Ons beskou die wêreld

Cholera-epidemie tref Oos-Afrika

“Cholera het in Oos-Afrika epidemies geword”, sê ’n berig van die Associated Press uit Nairobi, Kenia. Cholera, ’n aansteeklike ingewandsiekte wat hewige diarree veroorsaak, kan dodelik wees as dit nie behandel word nie. Volgens die Wêreldgesondheidsorganisasie (WGO) het meer as 61 000 mense in Oos-Afrika die siekte in 1997 opgedoen, en 2687 sterfgevalle is gerapporteer. Cholera-epidemies is algemeen in lande waar daar swak sanitasie en onvoldoende mediese hulp is. Die situasie word vererger wanneer seisoenreën menslike afval in drinkwater inspoel. Dr. Maria Neira, hoof van ’n WGO-taakmag oor cholera, het gesê dat die streek waarskynlik eers heeltemal van cholera ontslae sal raak wanneer riole en skoon water in die betrokke gebiede beskikbaar is.

Hulp vir die dooies?

In Hongkong word die skyn nie altyd net bewaar tot iemand se dood toe nie—vir party gaan dit in die hiernamaals voort. Dit is omdat vooroueraanbidding in die Chinese kultuur ’n belangrike rol in die daaglikse lewe speel. Daarom “dink hulle dat dit selfs in die geestewêreld baie belangrik is om te wys dat jy ryk is”, sê die winkelier Kwan Wing-ho. Mnr. Kwan verkoop papierreplikas van ’n verskeidenheid materiële besittings, waaronder sellulêre telefone, rekenaars, mikrogolfoonde en selfs ’n Mercedes Benz van volle grootte, om familielede en vriende wat agterbly te help om die status van hulle afgestorwe dierbares te verbeter. “Die besittings word gedurende die eerste sewe dae ná die dood verbrand, asook tydens herdenkings en as ’n familielid droom dat ’n dooie nodig het om inkopies te doen”, sê ’n berig van die Associated Press. “Dis ’n winsgewende onderneming”, sê mnr. Kwan, “omdat die klant nie kan terugkom en kla nie.”

Radioaktiewe edelstene

Edelstene wat aan ’n handelaar in Bangkok verkoop is, het tot ’n internasionale handelswaarskuwing aanleiding gegee toe daar uitgevind is dat hulle radioaktief is. Sahaboedeen Nizamoedeen, ’n ervare handelaar in edelstene, weet wanneer ’n transaksie winsgewend gaan wees. Toe ’n Indonesiese handelaar hom dus 50 katoë aanbied teen ’n prys wat baie laer as die gewone prys is, het hy dit gretig gekoop. “Elkeen was in ’n gesogte skakering van sjokoladebruin, wat in twee gedeel is deur die kenmerkende ligte strook wat soos ’n kat se skrefie-pupil lyk”, berig Asiaweek. Maar dit blyk dat die edelstene se glans ’n ander oorsprong gehad het. Hulle is bestraal om hulle kleur te verhoog sodat dit hulle waarde kon laat toeneem. ’n Ander steen, wat by ’n juwelierstentoonstelling in Hongkong gevind is, het 25 keer meer straling gehad as die Asiatiese veiligheidsgrens vir straling. “Tot dusver is die probleem tot chrisoberilkatoog beperk”, sê die tydskrif.

Leesgewoontes

Brasiliane lees jaarliks gemiddeld 2,3 boeke, berig Jornal da Tarde. Nadat hulle skool verlaat het, het die meeste Brasiliane niks meer met boeke te doen nie. “Die eintlike probleem”, sê die sekretaris van die Departement van Kultuur, Ottaviano de Fiore, “is dat 60 persent van die boeke wat in Brasilië gelees word verpligte leeswerk is” vir kinders op skool. “Van die oorblywende 40 persent is die meeste boeke godsdiens- en esoteriese boeke, boeke oor seks of selfhelpboeke”, sê die koerant. De Fiore sê aangaande leesgewoontes: “Kinders kom in die gesin, op skool en om die TV bymekaar. As daar geen lesers in die gesin is nie, sal hulle daar nooit enige aansporing kry nie.” Hy voeg by: “Wat TV betref, is aansporing om te lees die laaste ding waaroor groot kanale hulle bekommer.”

“Selfgeskepte godsdiens”

Baie Latyns-Amerikaners beoefen ’n “selfgeskepte godsdiens”, sê die sosioloog Fortunato Mallimaci. Mense beweeg weg van kerke en geloofsbelydenisse af en voel dat hulle vry is om jogakursusse te volg, ’n boek oor Oosterse mistiek te lees, vergaderinge by te woon waar predikers aanbied om mense gesond te maak of om na Afro-Brasiliaanse plegtighede te gaan. “Dit beteken nie dat mense teenoor godsdiens onverskillig begin staan het nie. Hulle glo, maar hulle het hulle eie godsdiens geskep”, sê Mallimaci. Die sosioloog het die Vierde Vergadering van Lekesentrums in die Suidelike Helfte (van Latyns-Amerika) toegespreek en gesê dat “Katolisisme ’n herstruktureringsproses ondergaan ‘met ernstige interne verdeeldhede en konflikte’”, berig die ENI Bulletin.