Die Een wat ons wild sal beskerm

VAN die vroegste tye af geniet mense dit om wilde diere te bestudeer. Maar nadat God die mens toestemming gegee het om vleis te begin eet, het sy waardering vir wilde diere ongelukkig afgeneem en is diere onnodig doodgemaak en wreed vir trofees gejag.—Genesis 2:19, 20; 9:2; 10:9; 25:27.

Maar party mense het die aarde se natuurlewe steeds bewonder. Omtrent 3000 jaar gelede is die woorde van Psalm 104 byvoorbeeld deur ’n natuurliefhebber neergeskryf. Hy noem verskeie wilde diere by name, soos wilde-esels, leeus, steenbokke, dassies en die ooievaar. Uit sy bestudering van voëls, voëlsang en wilde diere is die psalmis beweeg om met lof uit te roep: “[Jehovah] het hulle almal met wysheid gemaak.”—Psalm 104:10-12, 17-21, 24.

Jehovah God kan tereg met sy manjifieke skeppingswerke tevrede wees (Genesis 1:31). Ons kan dus seker wees dat hy nie sal toelaat dat die res van die aarde se wild uitgewis word nie. God het die psalmis in ooreenstemming daarmee geïnspireer om inligting op te teken wat goeie nuus vir alle wildliefhebbers behoort te wees. Daar word vir ons gesê dat “die aarde . . . vir ewig en altyd nie [sal] wankel nie” (Psalm 104:5). Sulke besorgdheid oor die ewige welsyn van hierdie planeet sluit beslis die skepsele in wat daarop woon (Jesaja 45:18). Jesus Christus het God se besorgdheid oor wilde diere bevestig toe hy gesê het: “Word vyf mossies nie vir twee stuiwers verkoop nie? En nie een van hulle is voor God vergeet nie” (Lukas 12:6). God se besorgdheid oor sy skeppingswerke word ook in Psalm 104, vers 14, beklemtoon: “U laat gras uitspruit vir die diere, en groen plante vir die mens sodat hy sy kos uit die aarde kan kry.”—NAV.

In ooreenstemming met hierdie feite sal Jehovah God nie vir ewig mense verdra wat hom loën en die toekoms van die aarde en sy wilde diere bedreig nie. Die laaste vers in Psalm 104 benadruk dit met hierdie gerusstellende woorde: “Sondaars sal van die aarde af uitgeroei word; en wat die goddeloses betref, hulle sal nie meer bestaan nie.”—Psalm 104:35, NW.

Hoe vertroostend is dit tog om te weet dat God sy vaste voorneme uitgespreek het “om die verderwers van die aarde te verderf” (Openbaring 11:18). Dan sal ander profesieë wat nou figuurlik vervul word ’n letterlike vervulling hê. Deur sy profeet Hosea sê Jehovah God byvoorbeeld: “Verder sluit Ek in dié dag vir hulle ’n verbond met die wilde diere van die veld en met die voëls van die hemel en die kruipende diere van die aarde; ja, boog en swaard en oorlog sal Ek verbreek uit die land, en Ek sal hulle in veiligheid laat rus.”—Hosea 2:17; Jesaja 11:6-9.

Stel jou voor dat jy in daardie komende aardse Paradys is. Wat ’n vreugdevolle tyd sal dit tog wees! ‘Maar’, wonder jy dalk, ‘wat moet ’n mens doen om sulke seëninge te verkry?’ Eerstens moet ’n mens God se Woord bestudeer. Aan almal wat die Bybel se riglyne dan gehoorsaam, maak Jehovah God hierdie wonderlike belofte: “Die regverdiges sal die aarde besit en vir ewig daarop woon.”—Psalm 37:29.