Ons beskou die wêreld

Kerkledetal neem af

In die Verenigde State het vermoedelik minder as die helfte van diegene wat oor die afgelope 30 jaar in hoofstroom- Protestantse kerke grootgeword het as volwassenes in hulle kerk gebly. Daar word geskat dat 78 miljoen mense in die Verenigde State “passiewe” Protestante is. Dit beteken dat hulle hulleself identifiseer as Baptiste, Anglikane, Metodiste, Presbiteriane of lede van ’n ander Protestantse kerk, maar dat hulle nie aan ’n plaaslike kerk behoort of dienste bywoon nie.

Beenhandelaars

“Desperate inwoners van die oorloggeteisterde Kaboel grawe mensebeendere op om vir gebruik in hoendervoer te verkoop”, berig die Reuters-nuusdiens. Been, wat ryk is aan kalsium, fosfaat en karbonaat, word gebruik om veevoer, seep en kookolie mee te maak. ’n Skelet wat ongeveer ses kilogram weeg, kan tot R2,35 behaal, wat ’n relatief groot som geld is in daardie brandarm stad. “Dis winsgewend”, sê die 14-jarige Faizdeen. “Hoewel ek dikwels dierebene bymekaarmaak, is dit makliker om mensebeendere hier te vind.” Ongelukkig het die jare lange burgeroorlog in Afganistan hierdie mineraalryke handelsartikel geredelik beskikbaar gemaak.

Horlosies wat nie net sê hoe laat dit is nie

In Rio de Janeiro is 77 studente gediskwalifiseer nadat daar digitale horlosies by hulle gevind is wat gebruik is om in ’n universiteits-toelatingseksamen te kul, berig die koerant O Globo. Die horlosies werk amper soos ’n telefoonroepradio; maar in plaas van telefoonnommers te ontvang, het hulle die regte antwoorde op eksamenvrae verskaf. Die koerant sê dat studente tot R65 400 elk vir die horlosies betaal het. Dit is interessant dat skooleksamenrade, reeds in 1987, onderwysers in Engeland en Wallis gewaarsku het om op die uitkyk te wees vir oneerlike leerlinge wat gerekenariseerde polshorlosies gebruik.

Verwronge beeld

Die meeste mense wat in ’n spieël kyk, aanvaar die weerkaatsing wat hulle sien—hulleself. Maar mense wat aan ’n toestand bekend as liggaamsdismorfiese steurnis ly, kyk in ’n spieël en sien ’n verwronge beeld van hulleself. “Dit is ’n toestand waarin mense op een gelaatstrek konsentreer en hulle verbeel dat dit afgryslik is, terwyl dit in werklikheid normaal is”, sê The Province, van Brits-Columbië, Kanada. Die New Yorkse psigiater Eric Hollander sê dat die foltering wat deur denkbeeldige gebreke teweeggebring word so erg kan wees dat ongeveer 25 persent van diegene wat aan die steurnis ly selfmoord probeer pleeg.

E-pos-gebede

Vroom Jode kom al lank by die Klaagmuur in Jerusalem bymekaar om te weeklaag en te bid. Aanbidders skryf dikwels gebede op ’n klein stukkie papier en sit dit in die skeure van die muur. Maar nou kan Jode van regoor die wêreld E-pos-gebede via die Internet stuur. Volgens die tydskrif Computerworld maak personeellede van die Virtual Jerusalem-webblad die gebede bymekaar, druk dit uit en neem dit na die Klaagmuur, waar “God dit volgens Joodse tradisie kan kry”.

Inkomsteverskil vergroot

Volgens ’n onlangse verslag deur die Verenigde Nasies oor sosiale ontwikkeling gaan 83 persent van die wêreld se inkomste na die rykste 20 persent van die bevolking. Met ander woorde, die gesamentlike rykdom van die wêreld se 358 miljardêrs is gelyk aan die gesamentlike inkomste van die armste 2400 000 000 mense. In 1960 was die gemiddelde jaarlikse inkomste van mense wat in nywerheidslande woon R26 600 meer as dié van mense wat in ontwikkelende lande woon. Maar in 1993 het die verskil in die jaarlikse per capita-inkomste tussen nywerheidslande en ontwikkelende nasies tot R71 900 gegroei.

Geskiedkundige oes

“In China se koringlande het masjinerie vir die eerste keer in die land se geskiedenis beter as die mens presteer”, het die Reuters-nuusdiens berig. Hulle het gesê dat meer as 800 000 meganiese snymasjiene gebruik is. Koring is een of ander tyd voor 1300 v.G.J. vir die eerste keer na China gebring en is sedertdien suksesvol op klein familieplase verbou—hoofsaaklik met die hand. Maar aangesien China meer as 20 persent van die wêreld se bevolking uitmaak, terwyl dit net 7 persent van die bewerkbare grond besit, “wil landbouamptenare graag meganisasie in die nasie se landerye bevorder”, het die verslag gesê.

