Jongmense vra . . .

Hoe kan ek nader aan my grootouers kom?

“Albei my oupas is storievertellers. Hulle verhale help my om my eie gevoelens te verstaan.”—Joshua.

DAAR was ’n tyd toe dit vir familielede van verskeie geslagte iets alledaags was om naby mekaar te woon—dikwels in dieselfde huis. Noue omgang met ’n mens se grootouers was ’n deel van die lewe.

Deesdae word jongmense dalk deur lang afstande van hulle grootouers geskei. Daarbenewens word al hoe meer gesinne deur egskeiding verbrokkel. The Toronto Star het berig dat “grootouers dalk ook slagoffers van egskeiding is en verhinder word om hulle geliefde kleinkinders te sien”. In ander gevalle is die probleem dat baie jongmense eenvoudig ’n negatiewe beskouing van bejaardes het en dink hulle is oudmodies, met opvattings, waardes en belange wat baie van hulle s’n verskil. Die gevolg? Baie jongmense is eenvoudig net nie so na aan hulle grootouers as wat hulle sou kon wees nie.

Dit is ’n jammerte. Soos ’n vorige artikel in hierdie reeks getoon het, is dit heilsaam, voordelig en aangenaam om ’n hegte verhouding met jou grootouers te hê—veral as hulle godvresend is.a ’n Tienermeisie met die naam Rebekah sê van haar grootouers: “Ons kan altyd saamlag.” ’n Jeugdige met die naam Peter sê ook: “Ek is nie bang om vir hulle te sê hoe ek voel of wat my planne is nie. Soms voel ek meer op my gemak by hulle as by my ouers. Ek voel dat ek met my ouma en oupa oor enigiets kan praat.”

Wat van jou? Miskien was jy na aan jou grootouers toe jy nog klein was. Maar noudat jy ’n tiener is, het jy onlangs dalk nie baie gedoen om op daardie verhouding voort te bou nie. As dit die geval is, kan die beginsel van die Bybel se raad in 2 Korintiërs 6:11-13 heel moontlik hier toegepas word, naamlik om ‘verruim te word’ in jou toegeneentheid teenoor hulle. Maar die vraag is: Hoe?

Neem die inisiatief

Om ‘verruim te word’, beteken dat jy inisiatief aan die dag moet lê. Die Bybel sê immers: “Hou ’n weldaad nie terug van hom aan wie dit toekom as dit in jou mag is om dit te doen nie” (Spreuke 3:27). Toe jy jonger was, het jy dalk nie baie “mag” gehad om enigiets omtrent die verhouding met jou grootouers te doen nie. Maar noudat jy ouer is, miskien selfs ’n jong volwassene, vind jy dalk dat daar ’n paar stappe is wat jy tereg kan neem.

As jou grootouers byvoorbeeld naby julle woon, kan jy hulle gereeld begin besoek. Vervelig? Miskien as jy daar met ’n mond vol tande sit. Begin dus met hulle gesels! Waaroor kan jy praat? Die Bybelbeginsel in Filippense 2:4 is nuttig. Dit sê dat ons ons ‘oog nie net in persoonlike belangstelling op ons eie sake moet hou nie, maar ook in persoonlike belangstelling op dié van die ander’. Met ander woorde, toon belangstelling in jou grootouers. Laat hulle praat oor die dinge wat vir hulle van belang is. Hoe voel hulle? Wat het hulle onlangs gedoen? Hulle geniet dit dalk om oor die verlede te gesels. Vra hulle dus hoe die lewe in hulle jong dae was. Of hoe was jou pa of ma toe hy of sy jonk was? As jou grootouers Christene is, kan jy hulle vra wat hulle tot Bybelwaarhede aangetrokke laat voel het.

Grootouers is dikwels ’n ryk bron van familiegeskiedenis, en hulle is waarskynlik meer as gewillig om jou met fassinerende verhale te vermaak. Trouens, jy wil dit dalk selfs in ’n aangename projek verander. Probeer ’n onderhoud met jou grootouers voer deur miskien aantekeninge of ’n kasset- of video-opname te maak. As jy nie seker is wat om hulle te vra nie, laat jou ouers jou help om geskikte vrae op te stel. Jy sal waarskynlik baie dinge leer wat jou sal help om jou grootouers, jou ouers en ook jouself beter te verstaan. “Albei my oupas is storievertellers”, sê Joshua. “Hulle verhale help my om my eie gevoelens te verstaan.”

