Van ons lesers

Niere Ek wil julle graag vertel hoe diep ek geraak is deur die artikel “Jou niere—’n lewensonderhoudende filter” (8 Augustus 1997). My dokter het my meegedeel dat ek ’n nierprobleem het. As gevolg van die artikel voel ek nou nie meer asof ek die enigste persoon is wat hierdie siekte het nie.

V. M., Verenigde State

Ek het ’n niersiekte waarvoor ek vier maande lank in die hospitaal was. Toe ek julle artikel lees, het dit my help besef hoe onkundig ek omtrent my liggaam was. Nou kan ek my toestand beter aan ander verduidelik.

S. H., Japan

Hierdie artikel het uitgekom op ’n tydstip toe daar vir my vrou gesê is dat sy nierkanker het. Hoewel die diagnose vir ons ’n skok was, kon ons die verskeie funksies van die nier duidelik verstaan toe die chirurg dit aan ons verduidelik het. My vrou se nier is verwyder, en sy herstel nou ná die operasie.

G. S., Indië

Beeldhouer se verhaal Dit het my hart verbly toe ek “Iets beters as wêreldberoemdheid”, die ondervinding van Celo Pertot, gelees het (22 Augustus 1997). Voordat ek ’n Christen geword het, het ek ’n loopbaan in musiek en die teater nagestreef. Die aand voor my doop het ek ’n oproep van die skrywers van ’n gewilde televisiereeks ontvang. Toe ek hulle vertel dat ek nie meer ’n verhoogkunstenaar is nie, het hulle gesê: “Is jy mal?” Soos Celo Pertot voel ek dat Jehovah my besluit grootliks geseën het.

R. F., Verenigde State

Russiese teoloog Baie dankie dat julle die artikel “Jehovah se Getuies in Rusland” (22 Augustus 1997) gedruk het. Ek het groot respek en bewondering vir Sergei Iwanenko omdat hy die moed en begeerte gehad het om die waarheid oor Jehovah se Getuies te druk.

S. M., Verenigde State

Haat Die reeks “Waarom soveel haat? Waarom so min liefde?” (8 September 1997) het een van die beste buiteblaaie gehad wat julle nog gedruk het. Die artikels het my gehelp om beter te verstaan waarom mense vreemdelinge en mense uit ander kulture wantrou.

J. M., Verenigde State

RSD—pynlike steurnis Ek voel verplig om aan julle te skryf nadat ek die artikel “RSD—’n raaiselagtige, pynlike steurnis” (8 September 1997) gelees het. In Januarie het ek uitgevind dat ek RSD het. Ek het inligting daaroor probeer kry. Ek was dus in trane toe ek hierdie artikel sien. Dit was prakties, en dit het baie van my vrae beantwoord.

W. B., Engeland

Ek ly al vier jaar lank aan RSD. Baie dankie dat julle die moeite gedoen het om deeglike navorsing oor hierdie onderwerp te doen. Dit het getoon dat julle werklik naasteliefde het.

G. S., Duitsland

My man ly aan RSD, en dit was vir ons baie moeilik om die siekte aan ander mense te verduidelik. Noudat dit in die artikel so deeglik bespreek is, het dit vir ons baie makliker geword. Ons het ook hierdie materiaal vir dokters en rehabilitasiekantore gegee. Toe ek die verhaal van Karen Orf se stryd met RSD lees, was dit asof ek oor my man se lewe gelees het! Soos Karen sien ons uit na die nuwe wêreld, waar daar nie meer pyn sal wees nie.

K. P., Australië

Ek wil Karen bedank vir haar verhaal. Sy is in my gedagtes en gebede, en ek hoop dat sy sal aanhou om vordering te maak. RSD het my rug en bene tot op die sole van my voete aangetas. Dit veroorsaak vir my baie ongemak en pyn om by die vergaderinge te sit en om in die veldbediening te loop. Maar met Jehovah se ondersteuning het dit my nie teruggehou nie.

C. K., Engeland