Padveiligheid vir diere

DEUR ONTWAAK!-MEDEWERKER IN BRITTANJE

EENHONDERDDUISEND jakkalse en net soveel krimpvarkies en hase word jaarliks op Brittanje se paaie doodgery, asook 40 000 ratels, 5000 kerkuile en meer as ’n miljoen paddas. Die wintermis en donkerte dra by tot die slagting van diere deur motors wat op die hoofweë ry. Bestuurders swenk dikwels uit om nie ’n dier dood te ry nie, maar beskadig dan hulle motor of bots selfs met aankomende verkeer. Dit lei soms tot die verlies van menselewe. Ná ’n ongeluk waarby ’n dier betrokke was, ly baie bestuurders aan trauma, en volgens polisieverslae kan honderde nie hulle reis voortsit nie.

Op sommige hoofweë in Brittanje het die owerheid spesiale weerkaatsers geïnstalleer om bokke van die paaie af weg te hou. Wanneer lig van ’n motor se kopligte op die weerkaatsers val, lyk dit soos wolfoë! Op ander plekke is bome verder as gewoonlik van die pad af geplant sodat dit vir bestuurders makliker is om enige dier verder vorentoe te sien. In die Verenigde State het sommige motoriste hulle motor met ’n fluitjie toegerus wat ’n hoëfrekwensiegeluid maak wanneer die motor vinniger as 55 kilometer per uur ry. Wanneer lug deur die fluitjie vloei, bring dit ’n geluid van 60 desibel voort met ’n frekwensie wat nie deur die menseoor gehoor kan word nie, maar wat duidelik deur diere gehoor word. Die toestel werk baie goed vir diere met ore wat vorentoe wys. Die polisie het gerapporteer dat botsings met bokke met 50 persent afgeneem het in ’n proefneming met die fluitjies.

Hoe kan jy gevaar sowel as die onnodige uitwissing van diere op die paaie vermy? Wanneer jy bestuur, veral in die winter of in die aand, moet jy stadiger ry en ag slaan op padtekens wat jou teen diere waarsku.