Moet egter nie vergeet dat jou grootouers ook heelwat in jou lewe en jou bedrywighede belangstel nie. Wanneer jy vir hulle vertel wat jy doen, maak jy hulle ’n deel van jou lewe. Dit kan nie anders as om julle nader aan mekaar te laat kom nie. ’n Jeugdige in Frankryk met die naam Igor sê: “Ek en my ouma hou daarvan om in die dorp saam tee te drink en te praat oor wat ons die afgelope tyd gedoen het.”

Wat kan ons saam doen?

As julle eers met mekaar begin gesels het, kan julle miskien begin om ’n paar dinge saam te doen. Met ’n bietjie beplanning vind jy dalk allerhande bedrywighede waaraan julle saam kan deelneem. Die jong Dara sê: “Albei my oumas het my geleer hoe om te kook, vrugte in te lê, te bak, plante te kweek en tuin te maak.” Amy het al saam met haar grootouers na gesinsgesellighede en op vakansies gegaan. Afhangende van hulle ouderdom is party grootouers nogal heel bedrywig. Aaron hou daarvan om gholf saam met sy ouma te speel. Joshua vang vis en doen werkies om die huis saam met sy oupa.

As jou grootouers Jehovah dien, kan dit veral genotvol wees om saam met hulle aan aspekte van Jehovah se aanbidding deel te neem, soos om met ander oor die Bybel te praat. Igor het saam met sy ouma na ’n internasionale byeenkoms van Jehovah se Getuies in Pole gereis. “Dit was ’n onvergeetlike ondervinding wat ons saam gehad het, en ons geniet dit nog steeds om daaroor te gesels”, sê hy. Nie alle grootouers kan weliswaar so rondreis nie. Maar dit is die moeite werd om tyd saam met hulle deur te bring.

’n Geestelike erfenis

In Bybeltye het ’n vrou met die naam Loïs ’n belangrike rol daarin gespeel om haar kleinseun, Timoteus, te help om ’n uitnemende man van God te word (2 Timoteus 1:5). Dit is nie verbasend nie dat baie Christengrootouers vandag ’n soortgelyke rol speel. Joshua sê aangaande sy grootouers: “Hulle dien Jehovah al langer as wat ek leef, en daarom het ek groot respek vir hulle, nie net as grootouers nie, maar ook as handhawers van onkreukbaarheid.” Amy sê: “My oupa en ouma sê altyd hoe bemoedig en gelukkig hulle is om te sien dat ek Jehovah getrou dien. Maar hulle goeie voorbeeld en ywer vir Jehovah as pioniers [voltydse evangeliedienaars] het my aangespoor om in my pionierdiens te volhard.”

Chris verwys na sy ouma as “die persoon wat my die meeste aangemoedig het om te studeer en vordering te maak”. Hy sê verder: “Ek sal altyd haar woorde onthou dat ‘ons vir Jehovah ons beste moet doen’.” Pedro se grootouers het veral ’n groot rol is sy geestelike ontwikkeling gespeel. Hy sê: “Hulle ondervinding het my baie gehelp. My oupa en ouma het my altyd in die predikingswerk uitgeneem, en ek waardeer dit baie.” Ja, dit kan jou help om God in ’n groter mate te dien as jy nader aan jou godvresende grootouers kom.

Grootouers wat ver woon

Sê nou jou grootouers woon ver van julle af? As dit moontlik is, kan jy hulle gereeld probeer besoek. Doen jou bes om tussen besoeke kontak te behou. Hornan sien sy grootouers net drie keer per jaar, maar hy sê: “Ek bel hulle elke Sondag.” Dara, wat ook ver van haar grootouers af woon, sê: “Hulle stel belang in my lewe, en ons bel of stuur amper elke week e-pos vir mekaar.” E-pos en telefoonoproepe het hulle plek, maar moenie die waarde onderskat van ’n brief wat in jou handskrif geskryf is nie. Baie jongmense was al verbaas om uit te vind dat hulle grootouers elke brief gebêre het wat hulle van kleins af vir hulle geskryf het. Briewe kan gelees en weer gelees—en gewaardeer—word. Moet dus nie vergeet om te skryf nie!

Grootouers is dikwels besonder lief vir hulle kleinkinders (Spreuke 17:6). Daar is baie maniere om ’n hegte verhouding met jou grootouers op te bou en te behou, hetsy hulle naby of ver van julle af woon. Wend gerus ’n poging aan.

[Voetnoot]