Gebruik medisyne wyslik

DEUR ONTWAAK!-MEDEWERKER IN SUID-AFRIKA

WANNEER jou dokter medisyne voorskryf, doen hy dit ongetwyfeld met goeie bedoelings en baseer hy sy voorskrif op sy diagnose, mediese kennis en ondervinding. Maar die pasiënt moenie verwag dat sy dokter die volle verantwoordelikheid vir sy welsyn moet aanvaar nie. Die pasiënt bly verantwoordelik vir wat hy in sy liggaam inneem.

Neem die volgende praktiese riglyne van ’n mediese dokter in ag wanneer voorskrifmedisyne geneem word:

● Alle geneesmiddels het newe-effekte. Jy het die reg om te weet watter medisyne voorgeskryf word en watter newe-effekte dit kan hê. As jou dokter nie hierdie inligting voorsien nie, moet jy nie huiwer om te vra nie. In die meeste gevalle sal die voordele meer as vergoed vir die newe-effekte. Maar jy moet ingelig wees sodat jy ’n wyse besluit kan neem.

● Geneesmiddels het nie dieselfde uitwerking op almal nie. Jou dokter kan nie voorspel presies watter uitwerking ’n sekere geneesmiddel op jou sal hê nie. Raadpleeg jou dokter as jy besorg raak oor onverwagte newe-effekte.

● Vind uit hoe lank jy die medisyne moet neem. Stel ook vas of dit moontlik verslawend is.

● Moenie sommer self besluit om op te hou om die medisyne te neem omdat jy dalk beter voel nie. Dit kan jou toestand vererger as jy te vroeg ophou om jou medisyne te neem. Raadpleeg eers jou dokter.

● Neem voorskrifmedisyne altyd onder ’n dokter se toesig.