Wie gaan ons aarde skoonmaak?

“EK VOORSPEL dat die woord ‘besoedeling’, wat ons nywerheid betref, teen die jaar 2025 grootliks uit ons volk se woordeskat sal verdwyn het.” Dit is wat die hoofbestuurder van ’n chemiese korporasie onlangs voorspel het. Glo jy dat dit sal gebeur? Indien wel, hoe sal dit teweeggebring word?

Dit is die begeerte na wins wat dikwels daartoe lei dat onveilige produkte op winkelrakke beland. Wette oor handelsgeheimhouding laat maatskappye wat plaagdoders vervaardig byvoorbeeld toe om sekere winsgewende formules geheim te hou deur hulle bestanddele te beskryf as “onreaktief”, ’n term wat maklik as “onskadelik” verstaan kan word. Maar “ten minste 394 onreaktiewe bestanddele is al as aktiewe plaagdoders gebruik”, berig die tydskrif Chemical Week. Tweehonderd-en-nege van hierdie bestanddele is gevaarlike besoedelstowwe, 21 is amptelik as kankerverwekkende stowwe geklassifiseer en 127 is ’n beroepsrisiko!

Veiligheidsbeheermaatreëls deur regerings was weliswaar al dikwels voordelig. Maar volgens een skrywer is regerings hoofsaaklik besorg oor “ekonomiese groei en industriële winsgewendheid”. Hulle kom dus telkens voor ’n kompromis te staan—risiko’s versus voordele. Die wesenlike gevolg is ‘gekontroleerde besoedeling’.

Tot wie kan ons ons dan wend vir antwoorde? Een van Jehovah se Getuies het hierdie vraag aan ’n vriendelike huisbewoner gevra. Die persoon het sy vertroue in menseleiers en wetenskaplikes uitgedruk deur te sê: “Hulle sal dinge eendag regmaak.”

“Maar wie is hulle?” het die Getuie gevra. “Is hulle nie maar net mense soos ek en jy nie? Hulle het dalk wel meer geleerdheid, maar hulle het hulle beperkings, hulle swakhede. Hulle maak foute.” Voeg hierby die ontsaglike probleme waarvoor hulle te staan kom sowel as die hebsug en korrupsie in die mensegemeenskap.

Glo jy ook dat hulle dinge sal regmaak? Die lang geskiedenis van die mens se onvermoë om dit te doen, boesem nie vertroue in nie. Die tydskrif Outdoor Life het gesê: “Wetenskaplikes en die instansies waaraan hulle verbonde is, het baie meer sukses daarmee om besoedelingsprobleme te bestudeer as om hulle op te los.” Watter vooruitsigte is daar dat mense hierdie ernstige probleem kan oplos?

Kan mense dit op hulle eie doen?

Die bekamping van chemiese besoedeling is nie net vir plaaslike owerhede ’n probleem nie. Die rede hiervoor is dat chemiese stowwe wat in een land gebruik word mense in naburige lande beïnvloed, selfs mense regoor die wêreld! En mense kon nie met welslae saamwerk om wêreldprobleme soos hierdie op te los nie. Die Bybel toon waarom wanneer dit sê: “Die een mens heers oor die ander tot sy ongeluk” (Prediker 8:9). Waarom kan mense nie met welslae oor hulleself heers nie? Die Bybel verduidelik weer eens: “Dit behoort nie aan die mens wat loop om selfs sy voetstappe te rig nie” (Jeremia 10:23, NW). Wat beteken dit?

Dit beteken dat mense nooit veronderstel was om onafhanklik van God se leiding oor hulleself te heers nie. Mense het weliswaar al merkwaardige goed gedoen—hulle het pragtige huise gebou, slim uitvindsels gemaak en selfs na die maan gereis—en tog het hulle nie die vermoë om sonder Goddelike leiding oor hulleself te heers nie. Dit is wat die Bybel leer, en die geskiedenis bevestig die akkuraatheid van die Bybel.

