Rus en vrede—Sal ons dit ooit geniet?
TOE hulle gevra is wat hulle van ’n buitelandse vakansie verlang, het bykans 3 uit elke 4 Britse toeriste geantwoord: “Rus en vrede.” Maar omdat geraasbesoedeling ’n wêreldwye probleem is, meen baie dat ware rus en vrede bloot ’n droom is.
Ten spyte van ywerige pogings om geraasbesoedeling te verminder, wonder jy dalk of dit realisties is om te glo dat daar ooit algehele sukses sal wees. Wat van ander wat nie so besorg is soos jy nie?
Struikelblokke wat oorkom moet word
Dit is nie maklik om met mense te praat wat antagonisties is nie, wat nog te sê om hulle jou standpunt te laat insien. Toe lawaaierige groepe tieners buite die gebou bymekaargekom het waar Ron gewoon het, het hy die inisiatief geneem om vriende met hulle te maak. Hy het hulle name leer ken. Hy het selfs een van hulle fietse help regmaak. Hulle het van toe af nie meer vir hom probleme veroorsaak nie.
Beskou die geval van Marjorie, ’n enkelouer met ’n tienerdogter, wat in ’n woonstel tussen lawaaierige bure woon. Die huurders bo hulle het nie ’n tapyt op hulle vloer nie. Gevolglik vind Marjorie dat geraas van die kinders wat oor die vloer rolskaats, ’n bal laat hop of selfs van die bed afspring haar hinder. Daarbenewens dra hulle ma hoëhakskoene by die huis. Marjorie het haar buurvrou vriendelik genader en haar gevra om stiller te wees, maar die taalgrens tussen hulle het frustrasie tot gevolg gehad. Die plaaslike munisipale raad het aangebied om ’n tolk te stuur om die probleem te help oplos, en dus wag Marjorie vir ’n verbetering.
Onder haar is ’n man wat tussen sewe- en agtuur elke oggend harde musiek speel, met die bas wat aanhoudend doem-doem. Sy het die man op ’n taktvolle wyse genader, maar sy antwoord was dat hy sy musiek nodig het om ‘hom in ’n goeie bui te kry vir sy werk’. Hoe verduur Marjorie dit?
“Ek werk aan selfbeheersing en geduld”, sê sy. “Ek het my program verander, en ek sit en lees ten spyte van die geraas. Ek vind dat ek gou in my boek verdiep raak. Dan is ek nie so bewus van die geraas nie.”
Daarteenoor woon Heather in ’n woonstel wat oor ’n nagklub uitkyk, wat ná ’n luidrugtige nag om en by sesuur in die oggend toemaak. Hoewel sy uiteindelik by die plaaslike owerheid gekla het, is daar nie veel gedoen om die steuring stop te sit nie.
’n Einde aan geraas?
“Baie mense vind algehele stilte uiters steurend en onheilspellend”, sê dr. Ross Coles van Brittanje se Mediese Navorsingsraad se Instituut vir Gehoornavorsing. Die pragtige voëlgesang, die sagte geklots van golwe op ’n sanderige strand, die opgewonde uitroepe van kinders—hierdie en ander klanke behaag ons. Hoewel ons dalk tans ’n bietjie verligting van geraas verlang, is ons gelukkig wanneer ons saam met heilsame metgeselle is wat met ons gesels. God het rus en vrede vir sy getroue knegte belowe.
In die Bybel sê die psalmis: “Die ootmoediges . . . sal die aarde besit en hulle verlustig oor groot vrede” (Psalm 37:11). God se hemelse Koninkryksregering sal binnekort in menseaangeleenthede ingryp (Daniël 2:44). Dan, onder die heerskappy van Christus Jesus, sal daar “volheid van vrede [wees], totdat die maan nie meer is nie”.—Psalm 72:7; Jesaja 9:5, 6.
Jy kan daarvan verseker wees dat Goddelike ingryping die rus en vrede sal teweegbring wat ons almal verlang, net soos God se profeet Jesaja voorspel het: “Die werking van die geregtigheid sal vrede wees, en die voortbrengsel van die geregtigheid rus en veiligheid tot in ewigheid. En my volk sal woon . . . in plekke van ongestoorde rus.”—Jesaja 32:17, 18.
Jy kan selfs nou geestelike rus en vrede vind by die vergaderinge van Jehovah se Getuies in jou omgewing. Hoewel tienduisende soms by groot byeenkomste bymekaarkom vir aanbidding—en hierdie samekomste ‘dreun waarlik van mans, vrouens en kinders’—is die geluid nie steurend nie, maar aangenaam (Miga 2:12). Jy kan dit self ondervind deur saam met die plaaslike Getuies te vergader of deur na een van die adresse op bladsy 5 van hierdie tydskrif te skryf om met hulle in aanraking te kom. Geniet nou en dalk vir ewig ware rus en vrede in hulle geselskap.