Ontvoering—’n wêreldwye bedryf
GEDURENDE die afgelope dekade was daar wêreldwyd ’n merkbare toename in ontvoerings. Een verslag sê dat daar tussen 1968 en 1982 byna duisend gyselaars in 73 lande aangehou is. Maar in die laat negentigerjare is daar elke jaar na raming 20 000 tot 30 000 mense ontvoer.
Ontvoering is ’n misdaad wat van Rusland tot die Filippyne blykbaar in die mode is onder misdadigers, want ontvoerders staan gereed om enigiets te gryp wat beweeg. By een geleentheid is ’n baba ontvoer wat skaars ’n dag oud was. In Guatemala is ’n 84-jarige vrou in ’n rolstoel ontvoer en twee maande lank aangehou. In Rio de Janeiro gryp straatboewe mense sommer van die straat af, en hulle eis soms net R600 as losprys.
Dit lyk nie eens of diere veilig is nie. Jare gelede het ’n paar geharde misdadigers in Thailand ’n werkolifant van ses ton ontvoer en ’n losprys van R9 000 geëis. Bendes misdadigers in Mexiko moedig hulle jong lede blykbaar aan om te oefen om troeteldiere en huisdiere te ontvoer sodat hulle genoeg ondervinding kan opdoen voordat hulle mense probeer ontvoer.
In die verlede het ontvoerders hulle hoofsaaklik op die rykes toegespits, maar tye het verander. ’n Verslag van Reuters sê: “Ontvoering het ’n alledaagse gebeurtenis in Guatemala geword, waar mense van die goeie ou dae praat toe linksgesinde rebelle hulle net op ’n handjievol ryk sakemanne toegespits het. Nou is ryk en arm, oud en jonk, teikens vir bendes wat mense ontvoer.”
Hoëprofielsake kry gewoonlik wye mediadekking, maar verreweg die meeste ontvoerings word sonder publisiteit opgelos. Trouens, daar is verskeie redes waarom lande “dit nie juis bekend wil laat word dat hulle ’n probleem met ontvoerings het nie”. Die volgende artikel sal ’n paar van hierdie redes bespreek.
[Kaart op bladsy 3]
(Sien publikasie vir oorspronklike teksuitleg)
MEXIKO
Met sowat 2 000 mense wat elke jaar ontvoer word, is ontvoering “’n kleinsake-onderneming” genoem.
GROOT BRITTANJE
Ontvoerings-versekering by Lloyd’s of London het sedert 1990 jaarliks met 50 persent gestyg.
RUSLAND
In die Kaukasusstreek van suidelike Rusland alleen het die aantal ontvoerings toegeneem van 272 in 1996 tot 1 500 in 1998.
FILIPPYNE
Volgens “Asiaweek” “is die Filippyne waarskynlik die ontvoeringshoofstad van Asië”. Meer as 40 georganiseerde bendes wat mense ontvoer, is daar bedrywig.
BRASILIË
In een jaar het ontvoerders daar na bewering R7,3 miljard aan losprysgeld ingepalm.
COLOMBIA
In onlangse jare is duisende elke jaar ontvoer. In Mei 1999 het rebelle gedurende die mis honderd gemeentelede ontvoer.
[Erkenning]
Mountain High Maps® Copyright © 1997 Digital Wisdom, Inc.