Ontvoering—Is daar ’n oplossing?
“DIE ontvoerings het ’n punt bereik waar dit vir die hele nasie ondraaglik is, en die hele gemeenskap moet hierdie euwel bestry”, het die eerste minister van Tsjetsjnja uitgeroep toe hy belowe het om hierdie plaag met wortel en tak uit te roei in sy republiek in Rusland wat deur ontvoerings geteister word.
Kan ontvoerings met wortel en tak uitgeroei word? Die doelwit is prysenswaardig, maar die vraag is: Hoe?
Pogings wat aangewend word
Die Colombiaanse owerheid het 2 000 geheime agente, 24 staatsaanklaers en selfs ’n spesiale teenontvoeringskoördineerder aangestel net om ontvoerings te bekamp. In Rio de Janeiro, Brasilië, het ongeveer 100 000 mense aan ’n protesoptog teen al die ontvoerings in die stad deelgeneem. In Brasilië en Colombia het paramilitêre groepe familielede van ontvoerders uit weerwraak ontvoer. En sommige Filippyne het die reg in eie hande geneem—hulle het ontvoerders opgehang!
Die Guatemalaanse owerheid het die doodstraf vir ontvoerders ingestel, en die president het die leër gemobiliseer om die epidemie van ontvoering stop te sit. In Italië het die regering streng maatreëls getref om ontvoerings te voorkom deur dit onwettig te maak om ’n losprys te betaal en deur op geld en eiendom beslag te lê om te keer dat familielede die losprys betaal. Italiaanse amptenare spog dat hierdie maatreëls bygedra het tot ’n afname in ontvoerings. Maar kritici sê dat gesinne as gevolg daarvan ontvoerings in die geheim probeer oplos en dat dit die amptelike aantal ontvoerings minder maak. Privaat sekuriteitsraadgewers reken dat die aantal ontvoerings in Italië sedert die tagtigerjare in werklikheid verdubbel het.
Baie voorstelle—min oplossings
Vir baie gesinne van ontvoeringslagoffers is daar net een oplossing—om hulle geliefdes so gou moontlik los te koop. Maar deskundiges waarsku dat ontvoerders kan dink dat die gesin ’n maklike teiken is en ’n tweede keer kan terugkom as die losprys hoog is en te vinnig betaal word. Of hulle vra dalk vir ’n tweede losprys voordat hulle die slagoffer vrylaat.
Party gesinne het ’n groot losprys betaal en toe uitgevind dat die slagoffer alreeds dood is. Deskundiges sê dus dat ’n mens nooit ’n losprys moet betaal of moet onderhandel voordat bewys gelewer is dat die slagoffer lewe nie. Sulke bewyse kan in die vorm van ’n antwoord op ’n vraag wees wat net die slagoffer kan gee. Party gesinne vra ’n foto van die slagoffer wat ’n onlangse koerant vashou.
Wat van reddingspogings? Dit gaan dikwels met groot risiko’s gepaard. “Nege-en-sewentig persent van alle gyselaars in Latyns-Amerika word tydens reddingspogings doodgemaak”, sê Brian Jenkins, ’n deskundige op die gebied van ontvoerings. Maar soms is reddingspogings wel suksesvol.
Dit is geen wonder dat baie oplossings die aandag op die voorkoming van ontvoering vestig nie. Dit is nie net regeringsowerhede wat betrokke is by pogings om ontvoerings te voorkom nie. Koerante leer mense hoe om te keer dat hulle ontvoer word, hoe om uit ’n bewegende voertuig te spring en hoe om ontvoerders sielkundig te uitoorlê. Verweerkunssentrums bied kursusse aan in ontvoeringsverdediging. Maatskappye verkoop piepklein seintoestelle van R91 000, wat in kinders se tande ingeplant kan word om die polisie te help om die kinders op te spoor indien hulle ontvoer sou word. Vir diegene wat dit kan bekostig, maak motorvervaardigers “ontvoeringsbestande” motors met traangashouers, skietgate, koeëlvaste vensters, bande wat nie stukkend gesny kan word nie en toestelle wat ’n olielaag op die pad vrystel.
Party rykes sien lyfwagte as ’n oplossing. Maar die sekuriteitsdeskundige Francisco Gomez Lerma sê die volgende oor die situasie in Mexiko: ‘Dit help nie om lyfwagte te hê nie omdat hulle aandag trek en kop in een mus met ontvoerders kan wees.’
Die ontvoeringsprobleem is so kompleks en is so diepgewortel dat niks wat die mens kan doen blykbaar genoeg is om dit uit die weg te ruim nie. Is daar dan geen ware oplossing vir die probleem nie?
’n Oplossing is beskikbaar
Hierdie tydskrif het al herhaaldelik getoon wat die enigste ware oplossing vir al sulke probleme is waarmee mense te kampe het. God se Seun, Jesus Christus, het na die oplossing verwys toe hy sy volgelinge geleer bid het: “Laat u koninkryk kom. Laat u wil geskied, soos in die hemel, so ook op die aarde.”—Matteus 6:10.
