RSD—’n raaiselagtige, pynlike steurnis

Deur Ontwaak!-medewerker In Kanada

REFLEKSSIMPATIESE DISTROFIE (RSD) is “een van die raaiselagtigste sindrome in die geneeskunde en een van die pynlikstes en potensieel aftakelendstes”, het Allison Bray in die koerant Winnipeg Free Press geskryf. RSD “word dikwels nie klinies herken nie eenvoudig omdat daar nie genoeg daaromtrent bekend is nie”, het die pasiënt Anna Alexander in die British Medical Journal gesê. Dieselfde tydskrif het gesê dat RSD waarskynlik dikwels verkeerd gediagnoseer word by kinders. Jare lank het dokters selfs gedink dat die pyn sielkundig, selfverwek, was.

Diegene wat aan hierdie raaiselagtige steurnis ly, ervaar voortdurend pyn, en in sommige gevalle kan hulle skaars onthou dat hulle iets gedoen het om die verskriklike pyn te veroorsaak. Sarah Arnold skryf in Accent on Living: “Die siekte word veroorsaak deur ’n besering of trauma aan ’n deel van die liggaam wat baie senueindpunte bevat, soos ’n hand of ’n voet. Die besering kan so eenvoudig soos ’n speldeprik of so ernstig soos ’n operasie wees. Die eerste aanduiding van die siekte is langdurige pyn wat erger as die besering is. Die simptome is ernstig, ’n brandpyn op ’n bepaalde plek, uiterste sensitiwiteit vir temperatuur en lig, veranderinge van die hare en naels en verandering van die velkleur.”

Die siekte gaan deur verskillende fases. Aanvanklik is daar swelling en rooierigheid van die aangetaste area en haargroei waar daar voorheen geen sigbare groei was nie. Dit kan een tot drie maande duur. Dan word die area blou en koud, met toenemende pyn en styfheid van die ligamente en gewrigte. Osteoporose kan intree. Uiteindelik teer die aangetaste spiere uit, die senings trek saam en die aangetaste ledemaat verskrompel.

Volgens dr. Howard Intrater, direkteur van die pynkliniek by die Sentrum vir Gesondheidswetenskappe in Winnipeg, kan onherstelbare skade voorkom word. Daar moet gekeer word dat die simpatiese senuwees pynseine stuur.a Die koerant van Winnipeg berig dat “behandeling wissel van elektriese stimulasie tot betablokkers, epidurale stimulators (waar ’n elektrode in die ruggraat ingeplant word om die aangetaste deel te stimuleer) tot blokkering van die simpatiese senuwees deur inspuitings”. Fisioterapie en akupunktuur word saam gebruik om pyn te verminder en beweeglikheid te verbeter. Die British Medical Journal sê dat “doeltreffende behandeling die een of ander kombinasie van elektriese senustimulering, chemiese blokkering van simpatiese senuwees, sielkundige terapie en intense fisioterapie insluit”.

Vroeë diagnose is natuurlik voordelig. Maar dokters skryf in The American Journal of Sports Medicine dat hulle resultate met pasiënte wat minder as 6 maande, van 6 tot 12 maande of meer as 12 maande lank simptome getoon het “amper identies was. Hierdie bevinding weerspreek die huidige mening dat die vooruitsigte sleg is as simptome langer as 1 jaar voorgekom het vóór behandeling.”

Daar word gehoop dat RSD minder van ’n raaisel sal wees en dat selfs doeltreffender behandeling moontlik sal word namate mediese kennis toeneem.

[Voetnoot]