Ontvoering—die onderliggende oorsake
ONTVOERINGS het ’n hedendaagse plaag geword. Maar dieselfde geld vir moord, verkragting, diefstal, kindermolestering en selfs volksmoord. Waarom het die lewe so gevaarlik geword dat mense dikwels bang is om saans uit hulle huise te kom?
Die onderliggende oorsake van hierdie misdaadepidemie, insluitende ontvoerings, hou verband met diepgewortelde gebreke in die mensegemeenskap. Het jy geweet dat die Bybel hierdie gevaarlike tye byna 2 000 jaar gelede voorspel het? Kyk gerus wat in 2 Timoteus 3:2-5 voorspel is.
“Mense sal liefhebbers van hulleself wees, liefhebbers van geld, aanmatigend, hoogmoedig, lasteraars, ongehoorsaam aan ouers, ondankbaar, dislojaal, sonder natuurlike geneentheid, nie bereid tot enige ooreenkoms nie, kwaadsprekers, sonder selfbeheersing, wreedaardig, sonder liefde vir goedheid, verraaiers, eiesinnig, opgeblase van trots, liefhebbers van genot eerder as liefhebbers van God, wat ’n vorm van godvrugtige toegewydheid het maar die krag daarvan verloën.”
Jy stem waarskynlik saam dat hierdie woorde wat lank gelede opgeteken is die situasie vandag uiters akkuraat beskryf. In ons leeftyd het ingekankerde euwels in die mensegemeenskap met mening uitgebreek. Dit is betekenisvol dat die beskrywing hierbo van mense se betreurenswaardige gedrag met die volgende woorde in die Bybel ingelui word: ‘In die laaste dae sal daar kritieke tye wees’ (2 Timoteus 3:1). Laat ons net drie van die vernaamste gebreke van die samelewing ondersoek wat tot die epidemie van ontvoerings bygedra het.
Probleme met wetstoepassing
“Omdat die oordeel oor ’n verkeerde daad nie gou voltrek word nie, daarom is die hart van die mensekinders in hulle vol om kwaad te doen.”—Prediker 8:11.
Baie polisiemagte het nie die middele om die misdaadepidemie die hoof te bied nie. In baie lande is ontvoering dus ’n winsgewende misdaad. In 1996 is net 2 persent van alle Colombiaanse ontvoerders geregtelik vervolg. In Mexiko is ten minste R1,2 miljard in 1997 aan losprysgeld betaal. Party ontvoerders in die Filippyne het selfs tjeks vir losprysbetalings aanvaar.
Daarbenewens word die doeltreffende bekamping van misdaad soms deur korrupsie in wetstoepassingsinstansies gedwarsboom. Hoofde van keurafdelings vir die voorkoming van ontvoerings in Mexiko, Colombia en die voormalige Sowjetrepublieke is self al van ontvoering beskuldig. Die voorsitter van die Filippynse senaat, Blas Ople, sê in die tydskrif Asiaweek amptelike syfers toon dat werkende of afgetrede polisiemanne of soldate by 52 persent van die ontvoerings in die Filippyne betrokke is. ’n Berugte Mexikaanse ontvoerder het glo “’n muur van amptelike beskerming opgebou deur omkoopgeld aan munisipale, staats- en federale polisieamptenare en aanklaers te betaal”.
Armoede en maatskaplike onregverdigheid
“Weer het ek gesien al die verdrukkinge wat onder die son plaasvind, en kyk, daar was trane van verdruktes, en vir hulle was daar geen trooster nie; en aan die kant van hulle verdrukkers was mag.”—Prediker 4:1.
Baie mense bevind hulle vandag in wanhopige ekonomiese en maatskaplike situasies, en hulle is dikwels die mense wat ander ontvoer. In ’n wêreld waar die kloof tussen ryk en arm voortdurend wyer word en waar die geleenthede om op ’n eerlike manier geld te verdien dikwels skaars is, sal ontvoering dus ’n versoeking bly. Solank daar verdrukking is, sal ontvoering ’n manier wees om terug te slaan en die aandag te vestig op wat as ’n ondraaglike situasie beskou word.
Hebsug en ’n gebrek aan liefde
“Die liefde vir geld is ’n wortel van allerhande skadelike dinge” (1 Timoteus 6:10). “Weens die toename in wetteloosheid sal die liefde van die meeste verkoel.”—Matteus 24:12.
Regdeur die geskiedenis het die liefde vir geld mense afskuwelike dinge laat doen. En moontlik kommersialiseer geen ander misdaad menslike angs, verdriet en wanhoop in dieselfde mate as ontvoering nie. Vir baie is dit hebsug—die liefde vir geld—wat hulle dryf om ’n vreemdeling wreed te mishandel en te martel en sy gesin weke, maande en soms jare lank so ’n nagmerrie te laat deurmaak.
Iets is beslis baie verkeerd met ’n samelewing wat geld beklemtoon en menslike waardes vertrap. Hierdie situasie voorsien ongetwyfeld ’n broeiplek van allerhande soorte misdaad, insluitende ontvoering.
Beteken dit dat ons in “die laaste dae” is waarvan die Bybel praat? Indien wel, wat sal dit vir die aarde en vir ons beteken? Is daar ’n oplossing vir die verskriklike probleme waarmee die mensdom te kampe het, wat ontvoering insluit?
[Venster/Prent op bladsy 8]
Niks nuuts nie
Die Mosaïese Wet het reeds in die 15de eeu v.G.J. die doodstraf vir ontvoering opgelê (Deuteronomium 24:7). Julius Caesar is in die eerste eeu v.G.J. vir ’n losprys ontvoer, en so ook Richard I, die Leeuehart, koning van Engeland, in die 12de eeu G.J. Die grootste losprys wat nog betaal is, was die 24 ton goud en silwer wat die Inkas in 1533 aan die Spaanse veroweraar Francisco Pizarro gegee het vir die vrylating van hulle gevange leier Atahuallpa. Die Spaanse veroweraars het hom nietemin verwurg.
[Prent op bladsy 9]
Ten spyte van die polisie se pogings is ontvoerings nog steeds aan die orde van die dag