Ons beskou die wêreld
Genitale herpes aan die toeneem
“Ten spyte van die klem op veilige seks om vigs te voorkom, het genitale herpes sedert die laat sewentigerjare vyfvoudig toegeneem onder wit tieners” in die Verenigde State, sê ’n berig van Associated Press. Daar is egter opgemerk dat ander seksueel oordraagbare siektes, soos gonorree, gedurende dieselfde tydperk afgeneem het. Waarom neem herpes toe? Van die redes is ’n toename in voorhuwelikse seks en mense wat meer as een seksmaat het. Daar word nou geraam dat 45 miljoen Amerikaners met die herpesvirus besmet is, en die meeste van hulle is onbewus daarvan. Die virus veroorsaak nou en dan sere of ’n gejeuk by die geslagsdele en soms op die boude of die bobene.
Afname in die Anglikaanse Kerk
Die amptelike skatting van die Anglikaanse Kerk in Engeland se bywoning elke Sondag is eenmiljoen. Nieamptelik erken party senior geestelikes dat daar dalk 25 persent minder is wat hulle kerkdienste bywoon. ’n Wetenskaplike opname toon egter dat die kernlidmaatskap, diegene wat die Nagmaal gebruik, vir die eerste keer minder as ’n halfmiljoen is. Waarom is geestelikes so gewillig om hulle bywoningsyfers te oordryf? Bloot om te keer dat hulle kerke gesluit word. Wanneer dit gebeur, smelt gemeentes saam en is minder geestelikes nodig. Een plaaslike pastoor was eerlik genoeg om te sê: “Ek is geneig om die syfers groter te maak. Dit is ontmoedigend wanneer min mense die dienste bywoon, daarom moedig dit my aan om te sê dat meer teenwoordig was”, sê The Sunday Times van Londen.
Man dagvaar sy vrou wat rook
Meer as 20 jaar al smeek en soebat Richard Thomas sy vrou om op te hou rook, maar dit was alles tevergeefs. Hy het haar dus voor die hof gedaag. Mnr. Thomas het gesê dat hy wou hê die regering moet hom beskerm teen die verlies aan liefde en ondersteuning en kameraadskap van die vrou vir wie hy lief is. Hy het alreeds sy moeder weens hartsiekte aan die dood afgestaan, en daarna het sy vader ’n beroerte gehad waarna hy sewe jaar lank bedlêend was. Albei sy ouers was strawwe rokers, en hy het gesê dat hy nie sy vrou weens nikotienverslawing wil verloor nie. Maar voordat die hof ’n geregtelike bevel kon uitreik, het mnr. Thomas met goeie nuus teruggekeer. “My vrou het ingestem om op te hou rook”, het hy gesê. Mev. Thomas is in ’n behandelingsentrum vir verslaafdes opgeneem, en sy het plegtig belowe dat sy vir goed van sigarette ontslae sal raak. Volgens The New York Times het die Thomasse hand aan hand by die hof uitgestap.
Wilde Australiese kamele
Kamele is baie jare gelede deur Australië ingevoer vir konstruksiewerk aan ’n telegraaflyn en aan die treinspoor wat oor die land se dorre agterveld strek. Toe dié geharde diere deur vragmotors vervang is, het baie van hulle Afgaanse eienaars hulle eerder in die natuur vrygelaat as om hulle te slag. Die kamele het in die droë sentrale deel van Australië gefloreer, en vandag kom tot 200 000 daar voor. Party mense meen nou dat die kamele ’n kosbare nasionale bate kan word, berig die koerant The Australian. Kameelvleis is al op die mark beproef, en dit is glo net so sag soos beesvleis en het ’n laer vetinhoud. Ander kameelprodukte sluit in: velle, melk, wol en vet om in seep en skoonheidsmiddels te gebruik. Daar is ook ’n vraag na lewende kamele. Volgens Peter Seidel, van die Sentraal-Australiese Kameelbedryf, “wil baie van die internasionale dieretuine en toeristeparke Australiese kamele hê omdat ons kamele nie siektes het nie”.
Arseenvergiftiging
“Byna 15 miljoen mense van Bangladesj en 30 miljoen mense van Wes-Bengale, met inbegrip van Kalkutta, word aan arseenvergiftiging blootgestel”, sê The Times of India. Die probleem is ’n onvoorsiene neweproduk van die groen revolusie. Toe diep putte gegrawe is om gewasse te besproei, is arseen wat natuurlik in die aarde voorkom saam met die water boontoe gebring, en dit het uiteindelik in putte ingesyfer wat vir drinkwater gebruik word. Die omgewingsdeskundige Willard Chappel, van die Universiteit van Colorado, VSA, het die besoedelde gebiede onlangs besoek en die probleem beskryf as “verreweg die grootste geval van massavergiftiging in die wêreld”. Meer as 200 000 mense het reeds velletsels, ’n teken van arseenvergiftiging. “Dit lyk of ons hongersnood (deur die groen revolusie) beëindig het, en sodoende meer ellende veroorsaak het”, het Ishak Ali, ’n regeringsamptenaar van Bangladesj, gesê.
