Jou hare van naderby beskou

“IN ELKE era en kultuur”, sê een naslaanwerk, “openbaar hare iets omtrent die individu.” Dit is dan geen wonder nie dat die meeste mense baie daarin belangstel om hulle hare gesond en mooi te hou.

Ontwaak! het vier ervare haarkapsters ’n paar algemene vrae oor die samestelling en versorging van hare gevra. Daar is blykbaar baie meer aan jou hare verbonde as wat jy kan sien.

Haargroei en haarverlies

V: Waaruit bestaan hare?

A: Hare bevat keratien, ’n veselagtige proteïen. Elke haar groei uit ’n insinking in die kopvel wat ’n haarsakkie genoem word. By die basis van elke haarsakkie is die haarpapil, wat heelwat bloed bevat. Die haarpapil vervaardig haarselle wat opwaarts in die haarsakkie beweeg en tot hare verhard.

V: Oor die algemeen word daar geglo dat hare vinniger groei wanneer dit gesny word. Is dit waar?

A: Nee. Party mense dink dat hare deur die liggaam gevoed word soos wat die takke van ’n boom deur die stam gevoed word. Maar sodra die hare uit die kopvel groei, is dit dooie weefsel. Die haargroei word dus nie beïnvloed wanneer die hare gesny word nie.

V: Waarom word hare grys?

A: Die binneste laag van die hare bevat ’n pigment wat hare hulle kleur gee. Namate die pigmentselle doodgaan, word die hare grys; dit is ’n deel van die verouderingsproses. Hare wat op ’n vroeë ouderdom grys word, word dalk deur gene of ’n siekte veroorsaak. Dit is egter ’n mite dat hare oornag grys sal word. Pigment word onder die kopvel in die hare neergelê. Tyd is dus nodig vir die gryshare om te groei (ongeveer 1,25 sentimeter per maand) en bo die kopvel te verskyn.

V: Waarom verloor ’n mens van jou hare?

A: Haarverlies is ’n deel van die natuurlike haarsiklus. Almal verloor daagliks gemiddeld 50 tot 80 hare. Maar ’n bles onder mans is oorerflik, en dit word blykbaar deur ’n hormoonwanbalans veroorsaak, wat tot permanente haarverlies lei. Abnormale haarverlies word alopesie genoem.a

V: Party sê dat hare ’n mens se gesondheid weerspieël. Het julle dit al opgemerk?

A: Ja. Onder die kopvel voed bloed die hare. Gesonde hare weerspieël derhalwe dat die bloedvoorraad voldoende is. Maar iemand wat nie voedsame kos eet nie of te veel drink, vind dalk dat sy hare verswak en maklik breek, aangesien die bloedtoevoer sy hare nie behoorlik kan voed nie. Haarverlies of verswakte hare kan selfs ’n vroeë teken van siekte of swangerskap wees.

Hou jou kopvel en hare gesond

V: Verduidelik hoe die hare en kopvel gewas moet word.

A: Ondervinding het getoon dat die meeste mense wat probleme met ’n droë kopvel het, hulle hare te veel was. Die olie in jou hare versamel natuurlik vuilheid en stukkies vel, en dit kan die oliekanaaltjies verstop wat na die haarsakkies lei. Dit is dus nodig om jou hare gereeld te was. Maar hierdie natuurlike olies beskerm jou vel ook teen skadelike bakterieë en hou die nodige vog binne. As jy jou hare te veel was, was jy hierdie beskermende laag van jou kopvel af en veroorsaak jy probleme soos ’n droë kopvel. Die meeste deskundiges beveel aan dat ’n mens net jou kopvel of hare moet was wanneer dit vuil is. Mense met olierige hare moet hulle hare meer dikwels was as diegene met normale of droë hare.

Wanneer jy jou hare was, moet jy jou kopvel masseer. Sodoende raak jy ontslae van dooie selle op die kopvel en bevorder jy behoorlike bloedsomloop, wat jou hare voed. Onthou om jou hare deeglik af te spoel! As jy nie jou hande afspoel nadat jy hulle met seep gewas het nie, sal jou vel skurf word en bars. Net so kan sjampoe wat nie behoorlik afgespoel word nie die kopvel uitdroog en afskilfer.

V: Hoe kan ’n droë kopvel behandel word?

A: Drink baie water, en eet voedsame kos. Dit voorsien jou vel van vog en voed die bloedtoevoer. Gebruik ’n matige sjampoe, en masseer jou kopvel gereeld. Party mense gebruik ook haaropknappers en room om die kopvel te bevogtig.

Wanneer jy ’n haarkapster besoek

V: Wat moet ’n mens in gedagte hou wanneer jy ’n haarkapster besoek?

A: As jy jou haarstyl wil verander, moet jy ’n prentjie saambring van die styl wat jy wil hê en miskien een van die styl wat jy nie wil hê nie. Sê presies wat jy wil hê en hoeveel tyd jy bereid is om elke dag aan jou hare te bestee, aangesien sommige haarstyle meer aandag as ander verg. Hou ingedagte dat dit vir ’n haarkapster gewoonlik twee of drie besoeke neem om aan jou hare gewoond te raak en om goeie kommunikasie met jou te bewerkstellig. Moet dus nie te gou moed opgee met jou haarkapster nie!

Wat jou hare openbaar

Haarsorg en haarstyl is maniere om jou innerlike gevoelens uit te druk. Hare is al gesny, verleng, reguit gemaak, gekrul, gekleur en in verskeie style gesny om aan modegiere, godsdiensoortuigings en selfs maatskaplike en politieke idees te voldoen. Beskou jou hare van naderby. Wat openbaar dit omtrent jou? Gesonde hare wat in ’n smaakvolle styl is, versier die draer daarvan en word deur ander bewonder.

[Voetnoot]

[Prente op bladsy 26]

As jy voedsame kos eet en baie water drink, kan dit help om ’n droë kopvel te genees

[Prent op bladsy 26]

As jy jou hare te veel was, verwyder jy beskermende olies van jou kopvel af

[Prent op bladsy 26]

Hare wat grys word, is ’n normale deel van die verouderings- proses