Dengue—’n Toenemende bedreiging
“Die Gesondheidsdiens van Morelos . . . , in samewerking met die Gesondheidsraad van die Dorpsraad van Emiliano Zapata, reik hierdie voorlopige sertifikaat uit aan die Koninkryksaal van Jehovah se Getuies . . . vir [die Getuies se] spanwerk om hulle perseel skoon en vry van broeiplekke van denguedraende muskiete te hou.”
DIE owerheid in Mexiko het goeie rede om besorg te wees oor siektedraende muskiete. Die lastige klein insekte kan ’n gevaarlike virus oordra wat dengue veroorsaak, ’n siekte wat dodelik kan wees en wat in 2010 meer as 57 000 mense in Mexiko aangetas het. Mexiko is net een van meer as 100 lande waar dengue nou endemies is. Trouens, volgens huidige skattings van die Wêreldgesondheidsorganisie (WGO) is daar jaarliks sowat 50 miljoen gevalle van denguebesmetting regoor die wêreld en loop omtrent twee vyfdes van die wêreldbevolking die risiko om die siekte op te doen. Gevolglik het gesondheidsowerhede met programme begin om die witgespikkelde Aedes aegypti-muskiet, een van die insekte wat die denguevirus oordra, uit te roei.a
Dengue kom meestal in tropiese en subtropiese klimate voor, veral tydens die reënseisoen en ná ’n natuurramp soos ’n orkaan of ’n oorstroming. Dit is omdat die Aedes-muskietwyfie haar eiers lê waar sy ook al staande water kan vind.b Aangesien mense regoor Latyns-Amerika en die Karibiese Eilande huishoudelike water in betontenks opvang en hou, spoor gesondheidsdeskundiges hulle aan om hulle tenks toe te hou. Dit keer dat die tenks broeiplek vir muskiete voorsien. Mense beperk ook die verspreiding van hierdie muskiete as hulle sorg dat daar geen ou motorbande, blikke, blompotte, plastiekhouers—enigiets waarin water kan staan—op hulle erf is nie.
Diagnosering en behandeling
Dengue word dikwels verkeerd gediagnoseer omdat die simptome baie met griepsimptome ooreenkom. Maar volgens die WGO kan dit dengue wees as ’n koors gepaardgaan met veluitslag, pyn agter die oë en spierpyn sowel as hewige gewrigspyn, die rede waarom dit beenbreekkoors genoem word. Die koors duur vyf tot sewe dae.
Dokters het nog nie ’n geneesmiddel vir dengue gevind nie, maar gewoonlik kan dit tuis behandel word deur te rus en baie vloeistof te drink. Pasiënte moet egter goed dopgehou word ingeval hemorragiese denguekoors of dengueskoksindroom ontwikkel. Hierdie potensieel dodelike komplikasies kan ontstaan nadat die aanvanklike koors gebreek het en dit lyk asof die pasiënt herstel. Wat is van die simptome van hierdie ernstiger siektetoestande? Hewige buikpyn, aanhoudende braking, bloeding van die neus- en tandvleis, swart stoelgang en rooipers blase onder die vel. Simptome van dengueskoksindroom kan ook rusteloosheid, ’n verskriklike dors, bleek en koue vel sowel as baie lae bloeddruk insluit.
Dengue kan ongelukkig nie met antibiotika behandel word nie omdat dit deur ’n virus veroorsaak word en nie deur ’n bakterie nie. Dit sal ook raadsaam wees as ’n pasiënt anti-inflammatoriese middels, soos aspirien en ibuprofen, vermy, aangesien dit die risiko van bloeding kan vergroot. Daar is vier stamme van die denguevirus, en ’n mens kan dengue meer as een keer kry.
As jy dengue kry, moet jy baie rus en baie vloeistof drink. Bly ook soveel as moontlik onder ’n muskietnet om te voorkom dat muskiete jou byt en die siekte aan ander oordra.
Hoe kan jy in die eerste plek keer dat muskiete jou byt? Dra langbroeke of lang rokke en klere met lang moue, en gebruik ’n muskietafweermiddel. Hoewel muskiete jou enige tyd van die dag kan byt, is hulle omtrent twee uur ná sonop en voor sononder die bedrywigste. Om onder ’n muskietnet te slaap wat met ’n insekmiddel behandel is, bied ook beskerming.
Net die tyd sal leer of entstowwe dalk later verligting van dengue sal bied. Uiteindelik sal God se Koninkryk egter alle kwale, insluitende hierdie koors, uit die weg ruim. Ja, die tyd sal aanbreek wanneer die volgende profesie vervul sal word: “[God] sal elke traan van hulle oë afvee, en die dood sal daar nie meer wees nie, en ook verdriet en angsgeroep en pyn sal daar nie meer wees nie. Die vorige dinge het verbygegaan.”—Openbaring 21:3, 4.
[Voetnote]
a In party lande dra ander muskiete, soos Aedes albopictus, moontlik ook die denguevirus oor.
b Aedes-muskiete beweeg gewoonlik nie verder as ’n paar honderd meter van waar hulle uitbroei nie.
[Diagram op bladsy 25]
(Sien publikasie vir oorspronklike teksuitleg)
Moontlike broeiplekke
1. Ou motorbande
2. Geute
3. Blompotte
4. Plastiekhouers
5. Leë blikke en kanne
Voorkom dat muskiete jou byt
a. Dra langbroeke of lang rokke en klere met lang moue. Gebruik ’n muskietafweermiddel.
b. Slaap onder ’n muskietnet
[Foto-erkenning op bladsy 24]
Bron: Courtesy Marcos Teixeira de Freitas