Werkende moeders
In 1991 het die Nasionale Vereniging van Werkende Vroue geraam dat “65% van die [Amerikaanse] vroue met kleuters en 77% van dié met skoolgaande kinders teen die middel van die negentigerjare in die arbeidsmark sal wees”. Hoe juis was hulle voorspelling? Volgens die Amerikaanse Sensusburo het 63 persent van die vroue met kinders onder vyf jaar in 1996 gewerk, berig The Washington Post. Van die vroue met skoolgaande kinders was 78 persent werkende moeders. Wat van Europa? Volgens die inligting wat deur die Europese Unie se Departement van Statistiek saamgestel is, was die “verhouding van werkende vroue met kinders tussen 5 en 16 jaar” gedurende 1995 in Europese lande as volg: Portugal 69 persent, Oostenryk 67, Frankryk 63, Finland 63, België 62, Brittanje 59, Duitsland 57, Nederland 51, Griekeland 47, Luxemburg 45, Italië 43, Ierland 39 en Spanje 36.
Bankrotskap raak iets algemeens
In 1996 “het ’n rekordgetal van 1,2 miljoen Amerikaners om bankrotskap aansoek gedoen, 44 persent meer as in 1994”, sê die tydskrif Newsweek. “Bankrotskap het so algemeen geword dat daar nie meer ’n stigma daaraan kleef nie.” Wat is verantwoordelik vir die toename in bankrotskappe? Een rede is die “toenemende aanvaarding van bankrotskap as net nog ’n lewenstylkeuse”, sê Newsweek. “Skuldeisers sê die veranderde gesindheid lei tot misbruik: een studie toon dat 45 persent van dié wat om bankrotskap aansoek gedoen het die meeste van hulle skuld kon terugbetaal.” Maar pleks van ’n begeerte te toon om wat hulle skuld terug te betaal en skaam te voel, sê baie eenvoudig: ‘Ek wil ’n nuwe begin maak.’ Al hoe meer individue en korporasies neem hulle toevlug tot bankrotskap, en hulle word ook beïnvloed deur regsgeleerdes se advertensies om “jou skuldprobleme gou en maklik op te los!!” Namate die getalle gedurende ’n bloeiende ekonomie bly styg, sidder deskundiges om te dink wat kan gebeur as die mark in duie stort of as daar ’n resessie is.
Vernietigende visvanggebruike
Kommersiële vissersvlote belê in toerusting om die seebodem te fynkam op soek na die kwynende getal visse. Om spesies op te skep wat vantevore geïgnoreer is, word die seebeddingtoerusting, wat as mobiele visgerei bekend staan, op dieptes van tot 1200 meter oor die seebodem getrek. Die probleem is dat baie “buiswurms, sponse, anemone, hydrozoa, seekastaiings en ander bewoners van die diepte” ook op dié manier gevang en “as afval weggegooi” word, berig Science News. Die tekort aan visvoorraad word vererger deur hulle te vernietig. Omdat hulle voedsel en skuiling aan klein vissies voorsien, sê Elliott Norse, direkteur van die Biologiese Instituut van Seebewaring in Redmond, Washington, VSA, dat die vernietiging van seehabitate deur hierdie manier van visvangs vergelyk kan word met “ontbossing op land”.
Tienersedes in Brittanje
’n Onlangse verslag toon dat godsdiensinstellings in Brittanje nie daarin slaag om geslagsedelikheid by tieners in te skerp nie. Die Universiteit van Londen het 3000 tieners gevra “of dit sedelik verkeerd is as ’n ongetroude paartjie wat ’n langtermynverhouding het geslagsomgang het”. Soos verwag is, het byna almal wat hulleself as ateïste of agnostici beskryf het nee gesê. Maar 85,4 persent van die Rooms-Katolieke en 80 persent van die Anglikane het ook gesê dat dit nie verkeerd is nie. Die syfers was dieselfde vir baie ander godsdienste, wat as ’n groep ondervra is—onder meer Moslems, Jode, Hindoes en ander. Die opname “sal vir diegene in die kerke wat tradisionele standaarde van geslagsedelikheid probeer handhaaf, nie juis aangename leesstof wees nie”, sê The Times van Londen.