’n Skoon aarde—Hoe?

Ons Skepper, Jehovah God, was nog altyd besorg oor die mensdom en hierdie aarde, wat hy vir die mens voorberei het. Nadat hy mense geskep het, het hy opdrag gegee dat hulle vir die aarde en die lewe daarop moet sorg (Genesis 1:27, 28; 2:15). Later, nadat die eerste egpaar ongehoorsaam aan sy opdragte was, het hy instruksies aan die eertydse nasie Israel gegee oor hoe hulle vir die land moes sorg, met inbegrip van die vereiste dat dit elke sewe jaar ’n volle jaar lank braak moes lê. Dít het die land toegelaat om sy vrugbaarheid te herwin (Exodus 23:11; Levitikus 25:4-6). Maar die mense het gierig en ongehoorsaam aan God geword. Hulle en die land het daaronder gely.

Chemiese besoedeling soos ons vandag het, was natuurlik nie destyds moontlik nie. En tog is die land verderf omdat die Israeliete dit nie volgens God se voorneme laat rus het nie, en onskuldige mense het gely. Daarom het God die Babiloniërs toegelaat om Israel te oorwin en die nasie 70 jaar lank in ballingskap na Babilon te neem. Hierdie straf het ook die land laat rus sodat dit kon herstel.—Levitikus 26:27, 28, 34, 35, 43; 2 Kronieke 36:20, 21.

Hierdie geskiedenis leer ons dat God mense aanspreeklik hou vir wat hulle aan die aarde doen (Romeine 15:4). Trouens, God belowe dat hy ‘die verderwers van die aarde gaan verderf’ (Openbaring 11:18). Dit is interessant dat die Bybel die soort mense beskryf wat tot hierdie “verderf” bydra. Hulle oorheersende eienskappe, soos dit in die Bybel in 2 Timoteus 3:1-5 opgenoem word, sluit so ’n beheptheid met geld en hulleself in dat hulle baie min omgee vir God, en by uitbreiding, vir sy skepping, wat hulle medemens insluit.

Hierdie twee Bybeltekste—2 Timoteus 3:1-5 en Openbaring 11:18—dui dus op twee gegronde gevolgtrekkings. Eerstens, besoedelde verstande lei tot ’n besoedelde aarde. En tweedens, God gaan ingryp om hierdie planeet en godvresende mense te red wanneer albei vorme van besoedeling ten volle ontwikkel het. Hoe sal God ingryp?

Deur sy profeet Daniël het God voorspel: “In die dae van dié konings [klaarblyklik ’n verwysing na hedendaagse regerings] sal die God van die hemel ’n koninkryk verwek wat . . . al daardie koninkryke [sal] verbrysel en daar ’n einde aan maak, maar self sal dit vir ewig bestaan” (Daniël 2:44). Daardie Koninkryk is ’n werklike wêreldregering. Jesus Christus het sy volgelinge geleer om vir daardie regering te bid toe hy gesê het: “Julle moet dan só bid: ‘Ons Vader in die hemele, . . . laat u koninkryk kom. Laat u wil geskied, soos in die hemel, so ook op die aarde.’”—Matteus 6:9, 10.

Onder die liefdevolle toesig van God se Koninkryk sal die aarde se bewoners die onuitspreeklike voorreg geniet om die hele planeet ’n paradys te maak. Die lug sal vars wees, strome sal skoon wees en die grond sal onbesoedelde oeste in oorvloed lewer (Psalm 72:16; Jesaja 35:1-10; Lukas 23:43). Daarna belowe die Bybel: “Aan die vorige dinge [die siektes, lyding, besoedeling en al die ander ellendes van vandag] sal nie gedink word en hulle sal in die hart nie opkom nie.”—Jesaja 65:17.

[Prent op bladsy 10]

’n Skoon aarde—sal jy daar wees?