Is volmaakte gesondheid net ’n droom?
WAS jy al ooit ernstig siek, of het jy al ’n ernstige operasie ondergaan? Indien wel, waardeer jy jou lewe waarskynlik nou selfs meer. Maar glo jy dat dit moontlik is om volmaakte gesondheid te geniet, ongeag wat jou fisiese toestand nou is? Dit lyk dalk onrealisties omdat slepende siektes soos kanker of hartsiekte so algemeen is. Trouens, die meeste van ons word nou en dan siek. Nogtans is volkome gesondheid nie net ’n droom nie.
Die mens is nie geskep om met siekte en die dood te worstel nie, maar eerder om blakende gesondheid te geniet. Om siekte en die dood teë te werk, het Jehovah derhalwe die grondslag vir volmaakte gesondheid en die ewige lewe gelê deur middel van die losprysofferande van Christus Jesus. “God het die wêreld so liefgehad dat hy sy enigverwekte Seun gegee het, sodat elkeen wat geloof in hom beoefen, nie vernietig sal word nie maar die ewige lewe kan hê” (Johannes 3:16). Diegene wat vir ewig in God se beloofde nuwe wêreld lewe, sal nie met swak gesondheid sukkel of oud word nie. Indien dit die geval is, wat sal dan met siektes gebeur?
Verligting van siekte
Die manier waarop Jesus Christus die siekes genees het, toon hoe dit moontlik is. Die volgende is oor die genesing van siektes gesê: “Die blindes sien weer, en die kreupeles loop rond, die melaatses word gereinig en die dowes hoor, en die dooies word opgewek, en aan die armes word die goeie nuus bekend gemaak” (Matteus 11:3-5). Ja, alle gestremdes wat na Jesus toe gegaan het, “is heeltemal gesond gemaak” (Matteus 14:36). Gevolglik was “die skare verbaas . . . toe hulle sien dat die stommes praat en die kreupeles loop en die blindes sien, en hulle het die God van Israel verheerlik”.—Matteus 15:31.
Ons kan werklik seker wees dat die mens tot volmaaktheid verhef sal word onder God se heerskappy en van alle geestes- en fisiese siektes genees sal wees, al kan niemand vandag sulke genesingsdade doen nie. God se belofte is in Openbaring 21:3, 4 opgeteken: “Kyk! Die tent van God is by die mense, en hy sal by hulle woon, en hulle sal sy volke wees. En God self sal by hulle wees. En hy sal elke traan van hulle oë afvee, en die dood sal daar nie meer wees nie, en ook verdriet en geskreeu en pyn sal daar nie meer wees nie. Die vorige dinge het verbygegaan.”
Stel jou ’n wêreld voor waar geen farmaseutiese nywerhede of hospitale, operasies of behandeling nodig is nie! Daarbenewens sal depressie en geestesiektes in die herstelde Paradys tot die verlede behoort. Die lewe sal ’n ware vreugde wees; en geluk ’n permanente gevoel. Trouens, God se oneindige krag sal die liggaam se vernuwende prosesse aan die gang sit, en die voordele van die losprys sal die sonde se aftakelende uitwerking uit die weg ruim. “Geen inwoner sal sê: Ek is siek nie.”—Jesaja 33:24.
Wat ’n wonderlike hoop—om volmaakte fisiese en geestelike gesondheid onder God se Koninkryk te geniet! Terwyl jy nou ’n gebalanseerde en gesonde lewenstyl handhaaf, kan jy uitsien na die seëninge van God se nuwe wêreld. Mag Jehovah ‘jou siel versadig met die goeie, en mag jou jeug weer nuut word soos dié van ’n arend’!—Psalm 103:5.