Vraebus

◼ Op watter belangrike punte moet ons ag slaan wanneer ons vir gevangenes getuig?

Regoor die wêreld is daar ten minste agtmiljoen gevangenes, waarvan party belangstelling in die goeie nuus toon (1 Tim. 2:4). Een takkantoor ontvang elke maand ongeveer 1 400 briewe van gevangenes en hulle gesinslede wat lektuur vra of besoek wil word. Hoewel die belangstelling van baie gevangenes opreg is, het ondervinding getoon dat party voorgee dat hulle belangstel sodat hulle God se knegte vir selfsugtige gewin kan gebruik. Met die oog hierop moet almal op die volgende punte ag slaan wanneer daar vir gevangenes getuig word.

In baie gevalle word daar per brief vir gevangenes getuig. Daar word sterk aanbeveel dat susters nie vir mans in die tronk skryf nie, al is dit met die doel om geestelike hulp te gee. Slegs bekwame broers moet na hierdie verantwoordelikheid omsien. Bekwame susters kan gevra word om vir vroue in die tronk te skryf wat opreg in Bybelwaarheid belangstel. Geld of persoonlike geskenke moet nie vir gevangenes gestuur word nie, al word dit aangevra.

Wanneer ’n gevangene belangstelling toon, moet sy naam en adres gegee word aan die gemeente wat in die gebied van die tronk is. Gewoonlik weet die bekwame broers daar hoe om die verskillende situasies wat kan ontstaan, te hanteer. As jy nie weet watter gemeente dit is nie, moet die inligting aan die takkantoor gestuur word.

Dit is heeltemal in orde as die toegewese broers vergaderinge met gevangenes hou sodat ’n hele paar tegelykertyd kan studeer. Maar spesiale geleenthede waar verkondigers vryelik met gevangenes assosieer, moet nie in die tronk gehou word nie. Verder sal dit onverstandig van verkondigers wees om ’n tronk na willekeur te besoek en noue omgang met gevangenes te hê.

Mag ons “versigtig soos slange en tog onskuldig soos duiwe” wees terwyl ons die goeie nuus aan gevangenes bekend maak.—Matt. 10:16.