Veilige voedsel vir almal
DIT is ’n genot om heilsame voedsel te eet. Maar soos ons gesien het, is dit nie altyd maklik om sulke voedsel te kry nie. Nog erger, daar is miljoene mense wat dit nie kan bekostig om seker te maak dat hulle voedsel veilig of heilsaam genoeg is nie. Hulle is te besig om genoeg voedsel te vind sodat hulle aan die lewe kan bly. Het God werklik bedoel dat dinge so moet wees?
Dink ’n bietjie. Toe God die man en vrou op die aarde geplaas het, het hulle enigsins rede gehad om hulle oor voedsel te bekommer? Nee, glad nie! Die verslag in die Bybelboek Genesis sê: “Die HERE God het allerhande bome uit die grond laat uitspruit, begeerlik om te sien en goed om van te eet” (Genesis 2:9). Adam en Eva het dus ’n heerlike verskeidenheid voedselsoorte in oorvloed gehad. Die God wat hulle geskep het, het presies geweet wat hulle dieetkundige behoeftes was; hy het ook geweet wat hulle vreugde sou verskaf. Ons is weliswaar nie vandag in die tuin van Eden nie. Maar het God sy oorspronklike voorneme met die mens en die aarde verander?
Ons het goeie rede om te glo dat almal op aarde binnekort heilsame voedsel in oorvloed sal geniet! Hierdie oortuiging kan ons grootliks help om ’n gebalanseerde gesindheid te behou wat die kwessie van voedselveiligheid vandag betref. Hierdie hoop, indien dit seker en betroubaar is, kan ons help om fanatiese of uiterste beskouings te vermy.
Waarom kan ons so seker wees dat die lewe binnekort anders sal wees? Ywerige studente van God se Woord weet dat ons nou in “die laaste dae” van hierdie stelsel van dinge lewe. Die huidige stelsel word volgens mensewysheid bestuur, wat op baie gebiede van die lewe onseker is en op eksperimentering berus. Wanneer dit kom by metodes om voedsel te verwerk, is daar aansienlike onsekerheid of dit veilig of gevaarlik is. Sulke onsekerheid veroorsaak vrees, twis en verdeeldheid.—2 Timoteus 3:1-5.
Die Skepper van die mens het beloof om hierdie huidige stelsel van dinge met ’n heeltemal nuwe een te vervang. Sy oorspronklike voorneme—vir die hele aarde om ’n paradys soos die tuin van Eden te wees en om deur ’n gelukkige en gesonde mensegesin bewoon te word—sal vervul word. Die verenigende krag van volmaakte Goddelike wysheid sal dan die aarde vul (Jesaja 11:9). Onsekere mensewysheid sal dan nie meer bestaan nie. Die nuwe stelsel wat God tot stand gaan gebring, sal alle rede vir twyfel oor die veiligheid van ons voedsel uit die weg ruim. Maak dit nie sin om te dink dat die God wat mense geskep het, ook ons dieetkundige behoeftes sal verstaan nie?
Volmaakte voedsel van die Skepper
Die Bybel bevat duidelike profesieë oor die lewenstoestande in die komende stelsel van dinge. Die profeet Jesaja het geskryf: “[God sal] reën gee vir die saad waarmee jy die grond besaai, en broodkoring wat die grond voortbring, en dit sal smaaklik en voedsaam wees; jou vee sal in dié dag wei op ’n uitgestrekte weiveld; en die osse en die esels wat die grond bewerk, sal voer met sout eet, wat uitgewan is met skop en gaffel.”
Jesaja se profesie sê ook: “Die HERE van die leërskare sal op hierdie berg vir al die volke berei ’n maaltyd van vetspyse, ’n maaltyd van ou wyn, van vetspyse vol murg, van gesuiwerde ou wyn.” Die nuwe Afrikaanse vertaling van 1983 stel die laaste gedeelte só: “’n Feesmaal met die beste om te eet en te drink, goeie kos en geurige wyn.”—Jesaja 25:6; 30:23, 24.
Klink dit vir jou goed? Jesaja se profesie verseker ons dat almal wat in God se nuwe stelsel lewe, meer as genoeg fisiese voedsel sal hê. Sal dit veilig wees om te eet? Ongetwyfeld. ’n Ander profesie verseker ons dat God se knegte ‘elkeen onder sy wingerdstok en onder sy vyeboom sal sit, sonder dat iemand hulle verskrik’ (Miga 4:4). Hierdie algehele veiligheid sal gewaarborg word deur God se Messiaanse Koninkryk, wat in die nabye toekoms die heerskappy oor die hele aarde sal oorneem.—Jesaja 9:5, 6.
Nooit weer sal daar onsekerheid bestaan of voedsel veilig is of nie. Inteendeel, dit sal ’n plesier wees om te sê: “Lekker eet” of “bon appétit”.
[Lokteks op bladsy 12]
Almal op aarde sal binnekort heilsame voedsel in oorvloed geniet
[Prent op bladsy 10]
God beloof veilige, heilsame voedsel vir almal