker is oor iets nie. Pleks van te sê wat jy dink die dokter wil hoor, moet jy eerlik verduidelik wat jy dink en voel. Soos die Bybel sê, ‘misluk planne sonder beraadslaging’.—Spreuke 15:22.

Daar was ’n tyd toe dit nie juis gelyk het of Ashley oor haar siekte wou praat nie. Sy het slegs met haar ma daaroor gepraat. ’n Ervare maatskaplike werkster het haar privaat gevra: “Voel jy miskien dat jy nie alles vertel word nie?” Ashley het erken dat dit die geval is. Die vrou het dus vir Ashley haar mediese verslae gewys en dit aan haar verduidelik. Sy het ook die dokters gevra om meer dikwels direk met Ashley te praat as om net óór haar te praat. Omdat Ashley uiteindelik gesê het wat sy dink, kon sy die hulp kry wat sy nodig gehad het.

Ondersteuning van diegene om jou

Wanneer enige gesinslid ernstig siek is, word dit ’n gesinsaangeleentheid wat samewerking verg. Ashley se gesin en die Christengemeente het haar onderskraag. Die gemeente is van tyd tot tyd daaraan herinner dat sy in die hospitaal is. Gemeentelede het haar gereeld besoek, en hulle het die gesin met huiswerk en die voorbereiding van maaltye gehelp totdat die gesin weer in ’n roetine kon kom. Kinders in die gemeente het Ashley in die hospitaal besoek wanneer sy nie te siek was om besoekers te ontvang nie. Dit was nie net goed vir Ashley nie, maar ook vir haar jong vriende.

Maar voordat ander jou kan help, moet hulle weet dat jy hulp nodig het. Carmen maak op haar ouers en die gemeentelike ouer manne staat vir emosionele en geestelike ondersteuning. Sy reken ook op haar skoolmaats wat haar Christelike opvattings deel om ondersteunend te wees. “Hulle hou ’n ogie oor my”, sê Carmen, “en ek voel dat mense vir my omgee.”

Jou skool kan jou moontlik nuttige mediese en finansiële raad gee en bied dalk selfs persoonlike ondersteuning. Ashley se onderwyseres het byvoorbeeld haar klas aangespoor om aan Ashley te skryf en haar te besoek. As jou onderwysers nie jou probleme verstaan nie, sal dit dalk vir jou ouers nodig wees om jou situasie respekvol met die skoolowerheid te bespreek.

Gebruik jou verstand en liggaam verstandig

Wanneer jy baie siek is, sal jy dalk niks anders kan doen as om al jou krag te gebruik om aan te sterk nie. As jy nie heeltemal kragteloos is nie, is daar baie opbouende dinge wat jy kan doen. Die skryfster Jill Krementz het die volgende gesê aangaande wat sy opgemerk het terwyl sy navorsing gedoen het vir haar boek How It Feels to Fight for Your Life: “Dit het my hartseer gemaak om twee jaar lank deur hospitaalgange te loop en soveel kinders te sien wat na ’n TV staar. Ons moet hierdie kinders aanmoedig om meer te lees. ’n Hospitaalbed is ’n uitstekende plek om ’n mens se brein te oefen.”

Hetsy jy tuis of in die hospitaal is, dit kan jou dikwels help om beter te voel as jy jou verstandelike vermoëns oefen. Het jy al probeer om briewe of gedigte te skryf? Om te teken of te skilder? Miskien kan jy leer om ’n musiekinstrument te bespeel as jou toestand dit toelaat. Selfs met gesondheidsbeperkings is daar baie moontlikhede. Die beste ding wat jy kan doen, is ongetwyfeld om die gewoonte aan te leer om tot God te bid en sy Woord, die Bybel, te lees.—Psalm 63:7.

As jou toestand dit toelaat, kan gepaste fisiese aktiwiteit jou ook help om beter te voel. Mediese fasiliteite het dikwels om hierdie rede fisioterapie-programme vir jong pasiënte. In baie gevalle bevorder die regte oefeninge nie net fisiese genesing nie, maar help dit jou ook om nie neerslagtig te word nie.

Moenie tou opgooi nie!

Ten spyte van groot lyding het Jesus tot God gebid, op Hom vertrou en eerder op sy eie vreugdevolle toekoms gekonsentreer as op die pyn (Hebreërs 12:2). Hy het uit sy moeilike ondervindinge geleer (Hebreërs 4:15, 16; 5:7-9). Hy het hulp en aanmoediging aanvaar (Lukas 22:43). Hy het sy gedagtes gerig gehou op ander se welsyn en nie op sy eie ongerief nie.—Lukas 23:39-43; Johannes 19:26, 27.

Hoewel jy dalk baie siek is, kan jy ook vir ander ’n aanmoediging wees. In ’n opstel op skool het Ashley se suster, Abigail, geskryf: “Die persoon wat ek die meeste bewonder, is my suster. Hoewel sy hospitaal toe moet gaan en binneaarvoeding kry en met naalde gesteek word, kom sy nog steeds met ’n glimlag daar uit!”c

Jason het nie sy doelwitte laat vaar nie, maar hulle net ’n bietjie aangepas. Nou is sy doelwit om te dien waar daar meer verkondigers van God se Koninkryk nodig is. Soos in Jason se geval sal jy dalk nie alles kan doen wat jy graag wil doen nie. Wat belangrik is, is dat jy leer om volgens jou beperkinge te lewe en nie oorbeskermend of onverskillig te wees nie. Vertrou op Jehovah om jou die wysheid en die krag te gee om jou beste te doen (2 Korintiërs 4:16; Jakobus 1:5). En onthou, die tyd sal aanbreek wanneer hierdie aarde ’n paradys sal wees, waar “geen inwoner sal sê: Ek is siek nie” (Jesaja 33:24). Ja, eendag sal jy weer gesond wees!

[Voetnote]

[Prent op bladsy 26]

Ashley se ouer suster, Abigail, bewonder haar moed