Wat is die Internet?
DAVID, ’n onderwyser in die Verenigde State, het die Internet gebruik om kursusmateriaal te versamel. ’n Kanadese vader het deur middel daarvan met sy dogter in Rusland in verbinding gebly. Loma, ’n huisvrou, het dit gebruik om wetenskaplike navorsing oor die vroeë begin van die heelal te ondersoek. ’n Boer het hom daartoe gewend om inligting in te win oor nuwe metodes om gewasse te plant wat van satelliete gebruik maak. Korporasies word daardeur aangetrek omdat dit hulle produkte en dienste aan miljoene potensiële klante kan adverteer. Mense regoor die wêreld lees die jongste nasionale en internasionale nuus deur middel van die ontsaglike verslaggewings- en inligtingsdienste wat dit bied.
Wat is hierdie rekenaarwonder wat die Internet, of die Net, genoem word? Het jý dit nodig? Voor jy besluit om “op” die Internet te kom, sal jy dalk eers iets daaromtrent wil weet. Ten spyte van die groot ophef wat daaroor gemaak word, is daar redes om versigtig te wees, veral as daar kinders in die huis is.
Wat is dit?
Stel jou ’n kamer vol spinnekoppe voor wat elkeen sy eie web spin. Die webbe is so ineengestrengel dat die spinnekoppe vryelik in hierdie doolhof kan rondbeweeg. Jy het nou ’n vereenvoudigde voorstelling van die Internet—’n wêreldwye versameling van talle verskillende soorte rekenaars en rekenaarnetwerke wat met mekaar verbind is. Net soos ’n telefoon jou in staat stel om met iemand aan die anderkant van die wêreld te praat wat ook ’n telefoon het, stel die Internet ’n persoon in staat om by sy rekenaar te sit en inligting uit te ruil met ander rekenaars en rekenaargebruikers op enige plek in die wêreld.
Party verwys na die Internet as die inligtingsnelweg. Net soos ’n pad dit moontlik maak om deur verskillende dele van ’n land te reis, so laat die Internet inligting deur verskeie rekenaarnetwerke vloei wat onderling verbind is. Terwyl boodskappe loop, bevat elke netwerk wat bereik word inligting wat help om met die volgende netwerk te verbind. Die uiteindelike bestemming kan in ’n ander stad of land wees.
Elke netwerk kan met sy buurnetwerk “praat” deur middel van ’n gemeenskaplike stel reëls wat deur die ontwerpers van die Internet opgestel is. Hoeveel netwerke is wêreldwyd met mekaar verbind? Sommige skattings sê meer as 30 000. Volgens onlangse opnames verbind hierdie netwerke meer as 10 000 000 rekenaars en ongeveer 30 000 000 gebruikers regoor die wêreld. Daar word geskat dat die aantal gekoppelde rekenaars elke jaar verdubbel.
Wat kan mense op die Internet vind? Dit bied ’n snelgroeiende versameling inligting, met onderwerpe wat wissel van geneeskunde tot wetenskap en tegnologie. Dit bied uitvoerige materiaal oor die kunste sowel as navorsingsmateriaal vir studente, en dit dek ontspanning, vermaak, sport, inkopies en werksgeleenthede. Die Internet voorsien toegang tot kalenders, woordeboeke, ensiklopedieë en kaarte.
Daar is egter ’n paar ontstellende aspekte daarvan om in aanmerking te neem. Kan alles op die Internet as heilsaam beskou word? Watter dienste en funksies is alles beskikbaar op die Internet? Watter gepaste voorsorgmaatreëls kan getref word? Die volgende artikels sal hierdie vrae bespreek.
[Venster/Prent op bladsy 4]
Oorsprong en ontwerp van die Internet
Die Internet het in die sestigerjare begin as ’n eksperiment deur die Amerikaanse Departement van Verdediging om wetenskaplikes en navorsers oor wydverspreide gebiede te help saamwerk deur skaars en duur rekenaars en hulle elektroniese lêers te deel. Om hierdie doel te bereik, moes ’n stel gekoppelde netwerke geskep word wat as ’n gekoördineerde geheel sou dien.
Die Koue Oorlog het belangstelling in ’n “bomvaste” netwerk laat ontstaan. As ’n deel van die netwerk vernietig sou word, sou data steeds na die bestemming loop met behulp van die oorblywende dele. In die Internet wat hieruit ontstaan het, is die verantwoordelikheid vir boodskaproetering dus regdeur die netwerk versprei in plaas van in een plek gesentreer te wees.
’n Belangrike rede waarom die Internet, wat nou meer as twee dekades oud is, so gewild geraak het, is as gevolg van die gebruik van deurblaaiers. ’n Deurblaaier is ’n sagtewarehulpmiddel wat dit vir ’n gebruiker baie makliker maak om verskillende plekke op die Internet te “besoek”.