Jongmense vra . . .

Is raves onskadelike pret?

“Wanneer ek met my arms in die lug dans en die polsende musiek my meevoer, voel ek hoe die ander dansers my besiel. Dis asof ek weggevoer word.”—Gena.

GENA het die opwinding om ’n rave by te woon só beskryf. Hierdie danspartytjies, wat gewoonlik die hele nag lank aanhou, het eers in Brittanje gedurende die tagtigerjare gewild geword. Nou kom dit in alle wêrelddele voor, met inbegrip van België, Duitsland, Indië, Kanada, Nieu-Seeland, Suid-Afrika en die Verenigde State.

Raves word gehou in nagklubs, verlate pakhuise, in die veld—enige plek waar mense bymekaar kan kom vir ’n nag van koorsagtige, ononderbroke dansery. “Raves is geleidelik besig om nagklubs te vervang as jongmense se keuse van ontspanning”, het Adam Levin in die Sunday Times Magazine van Johannesburg geskryf. “As jou tieners nog nie daarvan gepraat het nie”, het hy bygevoeg, “het julle ’n kommunikasieprobleem.”

’n Kykie na die rave-kultuur

Raves is soms in geheimsinnigheid gehul en die bymekaarkomplek word eers op die dag van die geleentheid bekend gemaak. Maar wanneer die oordadige vertoning van ligte en polsende techno-musiek begin, kan daar enigiets van ’n paar dosyn tot duisende jongmense in vreemde uitrustings teenwoordig wees. “Dit is soos ’n groot, verenigde mensemassa wat ronddans en op maat van die musiek aan hulle aggressie uiting gee”, sê Katy, ’n tweedejaarstudent.

Maar ’n rave is nie net ’n dans nie. Dit is ook ’n kultuur, oftewel ’n “scene”, soos ravers dit graag noem. Die basiese beginsels van die rave-kultuur is na bewering vrede, liefde, eenheid en respek—ongeag ras, nasionaliteit of seksuele voorkeur. “Ons probeer om kulture saam te gooi by hierdie partytjies”, sê die eienaar van ’n winkel wat in dansmusiek spesialiseer. “Die idee is samehorigheid”, voeg hy by, “en om saam te dans, is ’n doeltreffende manier om dit te verkry.”

In die lig van sulke oënskynlik edele ideale vra jy dalk: ‘Wat kan dan verkeerd wees met raves?’ Maar daar is ’n ander sy van die rave-kultuur waarop jy behoort te let.

Die donker kant van raves

Party beweer dat alkohol selde by raves gebruik word. Maar dwelms is ’n heel ander saak. “’n Mens wonder of die rave-kultuur makliker deur die gemeenskap aanvaar sou geword het as dwelms nie so ’n groot rol daarin gespeel het nie”, erken Brian, ’n raver. Hy voeg by: “Talle ander wonder weer hoe raves ooit daarsonder sou ontstaan het.”

Hoewel dagga en LSD gewild is by party raves, lyk dit of MDMA, wat algemeen as Ecstasy bekend is, die dwelm is wat ravers verkies. Gebruikers beweer dat Ecstasy betreklik veilig is. Hulle hou vol dat dit hulle net die nodige energie gee om die hele nag lank te dans en dat dit hulle gevoel van euforie versterk. Tog skryf The New York Times onder die opskrif “Gewilde dwelm kan brein beskadig” dat Ecstasy “nadelige langtermyngevolge kan hê wat ’n mens se eetlus, slaap, gemoedstemming, impulsiwiteit en ander verstandsfunksies betref”. En dit is nie al nie. “Daar was al ’n paar sterfgevalle weens Ecstasy”, sê dr. Howard McKinney, “en heelparty ander gevalle waar mense wat die gewone dosis geneem het hartversaking, lewerversaking of bewusteloosheid ondervind het.” Dr. Sylvain de Miranda sê tereg: “Rave-bywoners wat Ecstasy gebruik, dans met die dood.”

Selfs organiese dwelms—soos plantaardige Acid, Acceleration, plantaardige Ecstasy of Rush—kan skadelik wees. Daar word byvoorbeeld beweer dat die organiese dwelm Acceleration in sekere omstandighede ’n hartaanval en selfs die dood kan veroorsaak.

Vir diegene wat nog steeds volhou dat die dwelms wat by raves gebruik word onskadelik is, is daar nog ’n faktor om oor na te dink. ’n Kanadese polisiespeurder, Ian Briggs, beweer dat 90 persent van die dwelms wat as Ecstasy verkoop word glad nie Ecstasy is nie. “Baie daarvan is PCP of ander gevaarlike dwelms”, sê hy. “Die mense wat hierdie dwelms verkoop, is gewetenloos. Hulle is nie daar wanneer die dwelms begin werk nie.”a

By party raves word daar weliswaar nie dwelms gebruik nie. Maar selfs ravers sal erken dat dit dikwels onmoontlik is om vooraf te weet of enige, baie of die meeste van dié wat by die rave teenwoordig is onder die invloed van ’n onwettige middel sal wees of nie.

Is raves regtig vir jou?

Daar is in wese niks verkeerd met musiek of dans nie en dit is ook nie verkeerd om pret te wil hê nie. Die Bybel sê immers dat daar ’n “tyd vir vreugde” is en ’n “tyd om te dans” (Prediker 3:4, Today’s English Version). Dit spoor ons ook aan: “Verbly jou . . . in jou jeug” (Prediker 11:9). Die Skepper wil dus hê dat jy gelukkig moet wees! Jy moet nietemin onthou dat ‘die hele wêreld in die mag lê van die bose’, Satan die Duiwel (1 Johannes 5:19). Daarom moet jy geensins verbaas wees dat die vorme van ontspanning wat deur hierdie wêreld opgehemel word dikwels met skadelike elemente besmet is nie.