Ons het beslis ’n regverdige wêreldregering nodig om die aangeleenthede van die aarde se groot verskeidenheid mense te beheer—ja, die Koninkryk van God waarvan Jesus gepraat het. Aangesien die mens nie so ’n regering tot stand kon bring nie, sal dit verstandig wees as ons ons wend tot ons Skepper, Jehovah God. Sy Woord, die Bybel, sê dat hy hom voorgeneem het om juis dit te doen.—Psalm 83:18, NW.
Die profeet Daniël het Jehovah se voorneme opgeteken en gesê: “In die dae van dié konings sal die God van die hemel ’n koninkryk verwek wat in ewigheid nie vernietig sal word nie . . . ; dit sal al daardie koninkryke verbrysel en daar ’n einde aan maak, maar self sal dit vir ewig bestaan” (Daniël 2:44). Die Bybel beskryf hoe hierdie regering van God progressiewe stappe sal doen om alle misdaad, insluitende ontvoering, met wortel en tak uit te roei.
Behoorlike onderrigting noodsaaklik
Jy sal ongetwyfeld saamstem dat dit noodsaaklik is om gesonde waardes by mense in te skerp om die probleem van ontvoering te kan oplos. Dink byvoorbeeld aan die uitwerking wat dit op die mensegemeenskap sal hê as almal die volgende vermaning in die Bybel gehoorsaam: “Laat julle lewenswyse vry wees van die liefde vir geld, terwyl julle tevrede is met die teenwoordige dinge” (Hebreërs 13:5). “Julle moet niemand enigiets verskuldig wees nie, behalwe om mekaar lief te hê.”—Romeine 13:8.
Jy kan ’n voorsmakie kry van hoe die lewe kan wees deur te kyk na die onderrigtingsprogram wat deur Jehovah se Getuies in meer as 230 lande regoor die wêreld tot stand gebring is. Hierdie program het ’n heilsame uitwerking op baie mense gehad wat voorheen hebsugtig of gevaarlike misdadigers was. Een voormalige ontvoerder het gesê: “Ek het mettertyd besef dat ek my ou persoonlikheid sou moes aflê en my met ’n nuwe persoonlikheid sou moes beklee—een wat sagmoedig en soos Christus Jesus s’n was—as ek God wou behaag.”
Maar selfs ’n goeie onderrigtingsprogram sal nie alle misdadigers kan verander nie, miskien nie eens die meerderheid nie. Wat sal met dié gebeur wat weier om te verander?
Verwydering van oortreders
Moedswillige oortreders sal nie toegelaat word om onderdane van God se Koninkryk te wees nie. Die Bybel sê: “Weet julle nie dat onregverdiges God se koninkryk nie sal beërf nie? Moenie mislei word nie. Geen hoereerders . . . of gierigaards . . . of afpersers sal God se koninkryk beërf nie” (1 Korintiërs 6:9, 10). ‘Die opregtes sal die land bewoon, maar die goddelose sal uit die land uitgeroei word.’—Spreuke 2:21, 22.
Volgens God se Wet in die ou tyd moes ’n onberouvolle ontvoerder die doodstraf kry (Deuteronomium 24:7). Hebsugtige mense, soos ontvoerders, sal nie ’n plek in die Koninkryk van God hê nie. Misdadigers kry dit dalk vandag reg om die gereg te ontduik, maar hulle sal nie God se oordeel kan ontduik nie. Alle kwaaddoeners wat onder Jehovah se regverdige Koninkryksheerskappy wil leef, sal hulle lewe moet verander.
Dit spreek vanself dat daar altyd misdaad sal wees solank as wat die toestande bestaan wat tot misdaad aanleiding gee. Maar God se Koninkryk sal dit nie toelaat nie, want die Bybel belowe: ‘Die koninkryk sal al daardie koninkryke verbrysel en daar ’n einde aan maak’, en so ook aan alle kwaaddoeners. Hierdie Bybelprofesie sê verder dat God se Koninkryk vir ewig sal bestaan (Daniël 2:44). Stel jou net voor watter veranderinge sal plaasvind!
’n Nuwe wêreld van regverdigheid
Kom ons kyk na ’n ander Bybelprofesie. Dit is een wat die toekoms in hierdie pragtige woorde beskryf: “Hulle sal huise bou en bewoon, en wingerde plant en die vrug daarvan eet: hulle sal nie bou dat ’n ander dit bewoon nie; hulle sal nie plant dat ’n ander dit eet nie; want die dae van my volk sal wees soos die dae van die bome, en my uitverkorenes sal die werk van hulle hande self geniet.”—Jesaja 65:21, 22.
Die Koninkryk van God sal die hele planeet verander. Almal sal die lewe ten volle kan geniet, en hulle sal hulle natuurlike vermoëns kan ontwikkel deur bevredigende werk te doen en aan heilsame ontspanning deel te neem. Wêreldwyd sal toestande heers waarin niemand ooit eens daaraan sal dink om sy naaste te ontvoer nie. ’n Gevoel van absolute veiligheid sal heers (Miga 4:4). Onder God se Koninkryk sal ontvoering, wat vandag ’n wêreldwye gevaar is, dus iets van die verlede wees, iets waaraan niemand eens meer sal dink nie.—Jesaja 65:17.
[Prent op bladsy 10]
“Niemand sal hulle laat bewe nie.”—Miga 4:4, NW