Van ons lesers

Dobbelary Ek het so pas die reeks “Dobbelary—Is dit onskadelike pret?” (22 Julie 2002) klaar gelees. Ek dank Jehovah dat hy julle gebruik het om hierdie tydige inligting te voorsien. Ek kon skaars my oë glo toe ek die beskrywings sien van hoe mense optree wat ’n dobbelprobleem het. Dit was asof julle my man beskryf het! Ongelukkig het hierdie sondige gewoonte tot ander ernstige sondes gelei. Dobbelary is ’n plaag. Ek hoop waarlik dat almal sal onthou dat dit nie net onskadelike pret is nie.

M. G., Verenigde State

Skoenlappers Ek is tien jaar oud, en ek het dit baie geniet om die artikel “’n Oes met vlerke” (22 Julie 2002) te lees. Verlede jaar het ons by die skool ’n projek oor skoenlappers gehad. Elke kind het ’n ruspe gekry om te versorg. Ons moes die ruspe elke dag kos gee en sy houer skoonhou. Ek het selfs vier ruspes sien vervel. Toe hulle in papies verander het, het ons hulle na die biologiesentrum teruggeneem. Ons het die volgende lente na die nuwe skoenlappers gaan kyk. Hou asseblief aan om sulke mooi artikels te skryf.

B. P., Duitsland

Die huis waarin ek grootgeword het, is naby ’n weiveld, en ek het dikwels baie skoenlappers in ons binnehof gesien. Ek het altyd hulle skoonheid bewonder. Noudat ek ’n volwassene is, help hierdie delikate insekte my om Jehovah se eienskappe te waardeer (Romeine 1:20). Julle kan julle voorstel hoe bly ek was toe ek die foto’s van hierdie veelkleurige skoenlappers in die Ontwaak gesien het. Dankie vir julle uitstekende werk.

D. G., Slowakye

Nageboortelike depressie Ek het gevind dat die inligting in die artikel “Ek het my stryd teen nageboortelike depressie gewen” (22 Julie 2002) betrekking het op enige vorm van depressie. Ek veg voortdurend teen depressie. Dit is so aanmoedigend om te weet dat ek nie alleen is nie en dat depressie, net soos alle ander siektes, onder God se Koninkryk tot ’n einde sal kom.

C. H., Verenigde State

Nadat ek tien maande gelede aan ’n babadogtertjie geboorte gegee het, het ek aan nageboortelike psigose begin ly. Ek wou niks met my baba te doen hê nie. Doktersbehandeling en die liefdevolle ondersteuning van my gesin en die gemeente het my regtig gehelp. Ek hoop dat hierdie artikel ander vroue en hulle gesinne sal help om hierdie siekte te verstaan. Ek wil hierdie artikel vir my dokter gee.

S. Z., Suid-Afrika

Na die geboorte van my tweede kind, het ek uiters depressief geraak. Dit het baie aanmoediging van my vriende en familie geverg om my so ver te kry om mediese hulp te soek. Ek is dankbaar dat Jehovah se organisasie, deur middel van publikasies soos die Ontwaak!, geestelike voedsel op die regte tyd voorsien.

C. O., Verenigde State

Hare Ek wil graag my opregte dank uitspreek vir die artikel “Is jy bekommerd oor jou hare?” (8 Augustus 2002). Ek is 36 jaar oud en is al ’n geruime tyd bekommerd omdat my hare effens begin uitval en yler word. Die artikel het my gehelp om te verstaan dat dit normaal is om elke dag van jou hare te verloor. Nou voel ek baie meer gerus. Moenie ophou om artikels soos hierdie te druk nie!

V. G., Slowakye

Ek het hierdie artikel op net die regte tyd ontvang. Ek was baie ontsteld omdat my hare begin uitval het. Die artikel het my gekalmeer, veral die opmerking dat “ander gewoonlik nie so besorg oor jou hare is as wat jy is nie”. Wat my ook gehelp het, was toe ek uitgevind het dat daar sowat 70 tot 100 hare elke dag uitval, al het ’n mens nie ’n haarprobleem nie!

E. L., Verenigde State