Op die rand van uitsterwing
SAM, die driejarige gorilla op die foto, lyk beslis hartseer. Maar miskien moet dit ons nie verbaas nie. Jagters het sy ma doodgemaak, wat hom wees agtergelaat het met geen kans om na die natuur terug te keer nie. Ongelukkig het Sam net ’n paar maande nadat hierdie foto geneem is aan ’n asemhalingskwaal gesterf. Maar hy was nie die enigste gorilla met slegte vooruitsigte nie.
Die volgehoue vernietiging van hulle natuurlike habitat het sulke diere op die lys van bedreigde spesies geplaas. En aangesien gorillas in party plekke in werklikheid vir die pot gejag word, is jagters met moderne gewere ook ’n ernstige bedreiging vir die diere se oorlewing op die lang termyn. Hoewel die gorilla se toekoms donker lyk, is dié van ander spesies selfs donkerder.
’n Verslag wat deur die Internasionale Unie vir die Bewaring van die Natuur en Natuurlike Hulpbronne (IUCN) voorberei is, skilder ’n somber prentjie van die situasie van baie van die wêreld se dierelewe. Gedurende die laaste paar jaar het meer spesies bedreig geword, en die tempo van uitwissing is ook ontstellend. Die IUCN, ’n organisasie wat die status van duisende spesies monitor, het onlangs sy Rooi Data-lys vrygestel, wat bedoel is om mense meer bewus te maak van die benarde toestand van die aarde se bedreigde dierelewe.
Byna ’n kwart van al die wêreld se soogdiere en omtrent ’n agtste van die voëls word nou deur uitsterwing bedreig. En dit is net die spesies wat gedokumenteer is. Dit is steeds onbekend wat die bewaringstatus van die meeste van die aarde se spesies is.
As hierdie tragiese situasie jou hartseer maak, stel jou voor hoe ons Skepper hieroor moet voel. Hy sê in sy Woord, die Bybel: “Al die wilde diere van die bos is myne” (Psalm 50:10). Hy kan dus hoegenaamd nie onbewus wees van die moedswillige uitwissing van sy eie handewerk nie. In die boek Openbaring verseker God ons dat hy ‘die verderwers van die aarde sal verderf’.—Openbaring 11:18.
Die beskerming van die aarde se dierelewe en sy sensitiewe omgewing, waarvan ons almal afhanklik is, is net twee van die dringende take waaraan God se Koninkryk aandag sal gee wanneer ‘God alles nuut maak’.—Openbaring 21:5; Matteus 6:10.
[Venster/Prent op bladsy 16, 17]
Tier (Panthera tigris)
◼ Geskatte hoeveelheid in die natuur: ongeveer 5 000 tot 7 500 (’n eeu gelede was daar omtrent 100 000)
◼ Grootste bedreigings: wilddiefstal, vergiftiging, verlies aan habitat en isolasie van tierbevolkings
[Venster/Prent op bladsy 17]
Reusepanda (Ailuropoda melanoleuca)
◼ Geskatte hoeveelheid in die natuur: 1 000—wat dit een van die skaarste soogdiere op die aarde maak
◼ Grootste bedreigings: lae voortplantingstempo en vernietiging van die bergbamboeswoude waarvan hulle vir kos afhanklik is
[Erkenning]
Foto: Zoo de la Casa de Campo, Madrid
[Venster/Prent op bladsy 17]
Orangoetang (Pongo pygmaeus)
◼ Geskatte hoeveelheid in die natuur: ongeveer 20 000
◼ Grootste bedreigings: bosbrande, houtkappery, wilddiefstal en smokkelary vir die troeteldierhandel
[Erkenning]
Foto: Zoo, Santillana del Mar, Cantabria, España
[Venster/Prent op bladsy 18]
Panda (Ailurus fulgens)
◼ Geskatte hoeveelheid in die natuur: onbekend, maar dit lyk of getalle oral in hulle gebied afneem weens mense wat hulle habitat inneem en ’n lae voortplantingstempo
◼ Grootste bedreigings: wilddiefstal, vernietiging van bergbamboeswoude en veeweiding
[Erkenning]
Foto: Zoo de la Casa de Campo, Madrid
[Venster/Prent op bladsy 18]
Goeldi se aap (Callimico goeldii)
◼ Geskatte hoeveelheid in die natuur: onbekend (hierdie primaat is eers in 1904 ontdek)
◼ Grootste bedreigings: vernietiging van die Amasonereënwoud en yl bevolkings, wat maklik geïsoleerd kan raak
[Erkenning]
Foto: Zoo, Santillana del Mar, Cantabria, España
[Venster/Prent op bladsy 18]
Chinese kraanvoël (Grus japonensis)
◼ Geskatte hoeveelheid in die natuur: ongeveer 2 000
◼ Grootste bedreigings: botsings met elektriese kabels, vernietiging van hulle broeiplekke en besoedeling
[Erkenning]
© 1986 Steve Kaufman