Jou brein—Hoe kan jy dit ten beste benut?
Terwyl jy hierdie woorde lees, roep jou brein herinneringe op wat jare gelede bewaar is toe jy die eerste keer leer lees het. Maar om op ’n verstandige en sorgvuldige wyse te ontleed wat jy leer, moet jy die brein se denkvermoë ontwikkel.
WETENSKAPLIKES het ontdek dat die verbindings tussen die brein se neurone voortdurend verander. As dit nie gebruik of gestimuleer word nie, gaan die neurone en neuronverbindings tot niet. “Die brein verbeter met gebruik”, sê ’n onlangse verslag. “Vir diegene wat bekommerd is oor die toestand van hulle brein—of dit in ’n goeie toestand wil hou—is die beste raad blykbaar om jou verstand te voed en baie denkoefeninge te doen.”
Denkoefeninge noodsaaklik
Die waarde van “baie denkoefeninge” word toegelig deur wat wetenskaplikes omtrent jong kinders ontdek het. By geboorte is babas nie gewoonlik blind nie. Hulle moet eenvoudig die vermoë ontwikkel om te sien. Aanvanklik kan hulle hulle oë net op voorwerpe fokus wat naby is. Later ontwikkel hulle stereoskopiese visie namate hulle verskille begin skat in die beelde wat hulle oë oordra. Maar as een oog gedurende die tyd wat dit ontwikkel, geblinddoek word, kan die kind grootword met swak sig in daardie oog. Waarom? Omdat die inligting van die ander oog die visuele korteks van die brein oorheers.
Speelgoed wat die kind se belangstelling prikkel, help om die brein voor te berei om te verstaan wat in die kleuter se omgewing aangaan.
Onlangse navorsing dui ook daarop dat musiek met die ontwikkeling van taal- en sosiale vaardighede kan help. Kinders wat ekstra musieklesse ontvang het, was beter met tale en het makliker leer lees as diegene wat dit nie gehad het nie. Diegene wat saam musiek gespeel het, het ook beter met mekaar saamgewerk.
Hoewel die brein in twee helftes, ’n linker- en regterkant, verdeel is, speel elke deel ’n noodsaaklike rol. Die regterkant help ons byvoorbeeld oor die algemeen om emosies te ervaar en melodieë te verstaan. Nietemin is die twee dele onderling verbind. Toe musiekstudente hulle studies begin het, sê een verslag, is hoofsaaklik hulle regterbreinhemisfeer gestimuleer wanneer hulle na musiek geluister het. Drie jaar later, ná breedvoerige besprekings van musiekteorie en -komposisie, was hulle linkerhemisfeer besig om te ontleed wat hulle gehoor het. Gevolglik is denkoefeninge nodig om die hele brein te stimuleer sodat analitiese en emosionele dele betrokke raak.
‘Voed jou verstand’
Baie mense het die opvattings geleer van die godsdiens waaraan hulle gesin behoort. Maar toe hulle oor die leringe van hierdie kerke begin redeneer het, het hulle opgelet dat daar teenstrydighede en geen ware doel is nie. Dit het daartoe gelei dat party na ’n godsdiens begin soek het wat hulle vrae beantwoord en hulle ook ’n betroubare hoop vir die toekoms gee.
“Van my vroeë tienerjare af is my lewe vol hartseer en probleme”, verduidelik Jean. “Hoewel ek ’n lidmaat van die Anglikaanse Kerk was, het ek nie leiding of gemoedsrus gevind nie. Baie leringe van die kerk het my gepla—byvoorbeeld die helse vuur en die toestand van die dooies. Geestelikes het vir my gesê dat God my seker straf.
“Op hierdie stadium het ek besluit om die Anglikaanse Kerk te verlaat, en later is ek met ’n man getroud wat nie aan enige kerk behoort het nie. Sy geweld by die huis het my angstig gemaak.” Jean het toe besluit om selfmoord te pleeg. Maar voordat sy dit gedoen het, het sy ’n laaste keer tot God gebid. Op daardie presiese oomblik was daar ’n klop aan haar deur. Toe sy die deur oopmaak, was daar twee vroue wat Jehovah se Getuies is. Hulle het gesê dat die lewe ’n doel het, en hulle het Bybellektuur by Jean gelaat wat haar sou help om meer uit te vind.
“Nadat hulle weg is”, gaan Jean voort, “het ek ingegaan en onmiddellik die boek begin lees wat hulle by my gelaat het. Ek het gevoel asof ’n sluier voor my oë verwyder is en dat ek vir die eerste keer kon sien. Hoe meer ek gelees het, hoe duideliker het dit vir my geword dat dit die waarheid is.” Jean het bevredigende voedsel vir haar verstand gevind.
Die Bybelboek Spreuke beklemtoon die waarde van onderskeidingsvermoë en Goddelike wysheid. Maar om dit te verkry, verg persoonlike inspanning en ’n begeerte om aangaande God te leer. Spreuke hoofstuk 2 rig hierdie uitdaging aan ons: “My seun, as jy my woorde aanneem en my gebooie by jou bewaar, sodat jy jou oor laat luister na wysheid, jou hart neig tot verstand; ja, as jy na die insig roep, na die verstand jou stem verhef, as jy daarna soek soos na silwer en dit naspeur soos verborge skatte, dan sal jy die vrees van die HERE verstaan en die kennis van God vind want die HERE gee wysheid, uit sy mond kom kennis en verstand.”—Spreuke 2:1-6.
Die opvoedkundige William Lyon Phelps het van die Bybel geskryf: “Almal wat ’n deeglike kennis van die Bybel het, kan waarlik geleerd genoem word.” Kom in aanraking met Jehovah se Getuies in jou omgewing of skryf na die adres naaste aan jou op bladsy 5. Hulle sal jou met graagte help om uit te vind hoe die Bybel jou vrae kan beantwoord en ’n betroubare bron van volop verstandelike voedsel kan wees. Gebruik jou brein se denkvermoë om die patroon van waarheid te verstaan wat in die Bybel uiteengesit word. As jy op hierdie manier jou brein ten beste benut, kan dit tot jou ewige geluk lei.