Vrae van lesers

Artikel red lewe Ons het ’n man met die naam Lenny besoek, wat gesê het dat die artikel “Dengue—’n koors weens ’n byt” (22 Julie 1998) sy niggie se lewe gered het. Sy het dae lank ’n hoë koors gehad en het ’n veluitslag gekry; maar haar ouers het gedink dat dit net masels is. Lenny het die artikel onthou, die tydskrif gaan uithaal en weer die deel gelees wat die simptome van dengue beskryf het. Hy het toe sy niggie se ouers aangemoedig om haar hospitaal toe te neem. Die dokters daar het bevestig dat sy inderdaad dengue- hemorragiese koors het. Lenny het Ontwaak! opreg bedank omdat dit hom gehelp het om sy niggie se lewe te red, en hy het later ’n tuisbybelstudie aanvaar.

J.M.L., Filippyne

Marfan-sindroom In die artikel “Hoe om met Marfan-sindroom saam te leef—Wanneer gewrigte uit lit raak” (22 Februarie 2001) sê Michelle dat sy daagliks morfien neem. Hoe kan ’n Christen verslawende medisyne gebruik?

S. D., Verenigde State

Dit sal verkeerd wees van ’n Christen om verslawende medisyne te gebruik slegs vir die sensasie of om “hoog” te raak. Maar iemand wat weens die een of ander mediese probleem pynstillers neem wat deur ’n geneesheer voorgeskryf is, sal dit nouliks doen om “hoog” te raak. Selfs in sulke situasies moet ’n Christen ernstig nadink oor die moontlikheid van verslawing en ander skadelike newe-effekte as sulke medisyne geneem word.—RED.

Michelle se ondervinding het my aangemoedig. Ek bewonder die feit dat sy, hoewel sy voortdurend in pyn verkeer, nie toelaat dat dit haar verhinder om Jehovah heelhartig te dien nie.

J. G., Guam

Radioaktiewe neerslag Ek was teleurgesteld in julle artikel “Radioaktiewe neerslag wek kommer” (22 Februarie 2001). Julle moenie julle siening van die Bybel probeer bevorder deur van bangmaaktaktiek gebruik te maak nie. Gevare moet in hulle regte verband bespreek word. Byvoorbeeld, elektrisiteit is betreklik veilig as dit versigtig gebruik word. En tog word baie mense jaarliks doodgeskok. Beteken dit dat ons almal paranoïes moet raak en in vrees vir elektrisiteit moet lewe? Feit is dat alle lande in die nabye toekoms baie meer elektrisiteit nodig sal hê, en kernreaktors is blykbaar die skoonste en veiligste manier om dit te voorsien. Ons hoef nie kernkrag te vrees nie.

R. S., Kanada

Dit is netelige kwessies, en ons waardeer die eerlikheid van hierdie leser. Ons dink nogtans nie dat ons artikel “bangmaaktaktiek” gebruik het nie. Ons het nie vrees by ons lesers probeer inboesem nie. Ons het ook nie kernkrag veroordeel nie. Ons het eerder die geldige vrese na vore gebring wat baie mense omtrent kernkrag het en die aandag gevestig op God se Koninkryk as die uiteindelike oplossing vir die energietekort.—RED.

Versekering Ek is ’n versekeringsagent en het die voorbladreeks “Versekering—Het jy dit werklik nodig?” (22 Februarie 2001) werklik geniet. Vir die meeste verbruikers is versekering baie verwarrend. Dit is moeilik om te verstaan waarom ’n mens vir iets betaal wat jy dalk nooit sal gebruik nie. Ek het dus gehou van hoe julle die punt toelig met die illustrasie van ’n spaarwiel wat ’n mens altyd in jou motor moet hou. Dankie vir hierdie nuttige inligting.

C. P., Verenigde State

Om uit te glip Dankie vir julle artikel “Jongmense vra . . . Is dit so verkeerd om uit te glip?” (22 Februarie 2001). Dit maak my hartseer om te sien hoe naïef sommige jong Christene is. Een jong meisie het uitgeglip om na ’n partytjie toe te gaan, en sy is verkrag. Niemand het haar kom help nie. Hou asseblief aan om ons jongmense te waarsku!

J. N., Verenigde State