Die verbasende grasorkeste van die Salomon-eilande

Deur Ontwaak!-medewerker in die Salomon-eilande

HET jy al ooit ’n panfluit probeer speel? Die asemhaaltegniek wat daarvoor nodig is, kan jou skoon duiselig laat voel. Maar stel jou voor dat jy pype speel wat twee meter lank en vyf sentimeter in deursnee is en wat vereis dat jy jou hele liggaam beweeg om ’n noot voort te bring. Sit 40 van hierdie instrumente saam, en jy het een van die verbasende grasorkeste van die Salomon-eilande. Ja, elke instrument in hierdie orkes is van gras gemaak! Van die groot verskeidenheid grassoorte in die digte tropiese woude van die Salomon-eilande kan pype verkry word wat klanke voortbring wat wissel van die hoogste sopraannoot tot ’n diep resonerende basnoot.

Kom ons besoek ’n pakhuis in Honiara, waar die Narasirato-fluitspelers hulle instrumente voorberei en oefen voordat hulle op ’n konserttoer na Taiwan vertrek. Party instrumente bestaan uit drie pype, wat gestem word om ’n drieklank, of akkoord, voort te bring. Die musikante hou die drie pype bymekaar en klop dit teen ’n plat klip om seker te maak dat die klanke in harmonie is. As dit nie is nie, word die pyp wat die verkeerde noot voortbring, korter gemaak. Hierdie pype word nie geblaas nie. Rubber word onderaan elke pyp vasgebind, en dit word dan saam teen die grond gestamp. Wat ’n merkwaardige akkoord bring dit tog voort!a

Dit is moeilik om die klank te beskryf wanneer die pype begin “sing”. Soms is die klank baie sag; ander tye is dit byna oorverdowend. Elke musiekstuk word gechoreografeer, en die musikante beweeg verby mekaar terwyl hulle speel. Partykeer is die musiek ’n onheilspellende gedreun, maar gewoonlik is dit vrolik en opgewek. Miskien sal jy ons eendag kan besoek en self een van die verbasende grasorkeste van die Salomon-eilande hoor!

[Voetnoot]