Is ware rehabilitasie moontlik?

“Niemand kan iemand anders dwing om hom te rehabiliteer nie. Verandering moet van binne die persoon self kom en moet iets wees wat die persoon wil doen.”—VIVIEN STERN, A SIN AGAINST THE FUTURE—IMPRISONMENT IN THE WORLD.

’NBELANGRIKE sleutel tot ware rehabilitasie onder gevangenes is opvoeding en ’n verandering van waardes en lewensbeskouing. Daar is ongetwyfeld opregte mense wat probeer om gevangenes op te voed en te help. Baie gevangenes waardeer inderdaad die goeie en onbaatsugtige werk van sulke mense.

Party mense sal aanvoer dat die gevangenisstelsel in sy geheel nie hervorm kan word nie en dat dit amper onmoontlik is vir gevangenes om in so ’n omgewing te verander. Hoewel dit waar is dat gevangenisstraf alleen nie vir mense nuwe waardes leer nie, het Bybelonderrig party gehelp om hulle lewe te verander. Dit lig toe dat rehabilitasie wel op ’n persoonlike vlak moontlik is.

Vandag bring party gevangenes met behulp van die Bybel die veranderinge aan wat tot die regte denke en gedrag lei. Hoe? Deur gehoor te gee aan die Bybel se raad: “Hou op om na hierdie stelsel van dinge gevorm te word, maar word verander deur julle verstand te hervorm, dat julle julle van die goeie en aanneemlike en volmaakte wil van God kan vergewis” (Romeine 12:2). Hoe word dit gedoen?

Die rol van die Bybel

Baie mense meen dat godsdiens ’n groot rol daarin kan speel om gevangenes te help om oor hulle vorige dade berou te hê. ’n Basiese probleem in hierdie verband is natuurlik dat enige karakterverandering wat agter die tralies plaasgevind het, kan verdwyn nadat die gevangene vrygelaat is. Een gevangene het dit so gestel: “Baie mense vind Christus in hierdie plek—maar wanneer hulle hier weggaan, laat hulle Christus agter!”

Ondervinding het getoon dat ware verandering binne-in die misdadiger moet plaasvind—in sy verstand en hart—en dat die grondslag opregte berou oor vorige oortredings moet wees. ’n Program van Bybelonderrig kan ’n persoon help om te leer hoe God oor goddeloosheid voel en waarom dit verkeerd is. Dit kan vir hom ’n sterk dryfveer wees om so ’n weg te laat vaar.

Jehovah se Getuies het so ’n Bybelonderrigtingsprogram in baie gevangenisse regoor die wêreld en behaal wonderlike resultate. (Sien bladsy 10.) “Ons is gehelp om te leer wat die Bybel sê oor die doel van die lewe en die seëninge wat in die toekoms op die mensdom wag”, het een gevangene gesê en bygevoeg: “Dit is ’n ongelooflike opvoeding!” ’n Ander gevangene het gesê: “Ons neem besluite wat op God se riglyne gegrond is. . . . Ons sien veranderinge in onsself. Ons weet wat die belangrike dinge in die lewe is.”

Die behoefte aan rehabilitasie strek natuurlik verder as die gevangenismure. Die gevangeniskrisis kan slegs werklik opgelos word as die behoefte aan gevangenisse uit die weg geruim word. Een van die wonderlike Bybelwaarhede wat die harte van soveel gevangenes geraak het, is God se belofte: “Die kwaaddoeners sal uitgeroei word . . . Die regverdiges sal die aarde besit en vir ewig daarop woon.”—Psalm 37:9, 29.

Wanneer dit gebeur, sal God se verhewe standaarde gehandhaaf word deur ’n onverderflike regering wat liefdevol sowel as ferm is, naamlik God se hemelse Koninkryk onder Christus—die regering waarvoor Christene geleer is om te bid (Matteus 6:10). In daardie nuwe wêreld sal elke inwoner gerehabiliteer word deur God se verhewe wette te leer. Dan, soos nooit tevore nie, sal “die aarde . . . vol wees van die kennis van die HERE soos die waters die seebodem oordek” (Jesaja 11:9). Met watter gevolg? Die wetsgehoorsame inwoners van die nuwe wêreld sal “hulle verlustig oor groot vrede”.—Psalm 37:11.

