Van ons lesers
Inligtingsangs Ek het die reeks “Inligtingsangs—Hoe raak dit jou?” (8 Januarie 1998) gelees. Julle sê dat die oormaat inligting moontlik deels die gevolg is van die toename in nuus en tydskrifte. Ek dink dat julle tydskrif dalk tot hierdie oormaat bydra. Is dit nie ’n geval van die pot wat die ketel verwyt nie?
J. K., Verenigde State
Ons reeks het die oormaat “nuttelose” inligting blootgelê. “Ontwaak!” het beslis nie daartoe bygedra nie, aangesien sy verklaarde doel is om ‘dieper as die oppervlak te delf en op die ware betekenis van aktuele gebeure te wys’. Sulke inligting kan nouliks nutteloos genoem word.—RED.
Maria en die verrese Christus Ek skryf om te kla oor ’n artikel in “Ons beskou die wêreld”, naamlik “Het Maria eerste die verrese Christus gesien?” (8 Januarie 1998). Julle toon julle onkunde omtrent die Skrif, wat ook op ’n gebrek aan belangstelling in waarheid dui. Daar is baie dinge wat gebeur het en gesê is wat nie in die Bybel opgeteken is nie. Lees Johannes 21:25.
J. G., Verenigde State
Ons artikel het bloot verslag gelewer oor wat in die amptelike koerant van die Vatikaan, “L’Osservatore Romano”, gesê is. Volgens die koerant het pous Johannes-Paulus II gesê dat Maria “moontlik die eerste persoon was aan wie die verrese Jesus verskyn het”. Hoewel ons die reg van ons lesers respekteer om te glo wat hulle wil, is daar eenvoudig geen Bybelse bewyse vir so ’n stelling nie.—RED.
Troebadoers Die artikel “Die troebadoers—meer as net minnesangers” (8 Februarie 1998) was ’n deskundige ontleding van die rol wat hierdie digter-musikante in die Middeleeuse samelewing gespeel het. As ’n letterkunde-onderwyser het ek die Portugese troebadoers bestudeer, en julle artikel het my gehelp om hierdie kunsbeweging in sy hele konteks te sien. Artikels van hierdie gehalte verleen geloofwaardigheid aan julle tydskrif.
R. N. A., Brasilië
Ek moet erken dat dit inspanning van my geverg het om hierdie artikel te begin lees, maar toe ek eers begin het, het dit onmiddellik my aandag geboei. Ek was veral bly toe ek uitvind wie moontlik die gebruik van “dames eerste” begin het. In Japan word die gebruik van “dames eerste” nie gevolg nie, maar my man, wat as een van Jehovah se Getuies grootgemaak is, het hierdie gebruik getrou gevolg vandat ons verloof geraak het. (Ons is nou in ons vyfde jaar van getroude lewe.) Ek is baie gelukkig.
J. N., Japan
Blokkiesraaisels Ek wil julle opreg bedank vir die blokkiesraaisels. Hulle moedig ’n mens aan om jou Bybel uit te haal en die antwoorde op ’n eenvoudige en intelligente manier te vind.
N. C., Italië
Moeder en kind word herenig Die artikel “’n Unieke versoening” (22 Februarie 1998) het my diep geroer. Emosioneel gesproke was dit vir my belangrik om te weet waar ek vandaan kom. My ma en pa het nooit met mekaar getrou nie. Ek het dikwels oor my pa gewonder, maar ek het net kort antwoorde op my vrae gekry. Ek het my ma onlangs gevra wat my pa se volle naam was. Ek kon sy suster met behulp van ’n telefoonboek opspoor, en tot my verbasing het ek uitgevind dat sy een van Jehovah se Getuies is! Sy het verduidelik dat my pa in 1980 oorlede is en dat hy nooit getrou het nie. My ma en my tannie het my nogtans getrou bygestaan in my tyd van nood. Julle artikels het my ook gehelp om genesing te vind.
L. D., Verenigde State