Die nuwe voorkoms van die Britse Museum

DEUR ONTWAAK!-MEDEWERKER IN BRITTANJE

Die Britse Museum in Londen ontvang elke jaar byna sesmiljoen besoekers. Ongeveer ’n jaar gelede is dit met byna 40 persent vergroot om vir hierdie skares plek te maak. Hoe was dit moontlik?

Die biblioteek van die Britse Museum en die Britse Museum is in 1759 vir die publiek oopgestel. Die gebou waarin dit gehuisves was, is in 1852 voltooi. Maar in 1997 is die biblioteek, wat as die Britse Biblioteek bekend staan, na ’n nuwe gebou daar naby verskuif, saam met sy 12 miljoen gedrukte boeke en tienduisende manuskripte en seëls. Hierdie verwikkeling het dit vir die Britse Museum moontlik gemaak om uit te brei omdat dit die sentrale binnehof—wat byna 150 jaar lank vir die publiek verberg was—beskikbaar gestel het!

Die middelpunt van die binnehof, wat nou leeg staan en die Groot Hof genoem word, was die koepelvormige Leeskamer. Sedert hierdie Leeskamer in 1857 in gebruik geneem is, het dit navorsers van regoor die wêreld aangetrek. Mohandas Gandhi, Charles Darwin en Karl Marx is net ’n paar van die bekende mense wat in die stil atmosfeer van hierdie beroemde biblioteek gewerk het. Hierdie vertrek is vir die heel eerste keer vir die algemene publiek oopgestel. Dit bevat nou die museum se eie versameling van 25 000 boeke.

Die koepel van hierdie geskiedkundige vertrek is herstel. Die Groot Hof, insluitende die Leeskamer, word nou oordek deur ’n indrukwekkende plafon wat 800 ton weeg. Dit is ’n staalraam wat met 3 312 glasdriehoeke versier is, waarvan elkeen se grootte noukeurig met ’n rekenaar gekalibreer is.

In die Leeskamer het die Britse Museum dit nou vir besoekers moontlik gemaak om met behulp van rekenaars toegang tot duisende van sy kosbare skatte te kry. The Times van Londen het die opgeknapte fasiliteite ’n meesterstuk genoem. Besoekers stem heelhartig saam!

[Foto-erkennings op bladsy 31]

Middel bo en onder: Copyright The British Museum; alle ander: Copyright Nigel Young/The British Museum