[Venster/Prente op bladsy 10]

’n Straaltjie hoop

Vrywillige bedienaars van Jehovah se Getuies is al meer as 20 jaar lank besig met ’n suksesvolle Bybelopvoedkundige program in die federale gevangenis in Atlanta, Georgië, VSA. Gedurende daardie tyd is meer as 40 gevangenes gehelp om gedoopte bedienaars van Jehovah se Getuies te word, en meer as 90 ander gevangenes het ook by gereelde Bybelstudies baat gevind.

Ontwaak! het onlangs met verskeie Bybelonderrigters gesels wat onbaatsugtig in daardie gevangenis gewerk het.

◼ Waarom is Bybelonderrig so doeltreffend om sekere gevangenes te motiveer om hulle lewe te verander?

David: Baie gevangenes is mense aan wie liefde nog nooit betoon is nie, selfs nie toe hulle kinders was nie. Wanneer hulle dus leer dat God hulle liefhet en hulle in gebed hulle hart aan hom uitstort en hy dan hulle gebede verhoor, word hy vir hulle werklik. Hulle hart word beweeg om hom op hulle beurt lief te hê.

Ray: Een van die gevangenes met wie ek gestudeer het, is as kind gemolesteer. Toe ek hom gevra het wat hom tot Jehovah aangetrokke laat voel het, was sy antwoord dat ’n mens uitvind dat Jehovah jou werklik verstaan wanneer jy Bybelwaarheid leer. As gevolg hiervan wou hy meer oor die persoonlikheid van so ’n liefdevolle God leer.

◼ Party sal sê dat gevangenes aan godsdiens vashou omdat hulle bybedoelings het—naamlik om hulle vonnis te verkort of net om die tyd om te kry. Wat het julle ondervinding julle geleer?

Fred: Wanneer die gevangenes na ons studies toe kom, speel ons nie op hulle emosies nie. Ons studeer eenvoudig die Bybel met hulle. Hulle vind gou uit dat hulle van die Bybel geleer gaan word en dat dit al is wat ons doen. Van hulle het al na my toe gekom en hulp gevra met hulle hofsake. Ek bespreek dit nie met hulle nie. Gevolglik wil diegene wat na die studiegroep toe kom en oor ’n tydperk daar bly, regtig leer wat die Bybel sê.

Nick: Een ding wat ek opmerk, is die veranderinge wat party gevangenes aanbring terwyl hulle in die gevangenis is. Party het gedoopte bedienaars geword en moes al baie as gevolg van die ander gevangenes verduur. Dit is baie moeilik vir hulle. As die Bybel nie hulle hart geraak het nie, sou hulle nie onder daardie omstandighede getrou kon bly nie.

Israel: Gewoonlik is hulle mense met ’n opregte begeerte om van Jehovah te leer, en hulle toon dit op ’n pragtige manier. Jy kan sien dat dit uit hulle hart kom.

Joe: Dié wat ware Christene word, verstaan nou waarom dinge in hulle lewe verkeerd gegaan het. Hulle verstaan ook dat hulle kan verander—hulle sien ’n straaltjie hoop. Nou kan hulle opreg uitsien na die vervulling van Jehovah se beloftes vir die toekoms.

◼ Waarom kan die gevangenisstelsel alleen nie misdadigers verander nie?

Joe: Die doel van die gevangenisstelsel is nie om misdadigers te rehabiliteer nie, maar om hulle van die res van die samelewing weg te hou. Dit is die kern van die probleem—die gesindheid van die gevangenisstelsel teenoor hierdie mans.

Henry: Die gevangenisstelsel kan nie die oortreders se harte verander nie. Die meeste van hierdie mense gaan weer dieselfde misdade pleeg wanneer hulle vrygelaat word.

[Prent op bladsy 8, 9]

Baie gevangenes is al gehelp om die waarheid van die Bybel te leer