Dink byvoorbeeld aan diegene wat raves bywoon. Volg hulle die Bybel se vermaning om ‘hulle van elke verontreiniging van die vlees en die gees te reinig’? (2 Korintiërs 7:1). Ravers staan dalk wel vrede, liefde en eenheid voor. Maar “die wysheid van bo” is nie net “vredeliewend” nie; dit is ook “kuis” (Jakobus 3:15, 17). Vra jou af: ‘Kom die sedes van diegene wat dikwels na raves gaan, ooreen met die standaarde wat in God se Woord, die Bybel, gevind word? Wil ek die hele nag deurbring saam met mense wat “liefhebbers van genot eerder as liefhebbers van God” is?’—2 Timoteus 3:4; 1 Korintiërs 6:9, 10; vergelyk Jesaja 5:11, 12.

Dit is belangrike vrae waaroor ons moet nadink, want Paulus het geskryf dat ‘slegte omgang nuttige gewoontes bederf’ (1 Korintiërs 15:33). Om met mense te assosieer wat minagting vir God se wette toon, sal uiteindelik tot rampspoed lei, want die Bybel sê: “Gaan met die wyse om, dan word jy wys; maar hy wat met dwase verkeer, [met hom sal dit sleg gaan, NW]. ”—Spreuke 13:20.

Feit is dat talle raves eintlik maar dwelmpartytjies is, en diegene wat dit bywoon, kan wrange vrugte pluk. Party raves word byvoorbeeld deur die polisie ingeval en stopgesit óf omdat dit onwettig gehou word óf omdat daar dwelms gebruik word. Sou jy gereken wou word onder diegene wat nie wetsgehoorsaam is nie? (Romeine 13:1, 2). Selfs al word geen wette oortree nie, sal jy so ’n partytjie kan bywoon en “sonder vlek van die wêreld” bly? (Jakobus 1:27). Sal jou teenwoordigheid by ’n rave jou ’n skoon gewete voor God en mense laat behou, aangesien swelgerye, of “wilde partytjies” (Byington), deur die Bybel veroordeel word?—Galasiërs 5:21; 2 Korintiërs 4:1, 2; 1 Timoteus 1:18, 19.

Christene moet ongetwyfeld op hulle hoede wees vir die gevare van raves. Maar dit is nie die einde van die wêreld nie. Daar is nog baie vorme van ontspanning wat jy kan geniet. Baie gesinne onder Jehovah se Getuies het byvoorbeeld heilsame gesellighede gereël.b Deur sorgvuldige beplanning en toesig laat hierdie gesellighede almal wat teenwoordig is geestelik en liggaamlik verkwik voel. Nog belangriker, opbouende assosiasie behaag Jehovah, “die gelukkige God”, wat wil hê dat sy knegte gelukkig moet wees.—1 Timoteus 1:11; Prediker 8:15.

[Voetnote]

[Venster op bladsy 26]

Wat Is techno?

Kortom, techno verwys na elektroniese dansmusiek. Dit sluit talle style in. Die meeste mense sal techno as ritmies beskryf, want die maatslag wissel gewoonlik tussen 115 en 160 slae per minuut.

“Vir die oningewydes”, sê The European, “klink techno soos die geluide wat ’n mens hoor wanneer jy die tandarts besoek, tesame met die geluide wat daar dalk was op die nag toe Sodom en Gomorra vernietig is.” Party luisteraars word egter betower deur die ritmiese maatslag van techno. “Hierdie musiek”, sê die 18-jarige Christine, “gee my die gevoel van onbeperkte vryheid en onafhanklikheid.” Sonja voel ook so. “In die begin”, erken sy, “het ek glad nie van techno-musiek gehou nie. Maar hoe meer ’n mens daarna luister, hoe aanvaarbaarder word dit. Wanneer die musiek regtig hard is, is dit amper onmoontlik om die polsende ritme te ignoreer. Jy beweeg vanself. As jy nie versigtig is nie, beheer die ritme jou hele lyf.” Die 19-jarige Shirley sien iets dieper in techno. “Dit is nie net musiek nie”, sê sy. “Dis ’n hele lewenswyse wat deur kleredrag en spraak uitgedruk word.”

Christene wil graag ‘aanhou om seker te maak van wat vir die Here aanneemlik is’ (Efesiërs 5:10). Hulle moet dus versigtig wees wat techno betref, net soos hulle met enige ander musiekstyl sou wees. As jy agterkom dat techno jou aantrek, moet jy jou afvra: ‘Hoe beïnvloed hierdie musiekstyl my? Laat dit my gelukkig, kalm en rustig voel? Of maak dit my geïrriteerd en wek dit dalk selfs kwade gevoelens of onsedelike gedagtes by my op? Sal my aangetrokkenheid tot hierdie musiekstyl my nader bring aan die lewenstyl wat daarmee gepaardgaan? Sal ek in die versoeking kom om ’n rave by te woon om na hierdie soort musiek te luister of op maat daarvan te dans?’

Wat op die ou end werklik saak maak, is dít: Wat jou musieksmaak ook al is, moet nooit toelaat dat dit tussen jou en jou hemelse Vader kom nie.