Versekeringsprobleme vir geestelikes

Die meeste kerke het algemene aanspreeklikheidsversekering om hulle teen eise as gevolg van persoonlike beserings te beskerm. Sommige versekeringsmaatskappye in die Verenigde State het egter dekking vir “seksuele wangedrag” van geestelikes begin terugtrek, sê die National Underwriter. John Cleary, hoofregsadviseur van die Church Mutual Insurance Company, het gesê: “Baie . . . aanspreeklikheidspolisse sal seksuele wangedrag uitsluit, want dit is ’n opsetlike daad en in werklikheid ’n misdaad.” Daarbenewens het Donald Clark jr., ’n regsgeleerde wat verskeie godsdiensgroepe verteenwoordig, gesê dat hierdie versekeringsveranderinge te kenne gee dat “die potensiële gevaar van ongunstige ekonomiese gevolge van hierdie soorte mensgemaakte rampe moontlik meer verwoestend is as wat die gevolge van natuurrampe is”. Volgens mnr. Cleary het Church Mutual, een van die grootste kerkversekeraars in die Verenigde State, sedert 1984 tussen 1500 en 2000 eise as gevolg van seksuele wangedrag gehad.

Singapoer se leerlinge blink uit

Meer as ’n halfmiljoen leerlinge uit 41 verskillende lande het ’n toets van 90 minute afgelê om die standaarde van opvoeding oor die wêreld te vergelyk. Die uitslae? Toetsuitslae dui daarop dat Singapoer die wêreld se beste wiskunde- sowel as wetenskapleerlinge oplewer. Ná Singapoer was die res van die tien toppresterende lande in wiskunde Suid-Korea, Japan, Hongkong, België, Tsjeggiese Republiek, Slowaakse Republiek, Switserland, Nederland en Slowenië. Die beste wetenskappunte is behaal deur Singapoer, Tsjeggiese Republiek, Japan, Suid-Korea, Bulgarye, Nederland, Slowenië, Oostenryk, Hongarye en Engeland. Hoe het ’n land met slegs ongeveer 3400-000 mense klaarblyklik die res van die wêreld uitgestof? Moontlik deur harde werk. Singapoer se leerlinge bestee gemiddeld 4,6 uur per dag aan huiswerk, terwyl die internasionale gemiddelde 2 tot 3 uur is, berig Asiaweek.

Geld uit die hemel?

Inwoners van Overtown, ’n armoedige buurt in Miami, Florida, was verheug toe dit gelyk het of geld uit die hemel val. Maar dit was toe nie manna uit die hemel nie, maar deel van $3,7 miljoen (R17,3 miljoen) wat in die onderste strate geval het toe ’n gepantserde voertuig in ’n ongeluk op ’n oorpad bokant die buurt betrokke was. Polisie skat dat ten minste 100 mense gehardloop het om geld op te tel, maar daar was waarskynlik baie meer. Volgens The New York Times “het die Miami-polisie mense wat van die geld gehad het 48 uur gegee om dit terug te besorg sonder om van diefstal aangekla te word”. Maar teen die tyd dat die amnestie verstryk het, het slegs drie mense enige van die geld teruggebring en was daar steeds ongeveer $500 000 (R2335 000) weg. Een 18-jarige het glo gesê: “Dit het in mense se erwe geval, man. Wat verwag jy moet hulle doen?”

Pasiënte wat tydens chirurgie warm gehou word

Operasiesale in hospitale wat koud gehou word om die groei van bakterieë in die lug te vertraag, verdriedubbel die gevaar van infeksie, beweer ’n onlangse studie deur die narkotiseur Daniel Sessler, wat aan die Universiteit van Kalifornië verbonde is. “Dit is nie werklik bakterieë wat in die lug ronddryf wat wondinfeksie veroorsaak nie”, sê dr. Sessler, “maar die pasiënt se verminderde weerstand teen bakterieë op die vel of binne die liggaam.” Koue operasiesale kan ’n pasiënt se liggaamstemperatuur met tot 2 grade Celsius laat daal. En ’n lae liggaamstemperatuur verminder die vloei van suurstofhoudende bloed, wat noodsaaklik is om infeksie teë te werk. Dr. Sessler sê dat “die selle en ensieme wat vir immuniteit verantwoordelik is eenvoudig nie goed werk wanneer die liggaam koud is nie”. Bo en behalwe die feit dat dit die aantal infeksies verminder, het dr. Sessler en sy kollegas gevind dat pasiënte wie se liggaamstemperatuur tydens chirurgie normaal gehou is byna drie dae minder in die hospitaal deurgebring het as pasiënte wat nie warm gehou is nie.

Nie vir die openbare welsyn nie

In Japan het 49 persent van die mense met wie onderhoude gevoer is, gesê dat hulle regeringsamptenare hoofsaaklik vir hulleself werk, berig die Mainichi Daily News. Slegs 7 persent van die respondente het gedink dat burokrate vir “die openbare welsyn” werk, en net 3 persent het gesê dat hulle vir die land werk. Baie min Japannese het hulle burokrate as hardwerkend of opreg beskryf. Die opname is verlede Desember gedoen, ná ’n jaar waarin daar ’n hele paar skandale aan die lig gekom het waarby ’n paar van Japan se belangrikste staatsamptenare betrokke was.