Kan die aarde se spesies gered word?
“LEWENDE wesens, van ape tot albatrosse tot naaldekokers, word teen so ’n vinnige tempo deur die mens tot op die randjie van uitwissing gedryf dat ons ons eie kans op oorlewing in gevaar stel”, sê The Globe and Mail van Kanada. Die koerant het kommentaar gelewer op die 2000 IUCN Red List of Threatened Species, wat deur die Wêreldbewaringsunie (IUCN) van Genève, Switserland, gepubliseer is. Die Red List waarsku dat meer as 11 000 plant- en diersoorte ’n groot gevaar loop om uitgewis te word. Soogdiere is onder die mees bedreigde spesies. “Ongeveer een uit elke vier soogdierspesies wat vandag op die aarde leef—of 24 persent—word deur uitwissing bedreig”, berig die Globe.
Wat is vir die krisis verantwoordelik? Wetenskaplikes vestig die aandag op die internasionale handel in troeteldiere, langlynvisvangste en die vernietiging van geskikte habitats om te verduidelik waarom hierdie spesies so vinnig verdwyn. Namate al hoe meer bosboupaaie deur ongerepte woude gebou word, “het mense [boonop] makliker toegang tot wilde diere wat eens buite hulle bereik was. Hulle maak die diere dan dood en eet hulle. As dit op groot skaal gedoen word, sterf spesies uit.”
Wetenskaplikes waarsku dat dit ook vir mense gevaar kan inhou. “Ons is besig om met ons lewensonderhoudende stelsel te peuter wanneer ons spesies uitwis”, sê David Brackett, voorsitter van die Wêreldbewaringsunie se kommissie vir die oorlewing van spesies. “Die aarde sal nie behoue kan bly as al ons biodiversiteit net in dieretuine is nie.”
Die IUCN-verslag spoor die wêreldwye gemeenskap aan om op te tree en sê dat “finansiële en mensehulpbronne tussen 10 en 100 keer die huidige vlak verskerp moet word om hierdie krisis te keer”. Maar ongelukkig werk hebsug dikwels opregte pogings teë om ons aarde se hulpbronne te bewaar.
Kan die aarde se spesies gered word? Die eerste mense en hulle nageslag is die werk gegee om na die verskeidenheid lewe op ons planeet om te sien. “Jehovah God het begin om die mens te neem en hom in die tuin van Eden te plaas om dit te bewerk”, sê die Bybel, “en daarvoor te sorg” (Genesis 2:15, NW). Hoewel die mens nie sy verpligting nakom nie, bly God se voorneme met die aarde dieselfde. Hy is besorg oor ons planeet, en hy sal nie toelaat dat dit deur agterlosigheid of gierigheid vernietig word nie (Openbaring 11:18). Sy Woord belowe: “Die regverdiges sal die aarde besit en vir ewig daarop woon.”—Psalm 37:29.
[Foto-erkenning op bladsy 31]
U.S. Fish & Wildlife Service, Washington, D.C./J.D. Pittillo